"ފަޤީރު ކުއްޖާ، ސިފަހުތުރު ކުއްޖާ، ކުނިކުއްޖާ" ފަދަ ނަންތަކަކީ ކޮންމެ ދުވަހަކުހެން އޮފީހުގައި އަޅުގަނޑަށް ކިޔާ ނަންތަކެވެ. ގިނަކުދިން ކިޔަނީ ސިއްރުންނެވެ. ކެރޭ ބައެއް ކުދިން އަޑުއިއްވައިވެސް ކިޔައެވެ. އަރައިހަމަވުމުން "ދުވާވަހޭ" ފަދަ ބަސްތައްވެސް ބުނެއެވެ.  

މައްސަލައަކީ އަޅުގަނޑު އުޅެންޖެހިފައިވާ ދަތިޙާލުގެ ސަބަބުން އެހެން މުވައްޒިފުން ލާފަދަ ރީތި ހެދުން ނުލެވޭކަމެވެ. އަގުބޮޑު ސެންޓު ނުޖެހޭ ކަމެވެ. އަމިއްލަ ޙާލަތު ވިސްނޭތީ ތަންކޮޅެއް އެކަހެރިކޮށް އުޅެވޭ ކަމެވެ. އެމީހުން ކުރާ މަޖާތަކުގައި ބައިވެރިވެ ސަކަރާތްޖަހައި ނުއުޅޭ ކަމެވެ.  

އަޅުގަނޑުގެ ވަޒީފާ ދަށިއެއްވެސް ނޫނެވެ. ލިބޭ މުސާރަ ކުޑައީއެއްވެސް ނޫނެވެ. މުސްކުޅި މަންމައަކާއި ބައްޕަގެ އިތުރުން ހަގަށް ތިބި 3 ކޮއްކޮއަށް ކިޔަވައިދޭން ޚަރަދުކޮށްފައި ބާކީ ނުވަނީއެވެ. ބާކީކޮށްގެން މާމަތީފެންވަރުގައި އުޅެން ބޭނުންވެސް ނުވަނީއެވެ.  

ކޮންމެއަކަސް އެފަދަ ހިތްދަތިގޮތަކަށް އޮފީހުގައި އުޅޭތާ 5 ވަނަ އަހަރު އޮފީހަށް މެނޭޖަރަކު ވެއްދިއެވެ. އެއީ ހަމަ އަޅުގަނޑާއި ދާދި އެއް ޢުމުރުގެ ޒުވާނެކެވެ. ބަސްމަދު އަޚްލާޤް ރަނގަޅު ޒުވާނެކެވެ. 

2، 3 މަސްވެ އޮފީހުގެ ކަންކަން އޭނާއަށް އެނގި ފަރިތަވުމުން އެއްދުވަހަކު އަޅުގަނޑު ގެންގޮސްފައި އަޅުގަނޑު ކުރާ މަސައްކަތަށް ތަޢްރީފްކުރިއެވެ. އެހެންކުދިން އަޅުގަނޑަށް މަލާމާތްކޮށް ދިމާކުރަނީ ކީއްވެގެންތޯ ސުވާލުކުރުމުން އެކުދިންނާއި ސުވާލުކުރަން ބުނީމެވެ.  

އެއިގެ ދުވަސްކޮޅެއްފަހުން އަޅުގަނޑުމެންގެ ގެއަށް ގޮސްލަން ބޭނުންކަމަށް ބުނުމުން ގެންދިއައިމެވެ. ގޭތެރޭގެ ޙާލަތު ފެނި އެނގުމުން ވަރަށް ޙައިރާންވެފައި އަޅުގަނޑު އުފުލާ ޒިންމާތަކަށް ތަޢްރީފް ކުރިއެވެ.  

އެއިގެ މަހެއްހައި ދުވަސްފަހުން މެނޭޖަރު ބުނީ އަޅުގަނޑު ރުހޭނަމަ ކައިވެނިކުރަން ބޭނުން ކަމަށެވެ. އެއިރު އެއީ އަޅުގަނޑުގެ ޢުމުރުން 30 ވަނަ އަހަރެވެ. އެހެންވެ ހުރީ ކައިވެނިކުރަން ބޭނުންވެގެން ކަމަށްވުމުން އެކަމަށް ރުހުނީމެވެ. ނަމަވެސް މައިންބަފައންނާއި ކޮއްކޮމެންގެ ކަންކަން ބަލަހައްޓަން އަޅުގަނޑަށް ޖެހޭނެކަން ވިސްނައިދިނީމެވެ. އެކަން އޭނާ ޤަބޫލުކުރިއެވެ.  

މެނޭޖަރަކީ ޙަޤީޤަތުގައި އޮފީހުގެ ބޮސްގެ ދޮށީ ފިރިހެންދަރިފުޅުކަން އެނގުނީ ރަންކީރޭގައެވެ. އޭނާގެ މަންމަ އާއި ބައްޕަ ގޮވައިގެން އަޅުގަނޑުމެންގެ ގެއަށް ދިއުމުންނެވެ. ވަރަށް ބޮޑު ޙައިރާންކަމެއް ލިބުނެވެ. އެރޭ ބައްޕަ ބުންޏެވެ. "ސިހިއްޖެދޯއެވެ! ދަރިފުޅުގެ ޙަޤީޤަތް ހާމަނުކޮށް އޮފީހުގައި މުވައްޒިފެއްގެ ގޮތަށް މިގެންގުޅުނީ އޭނާ އަމިއްލައަށް ކަންކަން ދަސްކޮށް މީހަކަށް ހެދުމަށެވެ. އަދި އެއީ އަހަރެންގެ ދަރިފުޅުކަން އެނގިއްޖެނަމަ ހުރިހާ އަންހެން މުވައްޒިފުން އޭނާގެ ފަހަތުން ދުވާނެތީއެވެ. "ޗޫޒްކުރަން" ފުރުޞަތު ނުލިބި މަޅީގައި ދަރިފުޅު ޖެހިދާނެތީއެވެ. ދަރިފުޅުގެ ކައިވެނީގެ ކަންކަން އެނިންމީ އަހަރެމެންނާއިވެސް މަޝްވަރާކޮށްގެންނެވެ."  

ދެއްވެވި ނިޢްމަތަށް ޝުކުރުވެރިވީމެވެ. ކުރިއަށްވުރެ ގިނަ އިރު ރޭއަޅުކަމުގައި އިންނަން ފެށީމެވެ. އެއިގެ ހަފްތާއެއްހައި ދުވަސްފަހުން ކައިވެނި ކުރެވުނެވެ. އޮފީހުގެ މުވައްޒިފުންނަށް އެކަން އެނގުނީ ކައިވެނި ކުރިފަހުންނެވެ. ވަލީމާއަށް ކާޑުތައް ޙަވާލުކުރުމުންނެވެ. އަޅުގަނޑާއި ފިރިމީހާ އެއްކޮޓަރިއެއްގައި ތިބެގެން މަސައްކަތްކުރަން ފެށުމުންނެވެ.  

އެހިސާބުން ހުރިހާ ކުދިންހެން އެކުދިންނަށް އަޅުގަނޑާއިމެދު ކުރިން ކަންކަން ކުރެވުނު ގޮތާއިމެދު ދެރަވެ މާފަށް އެދުނެވެ. އެމީހުން ހީކުރީ އެފަދަ ބާރެއް އަޅުގަނޑަށް ލިބުމުން އަޅުގަނޑަށް ފުރައްސާރަކުރި އެންމެން ވަޒީފާއިން ވަކިކުރާނެ ކަމަށެވެ. އެކަމަކު އަޅުގަނޑު ކަންކަން ކުރީ އެގޮތަކަށް ނޫނެވެ. އެންމެންނަށް މާފުކުރީއެވެ. ކުރިއަށް އޮތްތަނުގައި އެފަދަ ގޮތްގޮތަށް ކަންކަން ނުކުރަން ނަޞޭޙަތްދިނީއެވެ.  

އެކަމުގެ ނަތީޖާ ވަރަށް ރަނގަޅަށް ފެނުނެވެ. އަޅުގަނޑަށް ވަރަށް އުފާވެރި ދިރިއުޅުމެއް ލިބުނެވެ. ކައިވެންޏަށް މިހާރު 22 އަހަރެވެ. އިން ޝާ ﷲ މިއަދާއި ހަމައަށްވެސް ދެމީހުންގެ މެދުގައި މައްސަލައެއް ޖެހި، ޙައްލުނުވެގެން، ކަންބޮޑުވާންޖެހިގެން އުޅޭކަށް ނުޖެހެއެވެ.  

އަޅުގަނޑު އުންމީދުކުރަނީ އަޅުގަނޑުގެ މިވާހަކައިން ކިޔުންތެރިންނަށް ޢިބްރަތްތެރި ފިލާވަޅެއް ލިބިގެންދާނެ ކަމަށެވެ. އިން ޝާ ﷲ އަޅުގަނޑަކަށް ނުއެނގެއެވެ. އެކަމަކުވެސް ހިތަށް އަރަނީ މިފަދަ އުފާވެރި ޙަޔާތެއް އަޅުގަނޑަށް ލިބުނީ 2 ކަމަކުން ކަމަށެވެ. ފުރަތަމަ ކަމަކީ މައިންބަފައިންނަށާއި ޢާއިލާއަށް އަޅައިލުމެވެ. 2 ވަނަ ކަމަކީ އޮފީހުގައި އެހައި ހިތްދަތިކޮށް އުޅުނުއިރުވެސް އެއްވެސް އެކުވެރިއަކަށް ހިތްބުރަ ނުކުރުމެވެ.

- ސިތުނާ / މިއަދުނޫހުގެ ކިޔުންތެރިއެއް