20 ރަށެއްގައި ފެނާއި ނަރުދަމާ ޤާއިމުކުރުމުގެ މަސައްކަތް މި އަހަރުގެ ތެރޭގައި ފެށުމަށް ތައްޔާރުވެފައިވާ ކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) އިން މިއަދު ހާމަކޮށްފިއެވެ.

އެމްޑަބްލިޔުއެސްސީގެ މެނޭޖިންގ ޑިރެކްޓަރ ޢަބްދުލް މަޠީން މުޙައްމަދު ވިދާޅުވި ގޮތުގައި މި މަޝްރޫޢުތަކުގެ ތެރެއިން ބައެއް މަޝްރޫޢުތަކުގެ ޢަމަލީ މަސައްކަތް މިހާރު ވަނީ ފެށިފައެވެ. އަދި އަނެއްބައި މަޝްރޫޢުތައް މިވަގުތު ވަނީ ޑިޒައިން މަރުހަލާގައެވެ.

"ޚަރަދު ކުޑަ ކުރުމުގެ ގޮތުން ސަރުކާރުން ކަނޑައަޅުއްވާފައިވަނީ ކޮމާރޝަލް ކޮންޓްރެކްޓާއަކާ ހަވާލުނުކޮށް، ސަރުކާރު ކުންފުނިތަކުން ކުރިއަށްގެންދާ ގޮތަށް. އޭރުން އަސްލު އެންމެ ޚަރަދު ކުޑަވަނީ،" މަޠީން ވިދާޅުވިއެވެ.

މަޠީން އިތުރަށް ފާހަގަކުރެއްވި ގޮތުގައި މިހާރު މަސައްކަތް ފެށިފައިވާ ހުރިހާ މަޝްރޫޢުތަކެއް މި އަހަރުގެ ތެރޭގައި ނިންމުމަށް ވަނީ އަމާޒު ހިފާފައެވެ. އަދި މިވަގުތު ޑިޒައިން މަރުހަލާގައި ހުރި މަޝްރޫޢުތައް އަންނަ އަހަރުގެ މެދުތެރޭގައި ނިންމުމަށް ވަނީ ރޭވިފައެވެ.

އަދި މަޠީން ފާހަގަކުރެއްވި ގޮތުގައި އައު ސަރުކާރާ ހަވާލުވިއިރު ގިނަ މަޝްރޫޢުތަކެއް ވަނީ ފައިސާ ހަމަނުޖެހިގެން ހުއްޓިފައެވެ. ނަމަވެސް މިހާރު އެ މައްސަލަތަކަށް ހައްލު ހޯދައި، މަޝްރޫޢުތައް ކުރިއަށް ގެންދިއުމަށް ވަނީ މަގުފަހިވެފައެވެ.