އާރޓިކަލްކިޔުމަށް ހޭދަވާނެކަމަށް ބެލެވެނީ : 1 މިނެޓް, 45 ސިކުންތު
ﷲ ތަޢާލާގެ ޙަޟްރަތުގައި އެންމެ މަތިވެރިކަން ބޮޑު މީހަކީ ތަޤްވާވެރިކަމުގައި އެންމެ ކުރިއަރާފައިވާ މީހާއެވެ. އެހެންކަމުން އެމިހަކީ ކާކުތޯ ބަލަން ގިނަ ބައަކު މަސައްކަތްކުރެއެވެ. ވީމާ ތަޤްވާވެރިކަމުގެ މާނައަށް ބަލައިލަމާ ހެއްޔެވެ؟
ތަޤްވާވެރިކަމުގެ ފުރަތަމަ މާނައަކީ ﷲ ތަޢާލާއަށް ބިރުވެތިވުމެވެ. ގިނަ ބައަކު ނަގާނީ ވެސް މިމާނައެވެ. ހަމައެއާއިއެކު ﷲ ތަޢާލާ އާއިމެދު ކަންބޮޑުވުމަކީ ވެސް ހަމަ ތަޤްވާވެރިކަމެވެ. އަދި ﷲ ތައާލާ އާއިމެދު ކަންބޮޑުވުމުގެ މާނައަށް ބަލައިފިނަމަ ބިރުވެތިވުމުގެ މާނައަށްވުރެ ފުޅައުކަން މާބޮޑެވެ. މީގެ އިތުރުން ބައެއް ޢިލްމްވެރިން ތަޤްވާގެ މާނައެއް ކަމަށް ބަޔާން ކުރައްވަވަނީ ތިމާ އާއި ﷲ ތަޢާލާގެ ޢަޛާބާއި ދެމެދުގައި ލެވޭ ހުރަހެއްގެ ގޮތުގައެވެ. ހަމައެއާއިއެކު އަހަރެމެން މިކޔާ ޞާލިޙް ކަމަކީވެސް ތަޤްވާވެރިކަމުގެ މާނައިގައި ހިމެނޭ ސިފައެކެވެ.
މިހުރިހާ މާނަތަކަށް ބެލިނަމަވެސް ތަޤްވާވެރިކަން ޙާޞިލުކުރެވޭނީ ﷲ ތަޢާލާގެ އަމުރުފުޅުތަކަށް ފުރިހަމައަށް ކިޔަމަންތެރިވެގެންނެވެ. ކުރުމަށް އަމުރުކުރައްވާފައި ހުރި ހުރިހާ ކަންކަން ކުރުމާއިއެކު އެކަމަކާއި ދުރުހެލިވުމަށް އަމުރުފުޅު ކުރެއްވެވި އެންމެހައި ކަންކަމުން ދުރުހެލިވެގެންނެވެ. އެގޮތުގައި ސާބިތުވެ ހުންނަ މީހާގެ ތަޤްވާވެރިކަން ދާނީ އިތުރުވަމުންނެވެ.
ކޮންމެ މުސްލިމަކުވެސް އެންމެ ބޮޑަށް ބޭނުންވާނީ އެމީހާއަކީ ﷲ ތަޢާލާގެ ޙަޟްރަތުގައި އެންމެ މަތިވެރިކަން ބޮޑު މީހަކަށްވުމަށެވެ. އެކަން ޙާޞިލުކުރެވެން އޮތީ ތަޤްވާވެރިކަން އިތުރުކުރި ވަރަކުންނެވެ. ވީމާ ތަޤްވާވެރިކަމުގެ ފުރިހަމަ މާނަ ދަސްކުރަން އެބަޖެހެއެވެ. އަދި ތަޤްވާވެރިކަން އިތުރުވާނެ ގޮތްތަކަށް ޢަމަލުކުރަންވެސް އެނަޖެހެއެވެ.
- މުފްތީ މެންކުގެ ދަރުސަކުން
Advertisement
21 އޮގަސްޓް 2019