ބޭންކް އޮފް މޯލްޑިވްސް (ބީއެމްއެލް) އިސްލާމިކުން އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް) ގެ ސަނާބިލް ޕްރޮޖެކްޓަށް އިންވެސްޓް ކޮށްފިއެވެ. މި އިންވެސްޓްމަންޓަކީ އައިޔޫއެމުން މަތީ ތައުލީމަށް ޚާއްސަކޮށްގެން ހުޅުމާލޭގައި އަޅަން ނިންމާފައިވާ 7 ބުރީގެ އިމާރާތް ކުރުމަށް ހިންގާ ޕްރޮޖެކްޓަށް ކުރި އިންވެސްޓްމަންޓެކެވެ.

އައިޔޫއެމުން ހުޅުވާލި ސަނާބިލް ސުކޫކަށް އެއްފަހަރާ ސަބްސްކްރައިބްކުރުމާއެކު، ބީއެމްއެލް އިސްލާމިކް ވެފައިވަނީ އިދާރާއަކުން ދޫކުރި އިސްލާމިކް ކެޕިޓަލް މާކެޓް އިންސްޓްރޫމަންޓަކަށް އިންވެސްޓްކުރި ރާއްޖޭގެ ފުރަތަމަ ބޭންކަށެވެ.

މިކަމާގުޅިގެން ބީއެމްއެލްގެ ޑައިރެކްޓަރ އޮފް އިސްލާމިކް ބޭންކިންގ، ޙަސަން ކަލާމް ވިދާޅުވީ މި އިންވެސްޓްމަންޓަކީ އިސްލާމިކް ބޭންކިން އަދި ފައިނޭންސިންގެ ދާއިރާ ކުރިއަރުވައި، ހަމައެއާއެކު އިސްލާމީ ތައުލީމު ކުރިއެރުވުމަށް ބީއެމްއެލް އިސްލާމިކުން ސާބިތުކަމާއެކު ތިބިކަމުގެ ވަރަށް ވަރުގަދަ ހެއްކެއްކަމަށެވެ. އަދި މި ޕްރޮޖެކްޓްގެ ސަބަބުން ދިވެހިރާއްޖޭގެ އިސްލާމިކް ޔުނިވަރސިޓީ އާއި ރާއްޖޭގެ ރައްޔިތުންނަށް ގިނަގުނަ ފައިދާތަކެއް ލިބޭނެކަމަށާއި އިލްމީ އިޤްތިޞާދެއް ގާއިމްކުރުމަށް އެހީވެގެންދާނެކަމަށް ވެސް އޭނާ ވިދާޅުވިއެވެ.

ބީއެމްއެލް އިސްލާމިކުން އަންނަނީ އަމިއްލަ ފަރުދުންނާއި، ވިޔަފާރިތަކާއި މުއައްސަސާތަކަށް އީޖާދީ އަދި ކަސްޓަމަރުން ބޭނުންވާފަދަ ޝަރުއީ ހަމަތަކަށް މާލީ ހައްލު ފޯރުކޮށްދިނުމުގައި ޚިދުމަތްދެމުންނެވެ. މި އިންވެސްޓްމަންޓާއެކު، ބީއެމްއެލް އިސްލާމިކުން ވަނީ އިސްލާމިކް ފައިނޭންސް ދާއިރާގައި އިތުރު ފިޔަވަޅެއް ކުރިއަށް އަޅާފައެވެ.