އިނގިރޭސިވިލާތަށް ކުރައްވަމުންދާ ރަސްމީ ދަތުރުފުޅުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ރާއްޖެއިން ބޭރުގައި ކިޔަވާ ދިވެހި ދަރިވަރުންނަށް ދިމާވާ މައްސަލަތަކަކީ ނިޒާމުގެ ތެރެއިން ދިމާވާ މައްސަލަތަކެއް ކަމަށް ވިދާޅުވެ، އެ މައްސަލަތަކަށް އަވަސް ހައްލެއް ގެނެސްދެއްވާނެކަމުގެ ޔަޤީންކަން ދެއްވާފައެވެ.

އިނގިރޭސިވިލާތުގައި ކިޔަވާ ދިވެހި ދަރިވަރުންނާ ބައްދަލުކުރެއްވުމަށްފަހު ރައީސް ވިދާޅުވީ، "ނިޒާމުގެތެރޭގަ ހުރި މައްސަލަތަކެއް މިއީ. އެކަންކަން އިރާދަކުރެއްވިއްޔާ ރަނގަޅުކޮށް އެފިޝެންޓްކޮށްދީ އިރާދަކުރެއްވިއްޔާ ފަސޭހަތައް ގެނެސްދޭނަން. އަވަސްކޮށް ޖަވާބުދިނުމާއި އަވަހަށް އޮން ޓައިމް އެ ލިބެންޖެހޭ ފައިސާ ޖަމާކޮށްދިނުން ކަހަލަ ކަންކަމާ މި ކަންކަން ރަނގަޅުކޮށްދޭނަން" ކަމަށެވެ.

ދަރިވަރުންނާއެކު ބޭއްވެވި ބައްދަލުވުމުގައި ރައީސް ވަނީ، ސްކޮލަރޝިޕް އަދި ލޯނު ލިބޭ ދަރިވަރުންނަށް ފައިސާ ދޫކުރުމުގައި ދިމާވާ މައްސަލަތަކާއި، ސަރުކާރުގެ އިދާރާތަކުން އީމެއިލްތަކަށް ޖަވާބުދިނުމުގައި ދިމާވާ ލަސްތަކަށް ޚާއްސަ ސަމާލުކަމެއް ދެއްވާނެކަމަށް ވިދާޅުވެފައެވެ.

މީގެއިތުރުން، ލިވަޕޫލް ސިޓީގައި ކިޔަވާ ދިވެހި ދަރިވަރުންނާވެސް ބައްދަލުކުރައްވައި، "ނަމްބަރ 9 ރޯޒްމަންޓް އެވެނިއު" ޢިމާރާތް އެ ދަރިވަރުންގެ އެކި ބޭނުންތަކަށް ބޭނުންކުރެވޭނެ ގޮތަށް ހަމަޖައްސަވައިދެއްވާފައިވާކަން ފާހަގަކުރެވެއެވެ.

ރައީސް މުޢިއްޒުގެ މި ދަތުރުފުޅުގައި، ރާއްޖެއިން ބޭރުގައި ކިޔަވާ ހުރިހާ ދަރިވަރުންނަށްވެސް އެއްހަމައަކުން ސަމާލުކަންދީގެން މައްސަލަތަކަށް ހައްލު ގެނެސްދެއްވާނެކަމުގެ ޔަޤީންކަން ދެއްވާފައިވާކަން ފާހަގަކުރެވެއެވެ.