އިންޑިއާ ސަރުކާރުން ރާއްޖެއަށް ދޫކުރާ އަސާސީ މުދަލުގެ ކޯޓާގެ މިންވަރު ބޮޑުކޮށް، 2023 އަދި 2024 ވަނަ އަހަރަށް ކޯޓާ ދޭ މުއްދަތު އިތުރުކޮށްފިއެވެ. މިއީ 1989 ވަނަ އަހަރު ކޯޓާ ދޭން ފެށި ފަހުން އެންމެ ބޮޑު އަދަދަކަށް ކޯޓާ ދެވުނު ފަހަރުކަމަށް އިންޑިއާ ސަރުކާރުން ވަނީ ހާމަކޮށްފައެވެ.

އިންޑިއާ ސަރުކާރުގެ ވިޔަފާރިއާ ބެހޭ ވުޒާރާއިން ގެޒެޓުގައި ޝާއިޢުކުރި ނޯޓިފިކޭޝަނުގައިވާ ގޮތުން، ފިޔާ، ބިސް، އަލުވި، ހަކުރު، ހަނޑޫ އަދި ފުށުގެ ކޯޓާ ވަނީ 5 ޕަސެންޓް އިތުރުކޮށްފައެވެ. އަދި މުގުގެ ކޯޓާ ވަނީ 56 ޕަސެންޓަށް އިތުރުކޮށްފައެވެ. މީގެ އިތުރުން އިމާރާތްކުރުމުގެ ސިނާޢަތަށް ބޭނުންވާ ހިލައާއި ހިލަވެލީގެ ކޯޓާވެސް ވަނީ 30 ޕަސެންޓް އިތުރުކޮށްފައެވެ.

އިންޑިއާއިން ރާއްޖެއަށް ދޫކުރާ އަސާސީ މުދަލުގެ ކޯޓާގެ ތެރޭގައި 448,913,750 ބިސް، 22,589 ޓަނުގެ އަލުވި، 37,537 ޓަނުގެ ފިޔާ، 130,429 ޓަނުގެ ހަނޑޫ، 114,621 ޓަނުގެ ފުށް، 67,719 ޓަނުގެ ހަކުރު، 350 ޓަނުގެ މުގު އަދި 1,300,000 ޓަނުގެ ހިލައާއި ހިލަވެލި ހިމެނެއެވެ.

އިންޑިއާ ސަރުކާރުން ފާހަގަކުރި ގޮތުގައި، މީގެ ކުރިން އެ ޤައުމުން ހަނޑޫ، ހަކުރު އަދި ފިޔާ ބޭރުކުރުން ހުއްޓާލި ނަމަވެސް، ރާއްޖެއަށް ޚާއްސަ ކޯޓާގެ ދަށުން މި ބާވަތްތައް ފޯރުކޮށްދެމުން ގެންދިޔައެވެ. އަދި މިހާރުވެސް މި އުސޫލުން ކުރިއަށް ގެންދާނެ ކަމަށް އިންޑިއާ ސަރުކާރުން ވަނީ ހާމަކޮށްފައެވެ.

އިންޑިއާއިން މި ނިންމުން ނިންމާފައިވަނީ އެ ޤައުމުގެ "ނެއިބަރހުޑް ފަސްޓް ޕޮލިސީ"ގެ ދަށުން ކަމަށާއި، ރާއްޖޭގެ އިންސާނީ ތަރައްޤީއަށް އަބަދުވެސް އިސްކަމެއް ދޭކަން އިންޑިއާ ސަރުކާރުން ވަނީ ފާހަގަކޮށްފައެވެ.