އާރޓިކަލްކިޔުމަށް ހޭދަވާނެކަމަށް ބެލެވެނީ : 3 މިނެޓް, 37 ސިކުންތު
ކާމިޔާބު އެތައް ދިވެހި ފިލްމެއް އުފައްދާފައިވާ ޑާކްރެއިން އެންޓަޓެއިންމެންޓްގެ އެންމެ ފަހުގެ އުފެއްދުން ކަމަށްވާ "މާމުއި" ގެ ވަދާއީ ހަތަރު ޝޯ، މިރެއިން ފެށިގެން އޮލިމްޕަހު ސްކްރީނުގައި އަޅުވަން ނިންމައިފިއެވެ.
އެގޮތުން "މާމުއި" ގެ ވަދާއީ ހަތަރު ޝޯ އެޅުވުމަށް ނިންމާފައިވަނީ މިމަހުގެ 16،17،18 އަދި 19، މި ހަތަރު ދުވަހުގެ ރެއެވެ.
ފިލްމުގެ ޕްރޮޑިއުސަރ އަދި ޑާކްރެއިން އެންޓަޓެއިންމެންޓްގެ ބާނީ މުޙައްމަދު އަލީ (މޮގާ) ބުނީ، ފިލްމުގެ ވަދާއީ ޝޯތައް އެޅުވުމަށް ތައްޔާރުވެފައިވާއިރު، މިހާރުވެސް އެޝޯތަކަށް އޮލިމްޕަހުން ޓިކެޓް ލިބެން ހުންނާނެ ކަމަށެވެ. ޓިކެޓާއި ގުޅޭގޮތުން އިތުރު މައުލޫމާތު ހޯއްދެވުމަށް 9911229 ނަންބަރު ފޯނާއި ގުޅާލެއްވުމަށް "މާމުއި" ޓީމުން އެދިފައިވެއެވެ.
މިމަހުގެ 1 ވަނަ ދުވަހު ރިލީސް ކޮށްފައިވާ މިފިލްމަށް ގިނަ ބައެއްގެ ތަރުހީބު އެންމެ ފުރަތަމަ ދުވަހުން ފެށިގެން ވެސް ވަނީ ލިބިފައެވެ.
"މާމުއި" މިފިލްމުގައި ހަރަކާތްތެރިވެފައިވަނީ މަރިޔަމް މަޖުދާ (މަޖޫ)، އިސްމާއިލް ޖުމައިހް (ޖުމާ)، މަރިޔަމް އައްޒަ، ޖުމައްޔިލް ނިމާލް، ސަމާހަތު ރާޒީ، ޝާޔާ، އަބްދުﷲ ޝާފިއު އިބްރާހިމް (ފުބޫ)، ނުޒުޙަތު ޝުއައިބު (ނުޒޫ)، މަރިއްޔާ، އަހުމަދު ސުނީ، ހަމްދާން ފާރޫޤް، އާދަމް ރިޒްވީ، އައިމިނަތު ނޫރާ، އަހުމަދު އަމާން، އަހުމަދު ޝާކިރު، ޝީލާ ނަޖީބު، އިބްރާހިމް އަމާން، މާރިޔާ ތްރެސާ، އަދި އަލީ ޝަޒްލީމް ގެ އިތުުރުން ފިލްމީ ދާއިރާއަށް އަލަށް ތައާރަފްވާ އައިޝަތު ޔާދާ އެވެ. މީގެ އިތުރުން 90 ގެ އަހަރުތަކުގެ ގިނަ ފިލްމުތަކަކުން ބެލުންތެރިންގެ ހިތްތަކުގައި ޖާގަ ހޯދާފައިވާ އިސްމާއިލް ވަޖީހު ވެސް މިފިލްމުން ފެނިގެންދާނެއެވެ.
މިއީ އައިޝަތު ފުއާދު އަދި އަހުމަދު ތޮލާލްގެ ވާހަކައެއްގެ މައްޗަށް ހަދާފައިވާ ކޮމެޑީ ފިލްމެކެވެ.
Advertisement
16 ޖުލައި 2019