ދައްޖާލް ފައުޅުވާނީ އޭނާއަށް މަރްޙަބާ ކިޔަން ދުނިޔެ ތައްޔާރުވުމުންނެވެ. ދައްޖާލަށް މަރުޙަބާ ކިޔަން ދުނިޔެ ތައްޔާރުވާނެ ކަމަށް ބުނުމުން މިއަދު ބައަކަށް ސިހުން ލިބިދާނެއެވެ. ދައްޖާލަށް އެއްވެސް ބައަކު މަރުޙަބާ ކިޔާނެ ކަމާއިމެދު ބައެއްގެ ހިތުގައި ސުވާލުވެސް އުފެދިދާނެއެވެ.

މީސްތަކުންނޭވެ! ދުނިޔެ މިހާރުވެސް ދަތުރުކުރަމުން މިދަނީ އެ މިސްރާބަށެވެ. ދައްޖާލަށް މަރްޙަބާ ކިޔަން ތައްޔާރުވުމުގެ މިސްރާބަށެވެ. ގިނަ ބައެއްގެ ކުރިމަތީގައި އެއްވެސް ދީނަކީ އޮތް އެއްޗެއް ނޫނެވެ. ﷲ ތަޢާލާ ވޮޑިގެންވާ ކަމަށް ޤަބޫލުކުރަން މިއަދު މިދަނީ ބަހަނާ ދައްކަމުންނެވެ. އެކަމަށް ފައުޅުގައި އިންކާރުކުރާ އެތައް ސަތޭކަ މިލިއަން ބައަކު މިހާރުވެސް އެބައުޅެއެވެ.

މީސްތަކުން މިގޮތަށް ޣާފިލުވަމުން ގޮސް އާޚިރަތް މަތިން މުޅިން ހަނދާން ނައްތައިލާނެއެވެ. ހުރިހާވެސް ތަނަކީ ދުނިޔެ ކަމަށް ޤަބޫލުކުރާނެއެވެ. މަރުވުމުން ދެން ކަންތައްތައް ވާނެ ގޮތާއިމެދު ވިސްނައި ފިކުރުކުރުން ހުއްޓައިލާނެއެވެ.

އިސްލާމް ދީނަކީ ހިމާޔަތެކެވެ. ތިބާ ނަރަކައިން ސަލާމަތް ކޮށްދޭ ހިމާޔަތެވެ. ނަމަވެސް މިހާރުވެސް ގިނަ ބައަކު އެކަން ޤަބޫލެއް ނުކުރެއެވެ. އެމީހުން ދެކެނީ އިސްލާމް ދީނަކީ އެމީހުންގެ އުފާތަކަށް އޮތް ބޮޑު ހުރަހެއް ކަމަށެވެ.

ދައްޖާލު ފައުޅުވާނީ އެ ހާލަތުގައި ދުނިޔެ ވަނިކޮށެވެ. ދައްޖާލު ފައުޅުވެއްޖެ ކަމަށް ބުނުމުން އެދުވަހު ކަންބޮޑުވާން އެނގޭނީ ވެސް މަދު މީހަކަށެވެ. މާތް ﷲ ވަނީ ދައްޖާލަށް ބާރުތަކެއް ދެއްވަވައިފައެވެ. ވާރޭވެސް ވެއްސުވާނެއެވެ. ބެނުން ނަމަ ބިންތައް ހަނަފަސްވެސް ކުރުވާނެއެވެ.

ދައްޖާލު ފައުޅުވުމާއިއެކު އޭނާއަކީ ޢީސާގެފާނު ކަމަށް ދައުވާ ކުރާނެއެވެ. ނަމަވެސް ދައްޖާލަކީ ކަނޑައެޅިގެން ހުރި ދޮގުވެރިއެކެވެ. އޭނާގެ ނިތްކުރީގައި "ކާފިރު" ލިޔެވިފައިވާނެއެވެ. ނަމަވެސް ކިޔަން އެނގޭނީ ހަމައެކަނި މުސްލިމުންނަށެވެ.

ލޮބުވެތި އަޚުންނާއި އުޚުތުންނޭވެ! ދައްޖާލު އަދި ނުފެދިދާނެއެވެ. ދައްޖާލު ފައުޅު ވުމުގެ ކުރިން ފެންނާނެ ބައެއް ޢަލާމާތްތައް އަދި ފައުޅުނުވާތީއެވެ. ނަމަވެސް އެކަންކަން ހިނގުމަށް ދެން މާގިނަ ދުވަހެއް ނެތެވެ. ވަގުތު ކުޑަތަން ވެއްޖެއެވެ. ދުނިޔޭގެ މިހާރުގެ ޙާލަތަށް ވިސްނައި އަވަހަށް އަމަލުކުރަންފަށާށެވެ! އަމަލުކުރުމަކީ އަމަލުތައް އިޞްލާޙް ކުރުމެވެ. ތައުބާވުމެވެ.

ޤިޔާމަތް ކައިރިވަމުން އަންނަ ކަމުގެ ޢަލާމާތްތައް މިދަނީ ފެންނަމުންނެވެ. ދެން ދާނީ އިތުރު ޢަލާމާތްތައް ފެނުން އަވަސްވަމުންނެވެ. އެކަން ރަސޫލް (ޞޢވ) ސިފަ ކުރައްވަވާފައި ވަނީ ކުޅަނދުރު ހަތައެއް ތަޅައިލުމުން ކުޅަނދުރުތައް ނުކުންނަ ފަދަ ގޮތަކަށް ޢަލާމާތްތައް ފެންނަމުން ދާނެ ކަމަށެވެ. ވީއިރު ތިއަ އިންތިޒާރުކުރަނީ އިތުރަށް ކޮން ކަމެއް ފެންނަންދެން ހެއްޔެވެ؟

--ބިލާލް އައްސަދުގެ ދަރުސަކުން