ކުރާ ކޮންމެ ހެޔޮ ޢަމަލަކަށް 10 ޘަވާބު ދެއްވަވާނެ ކަމަށް އޮތްނަމަވެސް އެ ޢަދަދު 700 ގުނައަށް ނުވަތަ އެއަށްވުރެވެސް އިތރުކުރުމުގެ ފުރުޞަތު އަހުރެމެންނަށް އެބައޮތެވެ.

ޙަދީޘްފުޅުގައި އޮތީ މިފަދައިންނެވެ.

"ތިއަބައިމީހުންގެ މީހެއްގެ އިސްލާމްކަން ރަނގަޅުކޮށްފިނަމަ އެމީހަކު ކުރާ ކޮންމެ ހެޔޮ ކަމެއް 10 ގުނައިން ފެށިގެން 700 ގުނައާއި ދެމެދު ލިޔުއްވޭ ހެއްޓެވެ. އަދި ކުރާ ކޮންމެ ފާފައެއް އެ ފާފައަކާ އެއްވަރަށެވެ!" (ޞަޙީޙް ބުޚާރީ: 42)

ކުރާ ކޮންމެ ހެޔޮ ޢަމަލަކަށް މަދުވެގެން 10 ޘަވާބު ދެއްވަވާނެކަމަށް އޮތް ނަމަވެސް އެ އަދަދު 700 ގުނައާއި ހަމައަށް އިތުރުކުރުމުގެ މަގު މިޙަދީޘްފުޅުން މިއޮތީ ފެންނާށެވެ! އެމަގަކީ އެމީހެއްގެ އިސްލާމްކަން ރަނގަޅުކުރުންކަންވެސް މިއޮތީ އެނގޭށެވެ.

އިސްލާމްކަން ރަނގަޅުކުރުމަކީ ﷲ ތަޢާލާއަށް ކިޔަމަންތެރިކަން އަދާކުރުމުގައި އެމީހަކު ސާބިތުވާ މިންވަރެވެ. ފާފަތަކަށް އަރައި ނުގަތުމާއި ހެޔޮ ޢަމަލުކުރުން ގިނަކުރުމެވެ. ކުރާ ކޮންމެ ޢަމަލެއް ﷲ ތަޢާލާ އަންގަވާފައިވާ ގޮތަށް ކުރަން މަސައްކަތްކުރުމެވެ.

މި ޙަދީޘްފުޅުން އެނގިގެން މިދަނީ މިބުނެވުނު ކަންކަމުގައި އެމީހަކު ސާބިތުވި މިންވަރަކުން އެމީހާ ކުރާ ހެޔޮ ޢަމަލުތަކަށް ﷲ ތަޢާލާ ދެއްވަވާ ޘަވާބު އިތުރުކުރައްވަވާނެ ކަމެވެ. ވީމާ ކުރާ ކޮންމެ ކަމެއްގައިވެސް އިޚްލާޞްތެރިކަން އިސްކުރާށެވެ! ދިރިއުޅުމުގެ ކޮންމެ ކަމެއްގަ އާއި ކުރާ އަޅުކަމުގައިވެސް އިޚްލާޞްތެރިކަން އިސްކުރާށެވެ! 10 ގުނައިގެ ބަދަލުގައި 700 ގުނަ ލިބިގަންނަން ގަދައަޅައި މަސައްކަތްކުރާށެވެ!

10 ގުނައިން ބަލައިފިނަމަ 700 ހަމަވާނީ 70 ފަހަރުންނެވެ! ނަމަވެސް ހަމަ އެންމެ ފަހަރަކުން 700 ހަމަކުރުމުގެ ފުރުޞަތު ﷲ ތަޢާލާ އެވަނީ ދެއްވަވައިފައެވެ. ބޭނުން ހިފުން އޮތީ އެމީހާގެ އަތްމަތީގައެވެ.

--އިސްލާމީ ތިލަފަތުގެ ދަރުސަކުން