ޢުމްރާ ނިންމައި މިއަދު ރާއްޖެއަށް އަންނަން ޖިއްދާ އެއާޕޯޓަށް މިއަދު ދިއަ 2 ދިވެހިންނަށް ފުރޭނެ ގޮތްނުވެ އެޢާޕޯޓުގައި ތާށިވުމުން ޖިއްދާގައި ހުންނަ ރާއްޖޭގެ ކޮންސިޔުލޭޓް އޮފީހުން އެހީތެރިކަން ފޯރުކޮށްދީފިއެވެ. މައުލޫމާތު ލިބިފައިވާ ގޮތުގައި މިއީ ޢުމުރުން ދުވަސްވީ ދެމަފިރިންނެވެ.

ޢާއިލާއިން މައުލޫމާތު ލިބުނު ގޮތުގައި ނުފުރުނީ އެއާޕޯޓްގައި ބާރުބޮޑުވެ މީހުން ގަދަދައްކައި އަދި ކިޔޫގެ ފަހަތަށް ފޮނުވަމުން ގެންދިއުމުން ފަލައިޓަށް ނޭރި ތިއްބައި ފްލައިޓް ކްލޯޒްކުރުމުންނެވެ. 

ޖިއްދާގައި ހުންނަ ދިވަހި ކޮންސިޔުލޭޓް އޮފީހުގެ އޮފިޝަލަކު މިއަދުނޫހަށް މަޢުލޫމާތު ދެއްވަމުން ވިދާޅުވީ ބައަކަށް ނުފުރިފައި ތިބިކަން ޢާއިލާއިން އެންގުމުން ގޮސް އެއާޕޯޓުން ނެރެން ކުރަންކުރަންޖެހޭ ކަންކަން ފުރިހަމަކޮށް ނެރެގެން ގެންގޮސް މިހާރު ހޮޓަލެއްގައި ބައިތިއްބައި އެމީހުންގެ ކެއުމުގެ ކަންކަން ހަމަޖައްސައިދީފައިވާ ކަމަށެވެ. 

"ދެރަކަމަކީ އެމީހުންނަށް ފުރުނުކަން ނުވަތަ ނުފުރޭކަން ގްރޫޕުން ބަލައިނުލީމަ. ނުފުރުނުކަން އެނގުމުންވެސް އެހީތެރިކަން ނުލިބުނީމަ. މިއީ ސަފާ ގްރޫޕުން ޒިންމާ އުފުލަންޖެހޭނެ ކަމެއް ކަމަށް އަޅުގަނޑުމެން ދެކެނީ." 

"ހުރިހާ ކަމެއް ނިންމިފަހުން ދެންމެ ސަފާ ގްރޫޕުން ގުޅި. ދާދި ދެންމެޢާއި ހަމައަށް ގްރޫޕަކުން ނުގުޅާ. އަޅުގަނޑުމެންގެ ހޮޓްލައިން ނަންބަރާ ހުރިހާ މައުލޫމާތެއް ހުރިހާ ގްރޫޕްތަކަށްވެސް އެނގޭނެ." 

"އަޅުގަނޑުމެން މިތިބީ ކޮންމެ ކަމަކަށްވެސް އެހީތެރިވެދޭން ތައްޔާރަށް. ހުރިހާ ފަރާތަކުންވެސް އަޅުގަނޑުމެންނަށް ގުޅުއްވަންވީ.  އަޅުގަނޑުމެންގެ ހޮޓްލައިން ނަންބަރަކީ: 966530838329  +  Hotline ) Maldives Consulate in Jeddah)

ސަރުކާރުން ކޮށްދެވެންހުރި ހުރިހާ ކަމެއް ކޮށްދޭނަން. ދިވެހި ރައްޔިތަކު ޙާލުގަ ޖެހި ނިކަމެތިވާކަށް ދޫކޮށެއް ނުލާނަން. މިރޭވެސް އެހީތެރި މިވީ އެއްވެސް ބަހެއްވެސް ނޭނގޭ ބައަކަށް. އެމީހުންނަށް އެޢާޕޯޓްގަ ތިބެންޖެހުނު ނަމަ އެމީހުންގެ ޙާލަކީ ކޮބައިތޯ؟" އޮފިޝަލް ވިދާޅުވިއެވެ. 

ޢާއިލާއިން މަޢުލޫމާތު ދިން ގޮތުގައި ގްރޫޕުގެ ފަރާތުން މިހާރުވަނީ 7 ވަނަ ދުވަހު ދެމަފިރިންނަށް ޜާއްޖެއަށް އާދެވޭނެ ގޮތަށް ޓިކެޓް ހަމަޖައްސައިދީފައެވެ. 

ސަޢުދީގެ އެއާޕޯޓްތައް ފުރިބާރުވެ ކޮންޓްރޯލްގެއްލިފައިވާ މިފަދަ ދުވަސްވަރެއްގައި ގްރޫޕްތަކުން މިފަދަ ކަންކަމަށް ޒިންމާދާރުވުން އިތުރުކުރަން ޖެހޭކަން ފާހަގަކުރެވެއެވެ. 

މިފަދަ ޙާލަތެއް ދިމާވިނަމަވެސް ކޮންސިޔުލޭޓްގެ އެހީތެރިކަން ހޯދައިގެން ނަމަވެސް އެބައަކު އެއާޕޯޓުން ނެރެ ގްރޫޕުން އެބައަކާއި ޙަވާލުވާނަމަ މައްސަލަތައް ޙައްލުކުރަން ފަސޭހަވެ އަދި ޙާލުގައި ޖެހޭ މީހުންނަށްވެސް ލުއިފަސޭހަތަކެއް ލިބިގެންދާނެއެވެ.