އެންމެންވެސް ބޭނުންވެގެން މިއުޅެނީ ޙާޞިލުކުރަން ބޭނުންވާ ކަންކަން ޙާޞިލުކުރެވުމަށެވެ. އެކަމަށް އެދިގެން މުސްލިމުން ފުރިހަމަކުރަންޖެހޭ 3 ކަމެއް ވެއެވެ. 

ފުރަތަމަ ކަމަކީ ތިމާ ޙާޞިލްކުރަން ބޭނުންވާ ކަންތައް ކަނޑައެޅުމެވެ. 

ދެވަނަ ކަމަކީ އެކަން ތިމާއަށް ﷲ ތަޢާލާ ހިންމަވައި ދެއްވަވާނެކަން އެންމެ ފުރިހަމަ ގޮތުގައި ޔަޤީންކުރުމެވެ. 

ތިންވަނަ ކަމަކީ އެކަން ޙާޞިލްކުރަން ތިމާއަށް ކުރެވެންހުރި ހުރިހާ މަސައްކަތެއް ކުރުމެވެ. 

ވަރަށް ޔަޤީންކަމާއިއެކު މި 3 ކަންތައް ފުރިހަމަކޮށްފި މީހަކަށް ޙާޞިލުނުކުރެވޭނެ އެއްވެސް ކަމެއް ނުއޮންނާނެއެވެ. މިބަހަށް ބައެއް މީހުން އިންކާރުވެސްކޮށްފާނެއެވެ. މި 3 ކަންތައް ފުރިހަމަކުރުމުންވެސް މިވެނި އެވެނިކަމެއް ޙާޞިލު ނުކުރެވުނު ކަމަށްވެސް ބުނެފާނެއެވެ. 

އެހެންވެ އެކަން މެދުވެރިވާ ގޮތްވެސް ކިޔައިދޭނަމެވެ. މިޘާލަކަށް ތިބާއަކީ ﷲ ތަޢާލާގެ ރުހިވޮޑިގަތުން ލިބިގެންހުރި މީހެކެވެ. ތިބާ އެދެނީ އެކަމެއް ތިބާއަށް ޙާޞިލުކުރެވުމުން ތިބާއަށް ގެއްލުންވާނެ ކަމަކަށެވެ. އެކަން ތިބާއަށް ނުއެނގުނަސް ﷲ ތަޢާލާ ދެނެވޮޑިގެންވެއެވެ. އެޙާލަތުގައި ތިބާ އެދުނުކަންތައް އެދުނު ގޮތަށް ޙާޞިލުނުކުރެވިދާނެއެވެ. ނަމަވެސް ބަދަލުގައި އެހެން ކަމަކުން ރަޙްމަތް ލައްވަވާނެތެވެ. 

ﷲ ތަޢާލާގެ ޙަޟްރަތުން ރުހިވޮޑިގަތުން ލިބިގެންވާ އަޅުން ކަމަކަށް އެދިގެން ދުޢާކުރުމުން އެކަން ހިންމަވައި ދެއްވަވައި އެމީހަކަށް ފައިދާހުރި އެހެންކަމެއް މިންވަރުކުރައްވަވަނީވެސް ހަމަ މިގޮތުންނެވެ.  

- ޝައިޚް މުޙައްމަދު ބާޖޫރުގެ ދަރުސަކުން