ދުނިޔޭގެ އެންމެންނަށް ބެލި ނަމަވެސް އެންމެ ގިނަބައެއްގެ އެންމެ ބޮޑު ކަންބޮޑުވެފައި އޮންނަ އެއްކަމަކީ ލޯބި ނުލިބުމެވެ. މިކަން މިހެންވުމަށް މެދުވެރިވާ ސަބަބަށް ބަލައިލަމާ ހިނގާށެވެ!

ޢަބްދުﷲ އިބްން މަސްޢޫދު ވިދާޅުވެފައިވެއެވެ. "ތިބާއަށް ނުއެނގި އެތައް ބައަކު ތިބާއަށް ނަފްރަތުކުރާނެއެވެ! އެއީ ތިބާ ﷲ ތަޢާލާއަށް އުރެދި ނުކިޔަމަންތެރިވުމުގެ ސަބަބުން މީސްތަކުންގެ ހިތްތަކުގައި ﷲ ތަޢާލާ ތިބާގެ މައްޗަށް ނަފްރަތު ލައްވަވާފައިވާތީއެވެ."

މިއީ ވަރަށް ޢިބްރަތްތެރި ބަސްފުޅެކެވެ. މީހެއްގެ އަތުގައި ފައިސާ އާއި ބާރުހުރިނަމަ އެމީހާގެ ވަށައިގެން ގިނަ ބައަކު އެނބުރިދާނެއެވެ. އަދި އެއެންމެންނަކީ ތިމާ ދެކެ ހަމަ ލޯބިން އުޅޭ ބައެއްކަމަށް އެމީހަކަށް ޤަބޫލުވެސް ކުރެވިދާނެއެވެ! ނަމަވެސް ޙަޤީޤަތަށް ބަލައިފިނަމަ އެއިގެ ތެރެއިން ގިނަ ބައެއްގެ ހިތުގައި އެމީހާގެ މައްޗަށް އެއްވެސް ލޯތްބެއް ނުެސް އޮންނާނެއެވެ! އެ އެނބުރެނީ އެމީހުންގެ އަމިއްލަ އެދުމުގައެވެ.

މިފަދަ ކޮންމެ ކަމަކުން ވެސް އެނގެން މިދަނީ މީސްތަކުންގެ ލޯބި ޙާޞިލުކުރެވޭނީވެސް ﷲ ތަޢާލާއަށް ކިޔަމަންތެރިވެ ތެދުވެރިވެގެންކަމެވެ. ފާފަކުރުމުން ދުރުހެލިވެހުރެގެން ކަމެވެ. ފާފަކުރާ މީހަކު ދެކެވެސް ބައަކު ލޯބިވެސް ވެދާނެއެވެ! އެއީ އެމީހުންނަށް އޭނާގެ ޙަޤީޤަތް ނުއެނގޭތީއެވެ! ނަމަވެސް އޭނާގެ ޙަޤީޤަތް ﷲ ތަޢާލާ އެންމެ މޮޅަށް ދެނެވޮޑިގެންވެއެވެ. ފުރުބަތު ދެއްވެވުމަށްފަހު ﷲ ތަޢާލާ އެމީހަކު ހިއްޕަވާތަން ދުނިޔެއިން މިދަނީ އަބަދުވެސް ފެންނަމުންނެވެ.

ބައެއް މީހުން މީސްތަކުންގެ ލޯބި ހޯދަން ގަދައަޅައި މަސައްކަތްކުރެއެވެ. ބޮޑެތި އަދަދުތަކުން ހޭދަކުރެއެވެ. މީސްތަކުންނަށް ތަޢްރީފްގެ ބަސްތައް ވެސް ބުނެއެވެ. ނަމަވެސް މީސްތަކުންގެ ޙަޤީޤީ ލޯބި ލިބެނީ ވަރަށް މަދު މީހަކަށެވެ. އަދި ކީއްހެއްޔެވެ؟ އަމިއްލަ ޢާއިލާ އާއި ބައިވެރިޔާގެ ލޯބިވެސް ލިބެނީ ވަރަށް މަދު މީހަކަށެވެ!

މިފަދަ ހާލަތުގައި ފުރަތަމަވެސް ވިސްނައިލަންޖެހޭނެ އެއްކަމަކީ ތިމާގެ ނިޔަތަށެވެ! ނިޔަތުގެ ތެދުވެރިކަމަށެވެ! ﷲ ތަޢާލާއަށް ކިޔަމަންތެރިކަން އަދާކުރެވޭ މިންވަރަށެވެ! ފާފަކުރެވޭ މިންވަރަށެވެ.

ވީމާ ﷲ ތައާލާގެ ރުހިވޮޑިގަތުން ހޯދަން ގަދައަލައި މަސައްކަތްކުރާށެވެ! އެއިރުން އެމީހަކަށް އެންމެންގެ ލޯބި ﷲ ތަޢާލާ މިންވަރުފުޅުކޮށްދެއްވަވާނެތެވެ!

--އިސްލާމީ ތިލަފަތުގެ ދަރުސަކުން