ތިމާއަށް ކަމެއް ނުވަތަ ޙާލަތެއް ކުރިމަތިވާނީ ކޮން ވަޤުތަކުކަން ހަމައެކަކަށްވެސް ނުއެނގޭނެއެވެ. ހެޔޮލަފާ. ﷲ ތަޢާލާއަށް ކިޔަމަންތެރި އަޅެއްގެ ގޮތުގައި އަބަދުވެސް އުޅެންވީ އެސަބަބަށްޓަކައެވެ. މިއަދު ނޫނީ މާދަމާވެސް ތިމާއާއިމެދު ކަންކަންވެގެން ހިނގައިދާނެ ގޮތް ނުއެނގޭތީއެވެ.  

«إِذَا مَرِضَ العَبْدُ، أَوْ سَافَرَ، كُتِبَ لَهُ مِثْلُ مَا كَانَ يَعْمَلُ مُقِيمًا صَحِيحًا»

[صحيح البخاري] 

ޙަދީޘްފުޅުގެ މާނައިގައިވަނީ މިފަދައިންނެވެ. 

"(ﷲގެ) އަޅާ ރަށުގައި ޤާއިމުވެ، ހެޔޮ ޙާލުގައިހުރެ (ޤަވާޢިދުން) ކުރާ ޢަމަލުތައް، އޭނާ ބަލިވެގެން ނުވަތަ ދަތުރުމަތީގައިވުމުގެ ސަބަބުން ނުކުރެވުނުކަމުގައިވިޔަސް އެ ޢަމަލުތަކުގެ އަޖުރު އޭނައަށް ލިޔުއްވޭނެއެވެ." 

މި ހަދީޘްފުޅުން ދަލީލްކޮށްދެނީ ހެޔޮ ކަމެއްކުރުމުގެ ނިޔަތް އޮވެ، ދިމާވި ކަމެއްގެ ސަބަބުން އެކަންކުރުމަށް ނުކުޅެދުނުކަމުގައިވިޔަސް އެމީހަކަށް އެހެޔޮ ޢަމަލުކުރިކަމުގެ އަޖުރު ދެއްވަވާނެ ކަމެވެ. 

ވީމާ ގަދަވެ ސަލާމަތުން ހުންނަން ﷲ ތަޢާލާ ދެއްވަވާ ފުރުޞަތުގައި ވީހައި ގިނައިން ހެޔޮ ޢަމަލުތައްކުރުންމަތީގައި ދެމިހުންނާށެވެ. ވީހައިގިނައިން ސުންނަތް ނަމާދުކޮށް ރޯދަހިފުން ފަދަ ކަންކަންކުރަމުން ގެންދާށެވެ. އެއިރުން އެމީހަކު ބަލިޙާލުގައި އޮންނަންޖެހިއްޖެނަމަ އެދުވަސްތަކުގައި އެމީހަކު ކުރިން ކުރަމުން އައި ހެޔޮ ޢަމަލުތައް ކުރިކަމުގެ އަޖުރު ﷲ ތަޢާލާ ދެއްވަވާނެތެވެ.

މިއީ މަރަށް ތައްޔާރުވާ ފަދައިން ތައްޔާރުވާންޖެހޭ ކަމެކެވެ. މުސްލިކުޅިވުމުގެ ކުރިން ޒުވާންކަމުގެ ފައިދާ ލިބިގަތުމަކީ އެއީއެވެ. ޒުވާން ޢުމުރުގައި ވީހައި ގިނައިން އަޅުކަންކޮށް އުޅެންވީ މިފަދަ ޙާލަތެއް މެދުވެރިވެދާނެ ކަމަށްޓަކައެވެ.  

- އިސްލާމީ ތިލަފަތުގެ ދަރުސަކުން