މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށްޓަކައި ބޭނުންވާ ޕައިލެޓް ބޯޓާއި ޓަގް ބޯޓު މިއަދު ކުޅުދުއްފުށި ޕޯޓަށް ގެންގޮސްފިއެވެ.

ކުޅުދުއްފުށި ޕޯޓަށް މި ދެ އުޅަނދު ގެންދިއުމުން ވޯޓާ ސެލިއުޓެއް ދީފައިވާ ކަމަށް އެމްޕީއެލްއިން ބުނެއެވެ. އަދި ދެ އުޅަނދުގައި ތިބި ކެޕްޓަނުންނާއި ފަޅުވެރިންނަށް މަރުހަބާ ކިޔާފައިވަނީ އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް އާއި މެނޭޖްމަންޓުގެ ބައެއް ބޭފުޅުން ކަމަށްވެސް އެމްޕީއެލްއިން މައުލޫމާތު ދެއެވެ.

އެމްޕީއެލްއިން ބުނާ ގޮތުގައި މި މަހުގެ 20 ވަނަ ދުވަހު ބަންކަރިންގ ޚިދުމަތް ފެށުމަށް މިހާރު ދަނީ ތައްޔާރުވަމުންނެވެ. އަދި މި ޚިދުމަތް ފެށުމަށް ބޭނުންވާ އޮފީސް ޖާގަތައް ހެދުމުގެ މަސައްކަތްވެސް މި މަހުގެ 15 ވަނަ ދުވަހު ނިމޭނެ ކަމަށް އެމްޕީއެލްއިން ބުނެއެވެ.

މިކަމާ ގުޅޭ ގޮތުން އެމްޕީއެލްގެ ސީއީއޯ ވަޖީހު ވިދާޅުވީ ބަންކަރިންގެ ޚިދުމަތް ދިނުމަށް އެމްޕީއެލްއިން އޮތީ ފުރިހަމައަށް ތައްޔާރުވެފައި ކަމަށެވެ. އަދި މިއީ ރާއްޖޭގެ އިޤްތިސާދަށް މުހިންމު ޚިދުމަތަކަށްވާތީ އެމްޕީއެލްއިން މިކަން ބަލަނީ ޤައުމީކަމެއްގެ ގޮތުގައި ކަމަށްވެސް ވަޖީހު ވިދާޅުވިއެވެ.

އުތުރުގައި އިންޓަރނޭޝަނަލް ބަންކަރިންގ ޚިދުމަތް ފެށުމަށް ބޭނުންވާ ޕައިލެޓް ބޯޓާއި ޓަގް ބޯޓް ވަނީ ކުޅުދުއްފުށި ޕޯޓަށް މިއަދު ގެނެސްފައި. #MaldivesPortsLimited #MPL #portmv pic.twitter.com/vqkHfl29XZ

— Maldives Ports Limited (@Portmv) August 2, 2024