ކޮންމެ މީހަކަށްވެސް ނިޢްމަތްތައް ދެއްވަވަނީ ﷲ ތަޢާލާ އެވެ. ވީމާ ފައިސާވެރިކަމާއި ޤަދަރާއި މަތީ މަޤާމުތައް ދެއްވެވުމުން އެއީ ފަޚުރު ކަމުގައި ނުދެކޭށެވެ! ފަޚުރަކީ ފުރިހަމަގޮތުގައި ރަސޫލް (ﷺ)ގެ އުންމަތުގެ މީހެއް ކަމުގައިވުން ކަމަށް ދެކޭށެވެ! އެއަށްވުރެ ބޮޑު ފަޚުރެއް މުސްލިމުންނަކަށް ނުވެއެވެ.

ކިތަންމެ މަތީ މަޤާމެއް ، ޢިއްޒަތެއް އަދި ކިތަންމެ ބޮޑު ތަނަވަސްކަމެއް ލިބުނު ނަމަވެސް އެއީ ފަޚުރުކަމަށް ނުދެކޭށެވެ! އެއީ ތިބާ އާއި ވަކިވެގްންދާނެ ކަންކަމެވެ. ވީމާ އާޚިރަތް އެދޭ މީހާ ދެކެންވާނީ ﷲ ތަޢާލާ ދެއްވަވާ ކޮންމެ ނިޢްމަތަކީވެސް ކުރިމަތި ކުރައްވަވާ އިމްތިހާނެއް ކަމަށެވެ. މަސައްކަތްކުރަންވާނީ އިމްތިޙާނުން ފާސްވުމަށެވެ

އިންސާނުން ދުނިޔޭގައި އުޅެމުންދާއިރު ﷲ ތައާލާ ވަރަށް ގިނަ ނިޢްމަތްތައް މިންވަރުކުރައްވަވައެވެ. އެކަމާއި ގުޅިގެން އެއީ ދެއްވެވި ވަރަށް ބޮޑު ނިޢްމަތެއް ކަމަށް ޤަބޫލުކުރެވިދާނެއެވެ. ނަމަވެސް ޙަޤީޤަތުގައި އެފަދަ ބައެއް ކަންކަން ވެގެންދަނީ ތިމާއަށް ލިބޭ އެންމެ ބޮޑު ގެއްލުން ކަމަށެވެ. އެކަމުގެ ވަރަށް އާދައިގެ މިސާލެއް ބުނަން ހެއްޔެވެ؟

މީހަކަށް ވަރަށް ބޮޑު މުސާރައެއް ލިބިދާނެއެވެ. ނުވަތަ ވިޔަފާރިން ވަރަށް ބޮޑަށް ފައިދާވެދާނެއެވެ. އަތްމައްޗަށް ވަރަށް ގިނަ ފައިސާ އަރަން ފަށައިފާނެއެވެ. އެއިރުން ގިނަ ބައަކަށް ޤަބޫލުކުރެވެނީ ކަމުގެ އަޞްލާއި އެއްގޮތަކަށް ނޫނެވެ. ﷲ ގަންދީ ބުނަމެވެ. ގިނަ ބައަކަށް އެކަން ވެގެންދަނީ އެމީހާގެ ހަލާކު ކަމަށެވެ.

"އެއީ ފައިސާ ލިބެން ފެށީމާ ގިނަ މީހުންނަށް ކުރެވޭ ނުކުރެވޭ ކަމެއްވެސް ނޭނގެ! ކުރަން ފެށެނީ ﷲ ތަޢާލާ ޙަރާމް ކުރެއްވެވި ކަންކަން. އެކަންކަން ނުކުރެވޭނަމަ އެމީހާގެ ޤަދަރެއް އޮންނަ ކަމަކަށްވެސް ނުވިސްނޭ! ނަތީޖާއެއްގެ ގޮތުން އިރުއޮއްސިއްޖެ ނަމަ އުޅޭނީ ކޮންމެވެސް ޙަރާމް ކަމެއް ކުރުމުގަ. ހަފްތާ ބަންދުގަ ދުވާލެއް ރޭގަނޑެއްވެސް ނުބަލާނެ! އަތުން ހޭދަކޮށް އިސްރާފް ކުރެވޭ ވަރެއްވެސް ނޭނގޭނެ! ނަތީޖާއެއްގެ ގޮތުން ކުޑަ ދުވަސްކޮޅެއްގެ ތެރޭގައި ދަރަނިވެރިވެ އަގުވެއްޓި ނިކަމެތިވަނީ ކިތައް މީހުން ހެއްޔެވެ؟"

ދުނިޔޭގައި އުޅެން ކޮންމެވެސް ވަރަކަށް ފައިސާ ބޭނުންވާނެއެވެ! ޙަލާލު ގޮތުގައި ފައިސާ ހޯދެން އޮތް ނަމަ ގިނަ ފައިސާ ހޯދުމަކީވެސް އެއްވެސް މައްސލައެއް ނޫނެވެ! ނަމަވެސް ޔަޤީންކުރަންވީ ﷲ ތަޢާލާ އާއި ތިމާ އާއި އޮންނަ ގުޅުން ކުޑަވާނެ، ނުވތަ ކެނޑިގެން ހިނގައިދާނެ ގޮތަށް އެއްވެސް ފައިސާއެއް ހޯދައިގެން ނުވާނެކަމެވެ. އަދި ފައިސާ ލިބުމުންވެސް ﷲ ތަޢާލާ އާއި ތިމާ އާއި އޮންނަ ގުޅުން ކުޑަވާނެ، ނުވތަ ކެނޑިގެން ހިނގައިދާނެ ގޮތަށް އެއްވެސް ކަމެއް ކޮށްގެން ނުވާނެ ކަމެވެ.

--މުފްތީ މެންކުގެ ދަރުސަކުން