ހުޅުމާލޭ ހިޔާ ފްލެޓުތަކުގެ ތެރެއިން އަލަށް ލިފްޓު ހަރުކުރި ފުރަތަމަ ހަތަރު ޓަވަރުގެ 8 ލިފްޓު އަންނަ މަހުގެ ފުރަތަމަ ހަފްތާގައި އޮޕަރޭޝަނަށް ގެނެވޭނެކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހާމަކޮށްފިއެވެ.

އެޗްޑީސީން މަޢުލޫމާތު ދެއްވިގޮތުގައި މިހާތަނަށް ފުރަތަމަ ތިން ޓަވަރުގެ މަސައްކަތް ވަނީ ނިމި، މިވަގުތު ޓެސްޓް ކުރުމުގެ މަރުހަލާ ކުރިއަށްދެއެވެ. އަދި ހަތަރުވަނަ ޓަވަރުގެ މަސައްކަތްވެސް އަވަހަށް ނިމޭނެކަމަށް އެ ކުންފުނިން ބުނެފައިވެއެވެ.

މި މަޝްރޫޢަކީ ރައީސް ޑރ. މުޙައްމަދު މުޢިއްޒުގެ ވަޢުދެއްގެ ގޮތުގައި ހިމެނޭ މަޝްރޫޢެކެވެ. މި މަޝްރޫޢުގެ ދަށުން 16 ޓަވަރުގައި ޖުމްލަ 32 ލިފްޓް ހަރުކުރެވޭނެއެވެ. މި މަސައްކަތް ފެށިފައިވަނީ 2023 ވަނަ އަހަރުގެ އޭޕްރިލް މަހުގައެވެ. އަދި ބާކީ ހުރި ޓަވަރުތަކުގެ މަސައްކަތްވެސް ކަނޑައެޅިފައިވާ ތާވަލާ އެއްގޮތަށް ކުރިއަށްދާކަމަށް އެޗްޑީސީން ބުނެފައިވެއެވެ.

ޗައިނާގެ ޝެންޔަންގް ޔުއާން އިންޓެލެކްޗުއަލް ގްރޫޕުން ހަރުކުރާ މި ލިފްޓުތަކަކީ ބަލިމީހުން އުފުލުމުގެ އިންތިޒާމާއެކު، ސްޓްރެޗަރ އެރުވޭގޮތަށް ފަރުމާކުރެވިފައިވާ ލިފްޓުތަކެކެވެ. މި ލިފްޓުތަކުގައި އެއްފަހަރާ 14 މީހުންނަށް ދަތުރުކުރެވޭނެއެވެ.

އެޗްޑީސީން ފާހަގަކުރިގޮތުގައި މި ލިފްޓުތައް ހަރުކުރުމުން ކޮންމެ ޓަވަރެއްގައި ދިރިއުޅޭ 2000 އާ ގާތްކުރާ އާބާދީއަށް ލިފްޓަށް އެރުމަށް ކިއުގައި މަޑުކުރަންޖެހޭ ވަގުތު ކުރުވެގެންދާނެއެވެ. މިއީ ހިޔާ ފްލެޓުތަކުގައި ދިރިއުޅޭ ރައްޔިތުންނަށް ލިބިގެންދާނެ ވަރަށް ބޮޑު ލުޔެކެވެ.