ރާއްޖޭގެ އެކި ކަންކޮޅުތަކުގައި 1400 އަށްވުރެ ގިނަ މީހުން މިވަގުތު ޤުރުއާން ހިތުދަސްކުރަމުންދާކަމަށް އިސްލާމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު މިއަދު ވިދާޅުވެއްޖެއެވެ. މިއީ ރާއްޖޭގައި ދީނީ ޢިލްމު އުނގެނުމަށް ކުރަމުންދާ މަސައްކަތްތަކުގެ ކާމިޔާބީއެއް ކަމުގައިވެސް ވަޒީރު ފާހަގަކުރެއްވިއެވެ.

އިސްލާމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް ޢަލީ ސައީދު އިތުރަށް ވިދާޅުވީ، ޤުރުއާން ހިތުދަސްކޮށްދޭ 20 މަރުކަޒެއްގައި މިވަގުތު 1434 މީހުން ޤުރުއާން ހިތުދަސްކުރަމުންދާކަމަށެވެ. މި ޢަދަދުގެ ތެރޭގައި ހިމެނެނީ 783 އަންހެނުންނާއި 651 ފިރިހެނުންކަމަށްވެސް ވަޒީރުގެ ތަފާސްހިސާބުތަކުން ދައްކައެވެ.

ޤުރުއާން ހިތުދަސްކުރާ އެންމެ ގިނަ އަދަދެއްގެ ބަޔަކު ކިޔަވަމުން އަންނަނީ ޤުރުއާނާ ބެހޭ މަރުކަޒުގެ މާލެ އަދި ހުޅުމާލެ ގޮފީގައެވެ. އެގޮތުން މާލެ ގޮފީގައި މިވަގުތު 424 މީހުން ޤުރުއާން ހިތުދަސްކުރަމުންދާއިރު، ހުޅުމާލޭ ގޮފީގައި 155 މީހުން ދަނީ ޤުރުއާން ހިތުދަސްކުރަމުންނެވެ. އަދި ތިންވަނައަށް އެންމެ ގިނަ މީހުން ކިޔަވަމުން އަންނަނީ ޢިލްމު އިންސްޓިޓިއުޓް އޮފް އިސްލާމިކް ސްޓަޑީޒްގައެވެ. އެއީ 127 މީހުންނެވެ. މީގެ އިތުރުން 80 މީހުން ދަނީ އެހެން މަރުކަޒެއްގައި ޤުރުއާން ހިތުދަސްކުރަމުންނެވެ.

ދެވަނައަށް އެންމެ ގިނަ އަދަދަކަށް މީހުން ޤުރުއާން ހިތުދަސްކުރަމުން އަންނަނީ ދެކުނުގެ ގަމުގައިވާ ޏ. ފުވައްމަލަކުގައި ހިންގާ ކީރިތި ޤުރުއާނާއި ބެހޭ މަރުކަޒުގައެވެ. އެތަނުގައި މިވަގުތު 67 މީހުން ދަނީ ޤުރުއާން ހިތުދަސްކުރަމުންނެވެ.

ކީރިތި ޤުރުއާނާއި ބެހޭ މަރުކަޒުގެ އެންމެ ފަހުގެ ތަފާސްހިސާބުތަކަށް ބަލާއިރު މިވަގުތު ރާއްޖޭގައި 266 ހާފިޒުން އެބަތިއްބެވެ.