މިހާރަކަށް އައިސް މީހެއްގެ ގާތުން ކިތަންމެ ކުޑަކަމަކަށް އެދުނަސް އެކަމެއް ކޮށްދިނުމުން ﷲ ތަޢާލާ ދެއްވަވާނެ ޘަވާބު ގެއްލިގެންދާނެ އަދި ފާފަވެރިވާނެ ކަންކަން ކުރަންވެސް އެބަ ބުނެއެވެ. މިއީ ވަަރށް ނުބައި ކަމެކެވެ. ހެދޭ ވަރަށް ބޮޑު ގޯހެކެވެ.

ވިސްނާށެވެ! ޙިޖާބް އަޅައި ނިވާވެގެން ހުރި އަންހެނެއްގެ ގާތުގައި ޙިޖާބް ނަގައި މޫނު ދައްކާލަން ބުނުމަކީވެސް ކުރެވޭ ފާފައެކެވެ. ބައްދަލުކުރަން ނުވަތަ އެހީއަށް އެދިގެން އައިސް ހުރީ އަންހެނަކަށްވެފައި އޭނާއާއިމެދު ހިތުގައި ޝައްކުތަކެއް އުފެދޭނަމަވެސް ހިލޭ ފިރިހެނަކަށް އޭނާގެ މޫނު ދައްކަންވެސް ބުނުމެއް ނެތެވެ. ޝައްކު ފިލުވާލަން އަންހެނަކު ލައްވައި އޭނާގެ މޫނު ބަލާށެވެ! ފޯނުން މުޢާމަލާތުކުރިނަމަވެސް ޢަމަލުކުރަންވާނީ ހަމަ މިގޮތަށެވެ. ވީޑިއޯކޮށް އޭނާގެ މޫނު ބަލަންވާނީ ބެލުން ހުއްދަ މީހަކު ލައްވައެވެ.  

ދެން ނިކަން ވިސްނައިލަބަލާށެވެ! އަންހެނަކު އެހީއަކަށް އެދުމުން އެކަހެރި ބައްދަލުވުންތަކަށް އެދުމާއި އެނޫންވެސް އެފަދަ ކަންކަމަށް އެދެން ހެޔޮވާނީ ކިހިނަކުން ހެއްޔެވެ؟ އެކމުގެ ސަބަބުން އެމީހަކަށް ލަޢުނަތް ޙައްޤުވާނެ މިންވަރަށް ނިކަން ވިސްނައިލަބަލާށެވެ!  

މީސްތަކުންނޭވެ! ނިކަމެތި ޙާލެއްގައި ހުރި މީހަކު އެހީއަކަށް އެދިއްޖެނަމަ އެކަމަކީ ދިމާއަށް ކޮށްދެވެން އޮތް ކަމެއްނަމަ އަވަހަށް އެކަން ކޮށްދޭށެވެ! އެކަމުގެ ސަބަބުން ﷲ ތަޢާލާގެ ރުހިވޮޑިގަތުން ލިބިގަންނަން އަވަސްވެގަންނާށެވެ! އެކަމުގެ ބަރަކާތް ގެއްލިގެން ހިނގައިދާނެ އެއްވެސް ކަމެއް ނުކުރާށެވެ!

- މަޢުލޫމާތު: ބިލާލް އައްސަދުގެ ދަރުސަކުން