ސަރުކާރުން މާލެ ސަރަހައްދުގައި ހިންގާ ހަތަރު ހޮސްޕިޓަލަކުން ބަލިމީހުންނަށް ޒިޔާރަތްކުރާ ވަގުތު އިތުރު ކޮށްފިއެވެ. މި ނިންމުން ނިންމާފައިވަނީ ރަމަޟާން މަހާ ގުޅިގެންނެވެ.

މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުލްރައްޒާޤް ޙަލީމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، އިންދިރާ ގާނދީ މެމޯރިއަލް ހޮސްޕިޓަލް، ދަރުމަވަންތަ ހޮސްޕިޓަލް، ވިލިމާލޭ ހޮސްޕިޓަލް އަދި ހުޅުމާލޭ ހޮސްޕިޓަލުން ބަލިމީހުންނަށް ޒިޔާރަތްކުރާ ވަގުތު އިތުރު ކުރުމަށް ނިންމާފައިވާ ކަމަށެވެ.

މާލެ ސިޓީ ގްރޫޕް އޮފް ހޮސްޕިޓަލްތަކުގައި އެނދުމަތި ކޮށްގެން ފަރުވާދޭ ބަލިމީހުންނަށް ރޯދަމަހު ޒިޔާރަތްކުރާ ވަގުތު ހަވީރު 5:00 ން ފެށިގެން ރޭގަނޑު 10:30 އަށް އިތުރު ކުރުމަށް ނިންމައިފިން.#Roadhaigeroohu

— Haleem (@22halex) March 9, 2025

މި ނިންމުމާ އެކު، އެނދުމަތި ކޮށްގެން ފަރުވާދޭ ބަލިމީހުންނަށް ޒިޔާރަތްކުރެވޭނެ ވަގުތު ހަވީރު 5:00 އިން ފެށިގެން ރޭގަނޑު 10:30 އަށް އިތުރުކޮށްފައިވެއެވެ. ކުރިން ބަލިމީހުންނަށް ޒިޔާރަތްކުރުމަށް ކަނޑައަޅާފައި އޮތީ ހަވީރު 5:00 އިން ރޭގަނޑު 8:00 އަށެވެ.

މި ބަދަލު ގެނެސްފައިވަނީ ރަމަޟާން މަހުގެ ޚާއްޞަ ޙާލަތަށް ރިޢާޔަތްކޮށް، ބަލިމީހުންނަށް ޒިޔާރަތްކުރަން ބޭނުންވާ ފަރާތްތަކަށް އިތުރު ފުރުޞަތު ދިނުމުގެ ގޮތުންނެވެނެވެ. މިއީ ގިނަ ފަރާތްތަކަކުން އެދެމުން އައި ކަމެއް ކަމަށްވެސް ބެލެވެއެވެ.

މި ބަދަލާއެކު، ބަލިމީހުންނަށް ޒިޔާރަތްކުރުމުގެ ވަގުތު 2 ގަޑިއިރާއި 30 މިނެޓު އިތުރުވެގެން ގޮސްފައިވާއިރު، މިއީ ބަލިމީހުންނާއި އެމީހުންގެ ޢާއިލާތަކަށް ލިބޭ ވަރަށް ބޮޑު ލުޔެއް ކަމަށް ގިނަ ފަރާތްތަކުން ފާހަގަކުރެއެވެ.