ރަސޫލުﷲ ޞައްލަﷲ ޢަލައިހި ވަސައްލަމްގެ ސަހާބީ ޢިމްރާން ބިން ހުސައިން ރަޟިޔަﷲ ޢަންހު ރިވާކުރައްވަނީ، ވިދާޅުވަނީ --- މާތް ރަސޫލު ޞައްލަﷲ ޢަލައިހި ވަސައްލަމް ހަދީޘްފުޅު ކުރެއްވިއެވެ. 

--- އިމްރާން ބިން ހުސައިން ރަޟިޔަﷲ ޢަންހު ވިދާޅުވަނީ " ރަސޫލުﷲ ޞައްލަﷲ ޢަލައިހި ވަސައްލަމް މި އުއްމަތަށް އިންޒާރުދެއްވާ ޙަދީޘްފުޅު ކުރައްވާފައޭ ވަނީ، ތިމަން ރަސޫލާގެ މި އުއްމަތުގައި އުޑުން ވާރޭ ވެހުމާއި، ހިލައިގެ ވާރޭ ވެހުމާއި، މަތިން ހިލައިގެ ވާރޭ ވެހި މީހުން ގަޒްފު ކުރުމާއި އަދި މީސްތަކުންގެ ސޫރަ މަކުނާއި އޫރުގެ ސޫރަޔަށް ބަދަލުވެގެން ދިޔުމާއި، މި އުއްމަތުގެ ބަޔަކު ﷲ ސުބުޙާނަހޫ ވަތަޢާލާ ދިރިދިރި ތިއްބާ ބިން ފަޅައި އަޑިއަށް ގެންބެވުމުގެ ބޮޑުވެގެންވާ ތިން ޢަޒާބު މިއުއްމަތަށް އަންނާނެއެވެ!" 

އަސްހާބު ބޭކަލުން ބިރުވެތިވެ ވަޑައިގެން ދަންނަވަނީ ﷲ ގެ ރަސޫލާއޭ! ކޮން އިރަކުތޯއޭ ތިކަން ވާނީ؟ ކޮން ސަބަބަކާހުރެ، ކޮން ވަގުތެއްގަ ތޯއޭ؟ ރަސޫލުﷲ ޞައްލަﷲ ޢަލައިހި ވަސައްލަމަ ހަދީޘްފުޅު ކުރައްވަނީ -- " މިކަން ވާނީ މިޔުޒިކް ސާމާނު ފާޅުވީމައެވެ. (ޢާންމުވީމައެވެ.) ލަވަކިޔުންތެރިން ގިނަވީމައެވެ.ރާބުއިން އާންމުވާން ފެށީމައެވެ." -- ރަސޫލުﷲ ޞައްލަﷲ ޢަލައިހި ވަސައްލަމަގެ ޞަރީހަ ޢިބާރާތުން، ބޮޑުވެގެންވާ ޢަޒާބާއި ކޯފާއެއްގެ އިންޒާރު އައީމަވެސް މުއުމިނުންގެ ހިތަށް ބިރުވެތިކަމެއް ނުވޭތޯ؟ އަޅުގަނޑުމެންގެ ގައިގެ ކެހެރިތައް ކޮޅަށް ޖެހޭކަށް ނުވޭތޯ؟ އަޅުގަނޑުމެން ވިސްނާކަށް ނުވޭތޯ؟

މިޔުޒިކް ސާމާނު އާންމު ނުވޭތޯ؟ ލަވަކިޔުންތެރިން ގިނަ ނުވޭތޯ؟ 

މިއަދު ޤުރުއާން ކިޔަވާ މީހުންނެއް ނެތް! ޤާރީންނެއް ނެތް. އަޅުގަނޑުމެން މިއިން ޤައުމަކުން ރަށަކުން ހޮވާލައިފައި ދައްކާ، ކިތައް ކީރިތި ޤުރުއާން ރަނގަޅަށް ހަމަ މަގުން ތަޖުވީދަށް ގަވާއިދުން ކިޔަވަން އެނގޭ ކިތައް މީހުން ތިބިތޯ! އަޅުގަނޑުމެން މި ޤައުމުގައިވެސް ރަމަޟާން މަހުގައި ތަރާވީސް ކޮށްދޭނެ ގާރީއަކު ނުވެގެން! ކޮންމެ ރަށެއްގެ މީހުން ޝަކުވާކުރޭ! އެކަމަކު ކޮންމެ ގެއެއްގައި ލަވަކިޔުންތެރިއެއް ހުރޭ! ކޮންމެ މީހަކި ލަވަކިޔުންތެރިއެއް! އަޅުގަނޑުމެން ކޮންމެ މީހެއްގެ ޅަ ދަރިއަކީވެސް ލަވަކިޔުންތެރިއެއް! އެކަމުގެ މުބާރާތްތައް ބޭއްވޭ. އެކަމުގައި ވާދަ ކުރެވޭ. އެކަމުގައި ކުރި އެރުމަށްޓަކާ ހިތްވަރު ކުރެވޭ، ޚަރަދުތައް ކުރެވޭ. ލަވަކިޔުންތެރިންގެ އަދަދު އިންތިހާއަށް ގިނަ ވެއްޖެ. 

ރަސޫލުﷲ ޞައްލަﷲ ޢަލައިހި ވަސައްލަމްގެ މި ބަސްފުޅުތަކުގައި މިވާ ޢަޒާބުތައް ނައިސް މިތިބެނީ އަޅުގަނޑުމެންގެ ވަރުގަދަކަމަކުން، އަޅުގަނޑުމެންގެ މޮޅު ކަމަކުން ނޫން. ފަހަރެއްގަ ވެދާނެ އެކަލާންގެ އަޅުގަނޑުމެންނަށް ތައުބާވުމަށްޓަކާ ފުރުސަތެއް ދެއްވަނީ ކަމަށް! އެހެންނަމަވެސް އަޅުގަޑުމެން ވިސްނަންޖެހޭ، ހަގީގަތުގައި އަޅުގަނޑުމެން މިތިބީ މިކޯފާއާއި ދުރަކު ނޫން! 

- ޝައިޚް އާދަމް ޝަމީމްގެ ދަރުސަކުން