ގިނަ ބައަކު ފުރަތަމަވެސް ކުރަން ބޭނުންވަނީ އެންމެ ބޮޑެތި ހެޔޮ ޢަމަލުތަކެވެ. ދަމުނަމާދުކުރަން ފަށަންވެސް ބޭނުންވަނީ ވިތުރިއާއިއެކު މަދުވެގެން 11 ރަކްއަތުންނެވެ. މީހުންގެ ޢާންމު ޙާލަތަށް ބަލައިފިނަމަ މިއީ ކުރެވޭނެ ނުވަތަ ކުރަން އެހައިފަސޭހަވާނެ ކަމެއް ނޫނެވެ.

ހަމައެފަދައިން އަހަރެމެންގެ ތެރެއިން ބައެއް މީހުން ވަރަށް ގިނަ ހެޔޮ ޢަމަލުތައް ކުރަން އުޅެއެވެ. އެގޮތަށް އެކަންކުރަން އުޅުމުން ގިނަބައަކަށް އޮންނަނީ އެއްވެސް ޢަމަލެއް ޤަވާއިދުން ނުކުރެވިފައެވެ. ވީމާ ސުންނަތް އަޅުކަން ކުރުމުގައި އެމީހަކަށް ކުރެވޭނެވަރު އިޚްތިޔާރުކުރާށެވެ. އެންމެ ފައިދާ ބޮޑުވާނީ އެއިރުންނެވެ.

ޙަދިޘްފުޅުގައި އޮތީ:

"ކޮންމެ އަޅުކަމެއްވެސް ވީހައި ފުރިހަމައަށް ކުރުމަށެވެ. އަދި މަޑުމައިތިރިކަމާއިއެކުކުރުމަށެވެ.

މީސްތަކުން ސުވަރުގެ ވައްދަވާނީ އެމީހާކުރާ ހެޔޮ އަމަލުތައް ގިނަވުމަކުންނޫނެވެ. އިޚްލާޞްތެރިކަމާއިއެކު ﷲ ތަޢާލާ ޤަބޫލުފުޅުކުރައްވަވާ ފެންވަރުގައި ކުރެވުމުން އެއަޅުކަން ﷲ ތަޢާލާ ޤަބޫލުފުޅު ކުރެއްވެވުމުންނެވެ. އެކަމަށް ﷲ ތަޢާލާގެ ރުހިވޮޑިގަތުން ލިބިގެންނެވެ.

ﷲ ތަޢާލާގެ ޙަޟްރަތުގައި އެންމެ ލޮބުވެތިކަންބޮޑު އަމަލަކީ ކިތަންމ ކުޑަ ޢަމަލެއް ނަމަވެސް އެޢަމަލެއްކުރުންމަތީގައި ދެމިހުންނަ ޢަމަލެވެ."

ވީމާ ކިތަންމެ ކުޑަ ހެޔޮ ޢަމަލެއް ނަމަވެސް އިޚްލާޞްތެރިކަމާއިއެކު ﷲ ތަޢާލާ ޤަބޫލުފުޅު ކުރައްވަވާ ފެންވަރުގައި ކުރަން ގަދައަޅައި މަސައްކަތްކުރާށެވެ!

ބުނަން ބޭނުންވަނީ މިޘާލަކަށް ދަމުނަމާދުގެ 2 ރަކްޢަތް ކުރަން އަވަހަށް ފަށާށެވެ. ކިތަންމެ ކުރު ސޫރަތެއް ކިޔަވައިގެން ނަމަވެސް އެއީ މައްސަލައެއް ނޫނެވެ. ކުރަން ފެށުމަށްފަހު އެކަން ޤަވާއިދުން ކުރެވޭތޯ ބަލާށެވެ. ޤަވާޢިދުން ކުރަން މަސައްކަތްކުރަނިކޮށް ޙާލަތު ދިމާވާ ގޮތަކުން ނުކުރެވުނަސް އެއީ މައްސަލައެއް ނޫނެވެ. އެކަން ﷲ ތަޢާލާ ދެނެވޮޑިގެންވެއެވެ.

Narrated `Aisha:

Allah's Messenger (ﷺ) said,

"Do good deeds properly, sincerely and moderately and know that your deeds will not make you enter Paradise, and that the most beloved deed to Allah is the most regular and constant even if it were little."

Saheeh Bukharee: 6464

--އިސްލާމީ ތިލަފަތުގެ ދަރުސަކުން