ސުވާލު. ނަމާދުގައި އައްތަހިއްޔާތަށް އިންނަ އިރު ޝަހާދަތް އިނގިލި ތެޅުވުމުގެ ޙުކުމަކީ ކޮބައިތޯ؟ 

ޖަވާބު. އާދެ! ނަމާދުގައި އައްތަހިއްޔާތުގައި އިނގިލި ތެޅުވުމުގެ މައްސަލައިގައި ޢިލްމުވެރިންގެ މެދުގައި ތަފާތު ރަޢުޔުތައް ހިމެނިފައިވޭ. އޭގެ ތެރެއިން ވަރަށް ގިނަ ޢިލްމުވެރިން އެބަހުރި އިނގިލި ތެޅުވުމަކީ އެއީ ހުއްދަ ކަމެއްގެ ގޮތުގައި ނުވަތަ ރަސޫލް ޞައްލަﷲ ޢަލައިހި ވަސައްލަމްގެ ފަރާތްޕުޅުން ސުންނަތުން ވާރިދުވެފައިވާ ކަމެއްގެ ގޮތުގައި އެ ކަން އައިސްފައިވޭ.  

ކޮންމެއަކަސް ބައެއް ރިވާޔަތްތަކުގައި އައިސްފައި އެބަހުރި ރަސޫލް ޞައްލަﷲ ޢަލައިހި ވަސައްލަމް އައްތަހިއްޔާތު ފެށުނީއްސުރެ، ނުވަތަ އައްތަހިއްޔާތަށް އިށީނދެވަޑައިގަތީއްސުރެން ފެށިގެން ސަލާމް ދެއްވުމާ ހަމައަށް އެ ކަލޭގެފާނުގެ ޝަހާދަތް އިނގިލިފުޅު ހަރަކާތް ކުރައްވާ ކަމަށް. އަނެއްބައި ރިވާޔަތްތަކުގައި އައިސްފައި އެބަހުރި ރަސޫލް ޞައްލަﷲ ޢަލައިހި ވަސައްލަމް އައްތަހިއްޔާތު ކިޔަވަމުން ވަޑައިގެންފައި "އަޝްހަދު" އެ ހިސާބުން ކަނާއަތުގެ ޝަހާދަތް އިނގިލިން އިޝާރާތް ކުރައްވައިފައި. ދެން އެ އިޝާރާތް ކުރެއްވި ގޮތަށް ސަލާމް ދިނުމާ ހަމައަށް ބަހައްޓަވާ ކަމަށް.  

ކޮންމެއަކަސް މި ދެ ގޮތަށް ވެސް އެބަހުރި މި މައްސަލައިގައި ރިވާޔަތްތައް އައިސްފައި. އެހެންވީމާ އިނގިލި ތަޅުވަން ބޭނުން މީހަކު ތެޅުވުމަކުން އެއީކީ އެއްވެސް މައްސަލައެއް އޮތް ކަމެއް ނޫން. އަދި އެ މީހަކަށް އެ ކަމުގައި އިންކާރެއް ވެސް ނުކުރެވޭނެ. އަދި އިނގިލި ތަޅުވަން ބޭނުންނުވާ މީހަކު ނުތެޅުވުމަކުން އެ މީހަކަށް ވެސް އެ ކަމުގައި އިންކާރެއް ނުކުރެވޭނެ. ދެ ގޮތަކީ ވެސް އެއީ ސުންނަތުން އައިސްފައިވާ ގޮތްތައް ކަމަށް ވާތީ، އެ ކަމަށް އަޅުގަނޑުމެން ޖެހޭނީ އިޙުތިރާމުކޮށް ޤަބޫލުކުރަން. ވަﷲ އަޢުލަމް.

- ޑރ. މުޙައްމަދު އިޔާޟް ޢަބްދުއްލަޠީފް