ސަލްޓަންޕާކް އަލުން ތަރައްގީކުރުމުގެ މަޝްރޫޢުގައި ހުރިހާ އުމުރުފުރައެއްގެ މީހުންނަށް ބޭނުންކުރެވޭނެ ވަސީލަތްތަކާއި، އެއްގަހުން އަނެއް ގަހަށް ދެވޭގޮތަށް ޚާއްސަ އެޑްވެންޗަރ ޒޯނެއް ހިމެނޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވެފައިވަނީ "ރައްޔިތުންނާ އެކު" ސިލްސިލާ ޕޮޑްކާސްޓްގެ ދެވަނަ އެޕިސޯޑްގައި ވާހަކަފުޅު ދައްކަވަމުންނެވެ. މި ޕޮޑްކާސްޓަކީ ރައްޔިތުންނާ ގާތުން މަޢުލޫމާތު ޙިއްޞާކުރެއްވުމަށާއި، ރައްޔިތުންގެ ކަންބޮޑުވުންތަކަށް އަޑުއެއްސެވުމަށް ކުރިއަށްގެންދަވާ ޕޮޑްކާސްޓެކެވެ.

"ސަލްޓަންޕާކަކީ ގިނަ ގަސްތަކެއް ހުންނަ ތަނަކަށްވާތީ، އެއްގަހުން އަނެއް ގަހަށް ދެވޭގޮތަށް މަތީގައި އެކިކަހަލަ ހަރަކާތްތައް ހިމަނައިގެން ތަރައްގީކުރަން ވަނީ ނިންމާފައި،" ރައީސް މުޢިއްޒު ވިދާޅުވިއެވެ. އަދި މި ޕާކުގައި ކުޑަކުދިންނާއި، ޒުވާނުންނާއި، ބޮޑެތި މީހުންނަށް ބޭނުންކުރެވޭނެ ވަސީލަތްތައް ހިމެނޭނެ ކަމަށްވެސް ވިދާޅުވިއެވެ.

ރައީސް އިތުރަށް ވިދާޅުވި ގޮތުގައި، ބިންމަތީ ލެވެލްގެ އިތުރުން މަތީގައި ކުޑަ ޕާކެއް ހިމެނޭނެއެވެ. މިއީ މާލޭގައި ހަލާކުވެފައިވާ ޕާކުތައް އާރާސްތުކޮށް، އައު ޕާކުތައް ތަރައްގީކުރުމުގެ މަޝްރޫޢުގެ ތެރެއިން ކުރިއަށްގެންދާ މަސައްކަތެކެވެ.

ޕާކުތައް ތަރައްގީކުރުމުގެ މަޤްޞަދަކީ ރައްޔިތުންގެ ޞިއްޙަތު ރަނގަޅުކުރުމާއި، ޢާއިލާތަކަށް އެކުގައި ވަގުތު ހޭދަކުރެވޭނެ ތަންތަން އިތުރުކުރުން ކަމަށް ރައީސް ފާހަގަކުރެއްވިއެވެ. މީގެ އިތުރުން، ކަސްރަތުކުރުމާއި ކުޅިވަރު ކުޅުމަށް ޚާއްސަ ސަރަޙައްދުތައްވެސް މި ޕާކުގައި ހިމެނޭނެއެވެ.