އެއްވެސް ކަމަކާއި ދެރަވެ ކަރުނައަޅައި ﷲ ތަޢާލާގެ ޙަޟްރަތަށް ދުޢާކޮށްފިނަމަ އެކަމެއް ހިންމަވައި ދެއްވަވާނެތެވެ. އިން ޝާ ﷲ. މިއީ ގިނަ ބައެއްގެ ތަޖުރިބާއިން ޔަޤީންކުރެވޭ ކަމެކެވެ. ﷲ ތަޢާލާ އެންމެ ބޮޑަށް ރުހިވޮޑިގަންނަވާ އެއްކަމަކީ ފާފަކުރެވޭތީ ކަންބޮޑުވެ ހުއްޓާލަން މަސައްކަތްކުރުމެވެ. ވީމާ އެކަމަށް މާފަސޭހައިން މަގުފަހިކޮށްދެއްވަވާނެ ޏޫން ހެއްޔެވެ؟

މީސްތަކުންނޭވެ! ފާފަ ކުރެވޭނެއެވެ. ހުއްޓައިލި ނަމަވެސް ފާފައެއް ކުރެވިދާނެއެވެ. ވީމާ އަހަރެމެންނަށް އޮތީ ފާފައެއް ކުރެވުމާއިއެކު އެކަމަށް ދެރަވެ އަވަހަށް ތައުބާވުމެވެ. ކުރެވުނު ފާފަ ފުއްސަވައި ދެއްވެވުން އެދި ރޮއި ކަރުނައަޅައި އާދޭސް ދެންނެވުމެވެ.

ތަޖުރިބާއަށް ބަލައި ބުނެވެން އޮތީ ކުރެވުނު ފާފައާއިމެދު ދެރަވެ ހިތާމަކޮށް އެންމެފަހަރަކުވެސް ކަރުނަ އެޅިއްޖެނަމަ އެމީހަކަށް އިތުރަށް ފާފަ ނުކޮށް ހުންނަން ހިތްވަރު ލިބޭ ކަމަށެވެ. އިން ޝާ ﷲ ދެރަވެ ކަރުނަ އެޅޭނީ ހަމަ ޙަޤީޤަތުގައިވެސް ހިތުގެ އެންމެ އަޑިން ހިތާމަކުރެވިގެންނެވެ. އެކަން ކުރެވޭތޯ ހިތްވަރުކުރާށެވެ! ފާފަކުރުމުން ސަލާމަތްވެވޭނެއެވެ. އިން ޝާ ﷲ

ގިނަގިނައިން، އަވަސް އަވަހަށް ފާފަ ކުރެވޭ މީހަކަށް ފާފަ ކުރެވުމުގެ ދޭތެރެ ދުރުކުރެވުނު ނަމަވެސް އެއީ ވަރަށް ބޮޑު ރަޙްމަތެކެވެ. މިސާލަކަށް ކޮންމެ ދުވަހަކު ފާފަކުރެވޭ މީހަކަށް ހަފްތާއަކު އެއްފަހަރަށް ލަސްކުރެވުނު ނަމަވެސް، އެއީ ލެއްވެވި ރަޙްމަތެކެވެ. ކޮންމެ ހަފްތާ ބަންދެއްގައި ފާފަކުރެވޭ މީހަކަށް 3، 4 ހަފްތާއަށް ލަސްކުރެވުނު ނަމަވެސް އެވެސް ހަމަ ވަރަށް ބޮޑު ކުރިއެރުމެކެވެ.

އެކަންކަން އެގޮތަށް މެދުވެރިއެވަނީ ﷲ ތަޢާލާގެ ރަޙްމަތްފުޅުންނެވެ. އެހިސާބުން އޮންނާނީ އެމީހެއްގެ ކިބައިގައި ހިތްވަރުހުރިވަރެކެވެ. ހަމަ ކުޑަކުޑަ ހިތްވަރެއް އިތުރަށް ލައިފިނަމަ ފާފަކުރެވުން އެކުގައި ހުއްޓައިލެވޭނެއެވެ.

--އިސްލާމީ ތިލަފަތުގެ ދަރުސަކުން