ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވެރިކަމުގައި ރާއްޖެއަށް ޑަބަލް ތަރައްޤީ ގެނެސްދެއްވާނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.

ޕީއެންސީގެ ހަރުގެ ޖަލްސާގައި ވާހަކަފުޅު ދައްކަވަމުން އަބްދުއްރަހީމް ވިދާޅުވެފައިވަނީ ރައީސް ޑރ. މުޙައްމަދު މުޢިއްޒުގެ ވެރިކަމުގައި ކުރީގެ ރައީސް ޔާމީންގެ ވެރިކަމުގައި ގެނެސްދެއްވި ތަރައްޤީއަށްވުރެ ޑަބަލް ތަރައްޤީ ގެނެސްދެއްވާނެ ކަމަށާއި މި ތަފާތު ރައްޔިތުންނަށް ފެނިގެންދާނެއެވެ. އަދި ރައްޔިތުން ރައީސް މުޢިއްޒު ދެވަނަ ދައުރަކަށް ވެސް އިންތިޚާބު ކުރައްވާ މަންޒަރު އިރާދަކުރެއްވިއްޔާ ފެނިގެންދާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، އަބްދުއްރަހީމް އަބްދުﷲ ފާހަގަކުރެއްވި ގޮތުގައި ލީޑަރަކު ލީޑަރަކަށް ވަނީ ފަހަތުގައި އިޚްލާޞްތެރި ބަޔަކު ތިބުމުންނެވެ. އަދި ރައީސް ޑރ. މުޢިއްޒުގެ ވެރިކަން ދިފާޢު ކުރެއްވުމުގައި ސާބިތުވެ ހުންނަވާނެ ކަމަށް އެމަނިކުފާނު ވިދާޅުވިއެވެ.

މި ބަސްފުޅުތައް އަބްދުއްރަހީމް އަބްދުﷲ ދެއްކެވީ ޕީއެންސީގެ ހަރުގޭގައި ބޭއްވުނު ޖަލްސާއެއްގައެވެ.