ރާއްޖެއަށް އެތެރެކުރަން އުޅުނު މަސްތުވާތަކެތީގެ ބާވަތެއް ކަމަށްވާ އެމްފެޓަމައިން ގުޅަތަކަކާއެކު ބަންގްލަދޭޝް މީހަކު ކަސްޓަމްސްއިން އަތުލައިގެންފިއެވެ.

ކަސްޓަމްސްއިން މިއަދު ބުނި ގޮތުގައި، މިދިޔަ ހޮނިހިރު ދުވަހު ރާއްޖެ އައި 23 އަހަރުގެ ބަންގްލަދޭޝް ފިރިހެން މީހަކާ ވެލާނާ އިންޓަނޭޝަނަލް އެއާޕޯޓްގައި ހަރަކާތްތެރިވަމުން ދިޔަ ކަސްޓަމްސް އޮފިސަރުން ސުވާލުކުރިކަމަށެވެ.

އަދި އޭނާގެ އަމަލުތައް ހުރި ގޮތުން، އޮފިސަރުން އޭނާގެ ލަގެޖު ބަލައި ފާސްކުރިއިރު، އެ ލަގެޖުގެ ތެރެއިން ފެނުނު ފުޅިތަކެއްގެ ތެރެއިން 302 އެމްފެޓަމައިން ގުޅަ ފެނިފައިވާކަމަށެވެ.

އަދި އެ ގުޅަތައް އެތެރެކުރަން އުޅުން މީހާ ފުލުހުންނާ ހަވާލުކޮށްފައިވާއިރު، ފުލުހުން ދަނީ އެ މައްސަލަ އިތުރަށް ތަހުޤީޤު ކުރަމުންނެވެ.