ޢާއިޝަތު ރަފާޙް ޢަލީ

ޤުރުއާނުގެ އާޔަތްތަކާމެދު ވިސްނުމާއި އެއަށް ޢަމަލުކުރުމަކީ އަޅުގަނޑުމެންގެ މައްޗަށް ވާޖިބުވެގެންވާ ކަމެކެވެ. މި ދަރުސްގައި އަޅުގަނޑު އަލިއަޅުވާލަން ބޭނުންވަނީ ނިސާ ސޫރަތުގެ 34 ވަނަ އާޔަތުގެ ފުރަތަމަ ބައިގައި ބަޔާންކުރެވިފައިވާ މުހިންމު ނުކުތާއަކަށެވެ. މިއީ މުޖުތަމަޢުގައި އެކަށީގެންވާ ސަމާލުކަމެއް ނުލިބި، އިހުމާލުވެފައިވާ ކަމަކަށްވާތީ، މިއާ ބެހޭގޮތުން މަޝްވަރާކޮށް ވާހަކަދެއްކުމަކީ މުހިންމު ކަމެކެވެ. 

މާތްﷲ ނިސާ ސޫރަތުގެ 34 ވަނަ އާޔަތުގައި ވަޙީކުރައްވާފައިވެއެވެ: "ٱلرِّجَالُ قَوَّٰمُونَ عَلَى ٱلنِّسَآءِ" މާނައީ: "ފިރިހެނުންނަކީ، އަންހެނުންގެ މައްޗަށް ރައްކާތެރިވެ ބެލެހެއްޓުމުގައި ޤާއިމުވެގެންތިބޭ ބައެކެވެ." 

"ޤައްވާމުން" މި ބަހުގެ ޙަޤީޤީ މާނައަކީ ޒިންމާދާރު، ބަލަހައްޓާ، ޙިމާޔަތްކުރާ، ރައްކާތެރިކުރާ، އެހީތެރިވާ އަދި ސަޕޯޓްކުރާ މީހުންނެވެ. މި ބަހުގެ މާނައިގައި އޮތޯރިޓީ ނުވަތަ ޗާޖުގައި ހުރުމުގެ މާނައެއް ނުހިމެނެއެވެ.

މި އާޔަތުގެ މަފްހޫމަކީ ފިރިހެނުންނަށް އަންހެނުންގެ މައްޗަށް މާތްކަމެއް ލިބިގެންވާކަމެއް ނޫނެވެ. އެހެނަސް، ފިރިހެނުންނަށް ދެވިފައިވަނީ އަންހެނުން ބެލެހެއްޓުމާއި، އެހީތެރިވުމާއި، ރައްކާތެރިކުރުމުގެ ޒިންމާއެކެވެ. މި ގޮތުން، މާތްކަން ލިބިގެންވަނީ އަންހެނުންނަށެވެ. 

ފިރިހެނުންނަށް މި ޒިންމާ އަދާކުރުމުގައި ގިނަގުނަ ގޮންޖެހުންތަކާ ކުރިމަތިލާން ޖެހެއެވެ. މީގެ ތެރޭގައި އަމިއްލަ މުދަލުން ޚަރަދުކުރުމާއި، އަނބިމީހާގެ ކަންތައްތައް އަބަދުމެ ބެލެހެއްޓުން ހިމެނެއެވެ. އަދި އަނބިމީހާގެ ފަރާތުން ނުރުހުން ފާޅުކުރި ނަމަވެސް، ކެތްތެރިކަމާއެކު ދެމިހުރުން ހިމެނެއެވެ. 

ހަމައެއާއެކު އަންހެނުންނަށް ވެސް މި އާޔަތުގައި ޒިންމާތަކެއް ކަނޑައަޅުއްވާފައިވެއެވެ. ނަމަވެސް، މި ޒިންމާތައް އަދާކުރެވޭނީ ހެޔޮވެގެންވާ، ޞާލިޙު އަންހެނުންނަށެވެ. މިއީ ހުރިހާ އަންހެނުންގެ ކިބައިގައި ޠަބީޢީގޮތުން ހުންނަ ސިފަތަކެއް ނޫންކަމުން، އަންހެނުން ވެސް މި ސިފަތައް އަށަގެންނެވުމަށް މަސައްކަތްކުރަން ޖެހެއެވެ. 

އަންހެނުންގެ ކިބައިގައި ހުރެދާނެ އެހެން ސިފައެއްގެ ގޮތުގައި ފާހަގަކުރެވެނީ، ފިރިމީހާ ކުރާ ކަންތައްތަކާމެދު ރުޅިއައުމެވެ. ނަމަވެސް، މާތްﷲ އަންގަވާފައިވަނީ އަންހެނުންގެ ފުރަތަމަ ސިފައަކަށް ވާންޖެހޭނީ ރުޅި ހިފެހެއްޓުމާއި، ބަދަލުހިފުމުގެ އިޙްސާސް ކޮންޓްރޯލްކުރުމާއި، އަދި އެމީހުން ވާހަކަދައްކާ ގޮތާއި އުޅޭ ގޮތުގައި އެ އިޙްސާސްތައް ފާޅުވިޔަ ނުދިނުމަށް މަސައްކަތްކުރުމެވެ. އަންހެނުން އަބަދުވެސް ވާންވާނީ ޞުލްޙަވެރިކަމަށާއި، އިޞްލާޙަށާއި، ކުރިއެރުމަށް އިސްކަންދޭ ބަޔަކަށެވެ. އަދި ކަންތައްތައް ފާސިދުވެ ހަލާކުވިޔަ ނުދިނުމަށް މަސައްކަތްކުރާ ބަޔަކަށެވެ. 

ޚުލާޞާކޮށް ބުނާނަމަ، މި އާޔަތުގައި ބަޔާންކުރައްވާފައިވަނީ ފިރިހެނުންނާއި އަންހެނުންގެ މެދުގައި ހަމަހަމަކަމެވެ. ކޮންމެ ޖިންސަކަށް ވެސް ވަކި ޒިންމާތަކަކާއި މާތްކަންތަކެއް ލިބިގެންވެއެވެ. މި ދެ ޖިންސުގެ މެދުގައި ހަމަހަމަކަން ގެނެސްދެއްވަނީ މާތްﷲ އެވެ. އެހެންކަމުން، އެއްވެސް ފަރާތަކުން މާތްﷲގެ ބަސްފުޅު ބޭނުންކޮށްގެން އަމިއްލަ ނަފުސު މަތިވެރިކުރަން މަސައްކަތްކުރުމަކީ ރަނގަޅު ކަމެއް ނޫނެވެ. 

މި އާޔަތުގެ މައިގަނޑު މެސެޖަކީ ފިރިހެނުންނާއި އަންހެނުންގެ މެދުގައި އޮންނަންވާ ގުޅުމުގެ ބާވަތެވެ. އެއީ އެއްބަޔަކު އަނެއްބަޔަކަށް އިޙްތިރާމްކުރުމާއި، އެހީތެރިވުމާއި، ރައްކާތެރިކަން ފޯރުކޮށްދިނުމެވެ. މިއީ ދެ ޖިންސުގެ މެދުގައި އޮންނަންވާ ފުރިހަމަ ގުޅުމުގެ ނަމޫނާއެކެވެ. 

އަޅުގަނޑުމެންގެ މުޖުތަމަޢުގައި މި އާޔަތުގެ ޙަޤީޤީ މާނަ އޮޅުންފިލުވައި، އޭގެ މައްޗަށް ޢަމަލުކުރުމަކީ މުހިންމު ކަމެކެވެ. މިގޮތުން، ފިރިހެނުން އަންހެނުންނަށް އިޙްތިރާމްކޮށް، އެމީހުންގެ ޙައްޤުތައް ރައްކާތެރިކޮށްދޭން ޖެހެއެވެ. އަދި އަންހެނުން ވެސް ފިރިހެނުންނަށް އެއްބާރުލުން ދީ، އެމީހުންގެ ޒިންމާތައް އަދާކުރުމަށް އެހީތެރިވާން ޖެހެއެވެ. 

މީގެ އިތުރުން މި އާޔަތުގެ މައްޗަށް ފުންކޮށް ވިސްނައި، އޭގެ ޙަޤީޤީ މާނަ ދެނެގަތުމަކީ އަޅުގަނޑުމެންގެ މުޖުތަމަޢުގައި ހަމަޖެހުމާއި ސުލްޙަވެރިކަން ޤާއިމުކުރުމަށް މަގުފަހިވެގެންދާނެ ކަމެކެވެ. އަދި މިއީ އިސްލާމްދީނުގެ ތަޢުލީމުތަކާ އެއްގޮތަށް ދިރިއުޅުމަށް އަޅުގަނޑުމެންނަށް ލިބޭ ރަނގަޅު ފުރުޞަތެކެވެ.