ދުނިޔޭގެ ނަން މަޝްހޫރު ފުޓްބޯޅަ ކްލަބް ލިވަޕޫލް އެފްސީގެ އޮފިޝަލް ޓޫރިޒަމް ޑެސްޓިނޭޝަން ޕާޓްނަރެއްގެ ގޮތުގައި ރާއްޖެ ޕްރޮމޯޓުކުރުމުގެ ކެމްޕޭން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙްކޮށްދެއްވައިފިއެވެ. މި ކެމްޕޭނަކީ ތިން އަހަރާއި ހަ މަސް ދުވަހުގެ މުއްދަތަށް ކުރިއަށްގެންދާ ކެމްޕޭނެކެވެ.

2.5 މިލިއަން ޑޮލަރުގެ އިންވެސްޓްމަންޓެއް ހިމެނޭ މި ކެމްޕޭންގެ ދަށުން ލިވަޕޫލްގެ ހޯމް މެޗުތަކުގައި އެލްއީޑީ ނިޝާންތަކާއި، ސްޓޭޑިއަމްގެ އެކި ސަރަހައްދުތަކުގައި ރާއްޖޭގެ ޓޫރިޒަމް ބްރޭންޑިން ފެންނާނެއެވެ. މީގެ އިތުރުން ޔޫރަޕްގެ މުހިއްމު މާކެޓުތަކުގައި ބިލްބޯޑުތަކުން ރާއްޖެ ޕްރޮމޯޓްކުރެވޭނެއެވެ.

މި ކެމްޕޭންގެ ސަބަބުން ލިވަޕޫލް އެފްސީގެ 205 މިލިއަން ފޮލޯވަރުންނާއި، 211 މިލިއަނަށްވުރެ ގިނަ ޓީވީ އޯޑިއަންސްއަށް ރާއްޖެ ޕްރޮމޯޓްވެގެންދާނެއެވެ. އަދި މި ކެމްޕޭންގެ ތެރެއިން ރާއްޖޭގައި ލިވަޕޫލްގެ އެކަޑަމީއެއް ގާއިމުކޮށް، ސްޕޯޓްސް ޓޫރިޒަމް ކުރިއެރުވުމުގެ މަސައްކަތްތައްވެސް ކުރެވޭނެއެވެ.

ޓޫރިޒަމް މިނިސްޓްރީގެ އަންދާޒާތަކުން ދައްކާގޮތުގައި މި ކެމްޕޭންގެ ސަބަބުން 100,000 އަށްވުރެ ގިނަ އައު ޓޫރިސްޓުން ރާއްޖެއަށް ޒިޔާރަތްކުރާނެކަމަށް ލަފާކުރެވެއެވެ. އަދި މީގެ ސަބަބުން ގާތްގަނޑަކަށް 200 މިލިއަން ޑޮލަރުގެ އާމްދަނީއެއް ރާއްޖެއަށް ލިބޭނެކަމަށް ބެލެވެއެވެ.

މި ކެމްޕޭނަކީ ރާއްޖޭގެ ޓޫރިޒަމް އިންޑަސްޓްރީއަށް އައު މަންޒިލެއް ހޯދައިދޭނެ، އަދި ސްޕޯޓްސް ޓޫރިޒަމްގެ ދާއިރާ ތަރައްގީކުރުމަށް މަގުފަހިކޮށްދޭނެ މުހިއްމު މަސައްކަތެއްގެ ގޮތުގައި ފާހަގަކުރެވެއެވެ.