ޤައުމުގެ އިޤްޠިޞޯދު ކުރީ ސަރުކާރުން ވައްތާލާފައިވާ އަނދަވަޅުން ސަލާމަތްކުރުމަށްޓަކައި މިސަރުކާރުން ޢަމަލުކުރަން ފެށި ފައިސާ ޗާޕްނުކުރުމުގެ ސިޔާސަތަށް ޢަމަލުކުރަމުންވެސް މަސްވެރިންނަށް ދަރާއޮންނަ ޢަދަދު މިސަރުކާރުން މިހާރުވެސް ވަރަށް ބޮޑުތަނުން ކުޑަކޮށްފި ކަމަށާއި ދަރަންޏެއް ނުބާއްވަން ގެންދަނީ ވަރަށް ގިނަ މަސައްކަތްތަކެއް ކުރަމުން ކަމަށް މަސައްކަތްކުރަމުން ކަމަށް އޭދަފުށީ ދާއިރާގެ މެންބަރު އަޙްމަދު ސަލީމް (ރެޑްވޭވް ސަލީމް) ވިދާޅުވެއްޖެއެވެ. 

އަޙްމަދު ސަލީމް މިމޭރުމުން ވިދާޅުވީ ވެރިކަން ނިމެން އައިއިރު 2 މަސްވަންދެން މަސްވެރިންނަށް އެއްވެސް ފައިސާ އެއްނުދީ ދަރަނި 300 މިލިއަނަށް އަރުވައިލި އެމްޑީޕީގެ މެންބަރުން އެއިރު އެކަމަށް އެއްވެސް ކަމެއް ނުކޮށް މަސްވެރިން ބިކަޙާލުގައި ޖައްސުވަން ދޫކޮށްލައިގެން ތިބެފައި މިސަރުކާރު ވެރިކަމާއި ޙަވާލުވެ އެދަރަނި އަދާކޮށް އަދި މަސްވެރިންނަށް ދައްކަންޖެހޭ ފައިށާގެ ޢަދަދު 300 މިލިއަން ރުފިޔާއިން އެންމެ 50 މިލިއަނަށް މަދުކޮށްފައިވަނިކޮށް މަޖިލީހަށް މިއަދު ހުށަހެޅި ޤަރާރަށް ވާހަކަފުޅުދައްކަވަމުންނެވެ. 

އަޙްމަދު ސަލީމް ވިދާޅުވީ މަސްވެރިންނަށް ދޭންޖެހޭ ފައިސާ ޤަވާއިދުން ނުދިނުމުގެ މައްސަލައަކީ ކުރީގެ އެއްވެސް ސަރުކާރަކަށް ހައްލުނުކުރެވި އޮތް މައްސަލައެއް ކަމަށާއި ނަމަވެސް މި ސަރުކާރުން އެ ހާލަތު ބަދަލުކުރުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. 

"ކުރީ ސަރުކާރުން ފަސް އަހަރު ދުވަހުގެ ތެރޭގައި ފައިސާ ޗާޕުކޮށްގެންވެސް މަސްވެރިންނަށް ދޭން ޖެހޭ ފައިސާ އޮތީ މަސްވެރިންނަށް ދަރާ! މީގެ ކުރިން އަބަދުވެސް މަސްވެރިންނަށް ދޭން އޮންނާނެ 200 މިލިއަން 300 މިލިއަން ރުފިޔާ. އެހެން ނަމަވެސް މި ސަރުކާރުން މިހާލަތުގައިވެސް މަސްވެރިންނަށް މިއޮތީ އެންމެ 50 އަކަށް މިލިއަން ރުފިޔާ ދޭން. ލާރި ނެތި، ފައިސާ ޗާޕުނުކޮށް، އެ ހާލަތުގައި އޮވެފަ 50 މިލިއަނަށް މި ދަށްކުރީ" 

ރިޔާސީ އިންތިޚާބުގެ ކެންޕޭނުގައާއި އެއިގެ ފަހުންވެސް މިސަރުކާރުން މަސްވެރިންނަށް ވެފައިވާ ވައުދުތައް މި 5 އަހަރު ދުވަހުގެ ތެރޭގައި ފުއްދަވާނެ ކަމުގެ ޔަޤީންކަން އެބައޮތް ކަމަށްވެސް އަޙްމަތު ސަލީމް ވިދާޅުވިއެވެ.