ފުރަތަމަ ކަމަކަށް މުންކަރާތަކީ ކޮބައިކަން ދެނެގަންނަމާ ހިނގާށެވެ!  

"الله ތަޢާލާ ޙަރާމް ކުރައްވާފައިވާ ކޮންމެ ކަމަކީ، މުންކަރާތެކެވެ. الله އަށް އުރެދުމަކީ މުންކަރާތެކެވެ. ދީނުގެ ޝިޢާރުތަކަށް މަލާމާތްކޮށް، ފުރައްސާރަ ކުރުމަކީ މުންކަރާތެކެވެ. އަމަން އަމާންކަން ނަގާލުމަކީ މުންކަރާތެކެވެ. ޙައްޤަކާނުލައި، މީހުންގެ މުދަލަށާއި، ފުރާނައަށާއި، އަބުރަށް އަރައިގަތުމަކީ މުންކަރާތެކެވެ."  

އަމަން އަމާންކަން ނަގައިލުމުގެ މާނައަކީ ހަމައެކަނި މަގުތަކަށް ނުކުމެ ހަމަނުޖެހުން ހިންގުމެއް ނޫނެވެ. މީސްތަކުގެ މެދުގައި ފިތުނަ އުފެދޭނެ ކޮންމެ ކަމެއް ކުރުމަކީވެސް މުންކަރާތެކެވެ. އެއިގެ ތެރޭގައި އަމިއްލަ ޢާއިލާގެ ތެރޭގައި ފިތުނަ އުފެއްދުންވެސް ހިމެނެއެވެ. ހަމަނުޖެހުން އުފެއްދުވުންވެސް ހިމެނެއެވެ. ތިމާ މަސައްކަތްކުރާ މާޙައުލުގައި ފިތުނަ އުފެއްދުވުންވެސް ހިމެނެއެވެ. މުވައްޒިފުންގެ މެދުގައި ޙަސަދަވެރިކަން އުފައްދުވަން މަސައްކަތްކުރުންވެސް ހިމެނެއެވެ. އަދިކީއްހެއްޔެވެ؟ އެކުވެރިންގެ މެދުގައި ފިތުނަ އުފައްދުވައި ޙަސަދަވެރިކުރުވަން މަސައްކަތްކުރުންވެސް ހިމެނެއެވެ.  

ފިތުނައިގެ ސަބަބުން ޙަސަދަވެރިކަން އުފެދެއެވެ. އެކިވަރުގެ މައްސަލަތައް ކުރިމަތިވެއެވެ. ޢާއިލީ ގުޅުމާއި އެކުވެރި ރަޙްމަތްތެރިކަމުގެ ގުޅުން ކެނޑިގެންދެއެވެ.   

އެކަކު އަނެކަކަށް އެކިވަރުގެ ގެއްލުންތައް ދޭން މަސައްކަތްކުރެއެވެ. އެޙާލަތުގައި އެމާޙައުލެއްގައި އޮންނާނީ ކޮން އަމަންއަމާންކަމެއް ހެއްޔެވެ؟ އަމަންއަމާންކަން ނެތި ގެއްލިގެން ހިނގައިދާނެއެވެ.  

ވިސްނާށެވެ! ސަމާސައަކަށްވެސް، މީހަކު ހެއްވާލަންވެސް ދޮގެއް ބުނުމަކީ ޙަރާމްކަމެކެވެ. އެހެންކަމަށްވާއިރު ފިތުނަ އުފައްދުވަން ހަދާ ދޮގުތަކާއި ދައްކާ ވާހަކަތުގެ ސަބަބުން ފާފަވެރިވާނެ މިންވަރު ހިތަށް ގެންނާށެވެ!  

މީސްތަކުންނޭވެ! ހޭލާށެވެ! ޖާހިލުކަން ދޫކޮށްލާށެވެ! މުންކަރާތްތަކާއި ދުރުހެލިވާށެވެ! އާޚިރަތް ދުވަހަށް ބިރުވެތިވާށެވެ! 

- އިސްލާމީ ތިލަފަތުގެ ދަރުސަކުން