ބަންގި ގޮވުމުން މިސްކިތައް އަރައި ކުރީ ސަފުގައި ނަމާދުކުރުމަކީ ކުރަން އެންމެ ހެޔޮ ޢމަލެވެ. ނަމަވެސް އެވަރަކުން އަދި ނުފުދޭނެއެވެ. ފުރިހަމަ މުސްލިމަކަށްވުމަށްޓަކައި މީހާގެ އެހެން ޢަމަލުތައްވެސް ހަމަ އެމަގަށް ބައްޓަން ކުރަންވާނެއެވެ. މިޘާލަކަށް ބުނާނަމަ އެމީހާ ކުރާ މުޢާމަލާތުތައް ސީދާކުރަންޖެހޭނެއެވެ.  

މުޢާމަލާމް މާނަ މިކުރަނީ ހަމައެކަނި ފައިސާގެ މުޢާމަލާތަކަށް ނޫނެވެ. އެމީހެއްގެ އަނބިދަރިންގެ ޙައްޤުތައް އަދާކުރާ މިންވަރަށެވެ. މައިންބަފައިންނަށް އަޅާލައި އެހީތެރިވާ މިންވަރަށެވެ. ކުރާ ކޮންމެ ކަމެއްގައާއި ބުނާ ކޮންމެ ބަހެއްގައި ތެދުވެރިވާ މިންވަރަށެވެ.  

މިކަންކަން ފުރިހަމަނުކޮށް ހަމައެކަނި ނަމާދުކުރުމަކުން ނުފުދޭނެއެވެ. ﷲ ތަޢާލާގެ މަގުގައި ޖިހާދުކުރަން ނުކުންނަން އުޅުނު ޒުވާނާ ހުއްޓުވައި މައިންބަފައިންނަށް ޚިދުމަތް ކުރަން ފޮނުއްވެވީ އެހެންވެގެންނެވެ.  

ލޮބުވެތި ކަނބަލުންނޭވެ! ފިރިހެނަކު އައިސް ކައިވެންޏަށް އެދޭއިރު އޭނާއަކީ ތަޤްވާވެރިއެއްކަމަށް ބަޔާންކޮށްފިނަމަ އުފާކުރާށެވެ! ﷲ ތަޢާލާ އަންގަވާފައިވާ މަގުން އަޅުކަންކުރާނަމަ އެއީ ވަރަށް ރަނގަޅު، ހެޔޮލަފާވެސް މީހެކެވެ. އެހެނަސް އޭނާ އޭނާގެ މައިންބަފައިންނަށް، ޢާއިލާގެ އެހެން މީހުންނަށް ކަންކަންކުރާ ގޮތް ދެނެގަންނަންވާނެއެވެ. މައިންބަފައިންނަށާއި ޢާއިލާއަށް ޚިދުމަތްކުރުމުގައިވެސް އޭނާ ހުރީ ހަމަ އެންމެ ކުރީސަފުގައިކަމަށްވާނަމަ އެއޮތީ އިމްތިޙާނުން ފާސްވެފައެވެ. ނޫންނަމަ ފާސްވީކަމަށް ބަލައިގެން ލިބޭނީ ހިތްދަތިކަމެވެ.  

- ޝައިޚް ޢަލީ ޙައްމުދާގެ ދަރުސަކުން