ކުރިއަށް އޮތްތަނުގަ އެންމެ ބޮޑު އިސްކަމެއް ދެއްވާނީ ފުލުހުންގެ ތަހުގީގުތައް އަވަސްކުރުމަށް ކަމަށް ދާޚިލީ ސަލާމަތާ ފަންނިއްޔާތާ ބެހޭ ވަޒީރު އަލީ އިޙުސާން ވިދާޅުވެއްޖެއެވެ.

ފުލުހުންގެ ޚިދުމަތުގެ ފެންވަރު ރަނގަޅު ކުރުމަށްޓަކައި ކުރަމުންދާ މަސައްކަތްތަކާ ގުޅޭގޮތުން ދައުލަތުގެ މީޑިއާގައި ވާހަކަ ދައްކަވަމުން ވަޒީރު ވިދާޅުވީ ފުލުހުންގެ ޚިދުމަތް ރާއްޖޭގެ އެކިކަންކޮޅުތަކަށް ފޯރުކޮށްދިނުމަށްޓަކައި މިހާރުވެސް ގިނަ މަސައްކަތްތަކެއް ކުރައްވަމުންގެންދަވާ ކަމަށެވެ.

ވަޒީރު ވިދާޅުވީ މިހާރުވެސް ގާތްގަނޑަކަށް 100އަށް ވުރެ ގިނަ ޕޮލިސް ސްޓޭޝަންތަކެއްގެ މަސައްކަތް މިވަގުތުވެސް ކުރިއަށްދާ ކަމަށާއި އެގޮތުން މަސައްކަތްތައް އެވޯޑްކުރެވި މަސައްކަތްތައް ފެށުމުގެ އެންމެ ފަހުގެ މަރުހަލާގެ މަސައްކަތް މިހާރުވެސް ކުރިއަށްދާ ކަމަށެވެ.

"ފުލުހުން އެކި ހިސާބުތަކުގައި ގާއިމްވީމަ ރައްޔިތުންނަށް ލިބޭނެ އެންމެ ބޮޑު ފަސޭހައަކީ ފުލުހުންގެ ޚިދުމަތް ރައްޔިތުންނާ ގާތުން އަވަހަށް ލިބުން. ތަހުގީގުތަކަށް އެދޭއިރު ނުވަތަ މައްސަލަތައް ހުށަހަޅާއިރުގަ ފަސޭހަކަމާއެކީ ހުށަހެޅުން. އަޅުގަނޑުމެން ކުރިއަށް އޮތްތަނުގަ އެންމެ ބޮޑު ފޯކަސްއެއް ކުރާނެ އެއް ދިމާލަކީ ތަހުގީގްތައް އަވަސްކުރުން. ފުނި ޖެހިފަ ހުރި މައްސަލަތައް އެބަހުރި. ތަހުގީގީ މަރުހަލާގައިވެސް އެބަހުރި. މި މައްސަލަތައް އަވަސްކޮށް ފުލުހުންގެ ތަހުގީގްގެ ކެޕޭސިޓީ އާއި ފުލުހުންގެ ތަހުގީގު ކުރާ ފެންވަރު ރަނގަޅު ކުރުން. މިއީ މިހާރު ކުރަމުންދެ އެންމެ ބޮޑު އެއް މަސައްކަތް" ވަޒީރު ވިދާޅުވިއެވެ.

ވަޒީރު ވިދާޅުވީ ފުލުހުންގެ ތަހުގީގުތައް އަވަސްވުމުން ރައްޔިތުން އެންމެ އެދޭ ޚިދުމަތެއް ދެވިގެންދާނެ ކަމުގެ ޔަގީންކަން އެބައޮތް ކަމަށެވެ.

ވަޒީރު ވިދާޅުވީ ގިނަ އަދަދެއްގެ ފުލުހުން މަގުތަކަށް ނެރެ، މަގުމަތީގެ އަމާންކަމާއި، ރައްކާތެރިކަން ޤާއިމުކުރުމުގެ މަސައްކަތްވެސް ހަރުދަނާކުރައްވަނެ ކަމަށެވެ.

އަދި ގިނަ ފުލުހުން ޤާއިމުގެ ޚިދުމަތް ދިނުމަށް ދަތިވާ ތަންތަނުގައިވެސް، ޑިޖިޓަލް ސިސްޓަމްގެތެރެއިން ފުލުހުންގެ ޚިދުމަތްތައް ގުޅާލާނެ ކަމަށް ވަޒީރު ވިދާޅުވިއެވެ.

ހަބަރު: ސަރުކާރު