ޓެކްނޮލޮޖީ ބޭނުންކޮށްގެން ނިރުބަވެރިކަމަށް ހިތްވަރު ދެމުންގެންދާއިރު މިކަމުގެ ޝިކާރައަކަށްވަނީ ދިވެހި ޒުވާނުންކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ދަ ނޭޝަނަލް ހައި ލެވެލް ކޮންފަރެންސް އޮން ޕީސް އެންޑް ސެކިއުރިޓީ ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ޣައްސާން ވިދާޅުވީ މިފަހަކަށް އައިސް ނިރުބަވެރިކަމަށް މީހުންނަށް ދަޢުވަތު ދެމުންގެންދަނީ ޓެކްނޮލޮޖީ މެދުވެރިކޮށް ކަމަށާއި ޓެކްނޮލޮޖީ ބޭނުންކޮށްގެން މިފަދަ ކަންކަން ކުރުމަށް ހިތްވަރު ދެމުންގެންދާއިރު މިކަމުގެ ޝިކާރައަކަށްވަނީ ދިވެހި ޒުވާނުންކަމަށެވެ.

"ޤައުމުގެ ތަރައްޤީގެ މަޝްރޫޢުތައް ހިންގުމަށް، ޤައުމުގެ އުފެއްދުންތެރިކަން އިތުރުކުރުމަށް ޒުވާނުންގެ ޝާމިލްވުން އެންމެ ބޭނުންވާ ވަގުތު، އެ ޒުވާން ސިކުނޑިތަކަށް ފޯރުކޮށްދެނީ ޓެކްނޮލޮޖީގެ ވަޞީލަތްތަކުގެ ފަހަތުގައި ފިލާ ބަޔަކު ތިބެގެން ޤައުމަށް ގެއްލުންދޭ ފިކުރުތައް." ދިފާޢީ ވަޒީރު މުޙައްމަދު ޣައްސާން ވިދާޅުވިއެވެ.

މިއީ ޤައުމީ ސަލާމަތަށް އޮތް ނުރައްކާ އަދި ހައްސާސް މައްސަލައެއްކަން ފާހަގަކުރައްވާ ވަޒީރު ވިދާޅުވީ ނިރުބަވެރިކަން ހުއްޓުވޭނީ ކަމާބެހޭ ހުރިހާ ފަރާތްތައް ގުޅިގެން މަސައްކަތްކޮށްގެން ކަމަށެވެ.