ރާއްޖޭގައި އައިއޯއައިޖީ ބޭއްވުމަށް ރަސްމީކޮށް ދިދައާއި ޙަވާލުވެ، ޤަރާރު އިއްވައިފިއެވެ.

މޮރިޝަސްގައި ބޭއްވި 19 ވަނަ އައިއޯއައިޖީ ނިންމުމުގެ ރަސްމިއްޔާތުގައި ރާއްޖޭގެ ފަރާތުން ދިދައާއި ޙަވާލުވެ، ޤަރާރު އިއްވަވައިދެއްވީ ޔޫތް މިނިސްޓަރ އަޙްމަދު މަޚްލޫފެވެ.

މޮރިޝަސްގެ ވަގުތީ ރައީސް ޕެރަމަސިވަން ޕިއްލޭ ބާލެން ވިލަޕޫރޭގެ އަތްޕުޅުން ރާއްޖޭގެ އޮލިމްޕިކް ކޮމެޓީގެ ޖެނެރަލް ސެކްރެޓަރީ އަޙްމަދު މަރްޒޫޤުގެ އަތްޕުޅަށް ދިދަ އެރުވުމުން މަޚްލޫފްގެ އަތްޕުޅަށް ދިދަ އެރުވީ މަރުޒޫޤެވެ.

ރާއްޖޭގައި ބާއްވާ އައިއޯއައިޖީގައި ބައިވެރިވުމަށް ހުރިހާ ޤައުމުތަކަށް ރާއްޖޭގެ ރައީސް އިބްރާހިމް މުޙައްމަދު ސާލިޙުގެ ފަރާތްޕުޅުން، ޔޫތް މިނިސްޓަރ މަޚްލޫފް ވަނީ ދަޢުވަތު އަރުވާފައެވެ.

2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސް ބޭއްވުމަށް ފުރުޞަތު ލިބުނީ މަޑަގަސްކަރައާއި ކޮމޮރޯސް އާއިވާދަކޮށެވެ.

ރާއްޖޭގައި އައިއޯއައިޖީ ބާއްވާ އިރު، މިއީ ރާއްޖޭގައި ބާއްވާ އެންމެބޮޑު ކުޅިވަރު އިވެންޓަށްވާނެއެވެ.

މިއަހަރުގެ އައިއޯއައިޖީގައި ބައިވެރިވި ރާއްޖޭގެ އެތްލީޓުން އެނބުރި ރާއްޖެ އަންނާނީ މާދަމާ ހަވީރުއެވެ. އެތްލީޓުންނަށް މަރުޙަބާ ކިޔުމަށް ޚާއްޞަ ހަރަކާތްތަކެއް ރާވާފައިވާ އިރު، ޔޫތް މިނިސްޓަރ ވަނީ ވީހާވެސް ގިނަބަޔަކު އެތްލީޓުންނަށް މަރުޙަބާކިޔުމަށް ޖުމްހޫރީ މައިދާނަށް ދިއުމަށް އެދިވަޑައިގެންފައެވެ.

#IOIG2019 #MifaharuvesGold

IOIG2019 has come to an official end after a 10-day run in Mauritius, with the closing ceremony being held in the Stade Ajalay. During the closing ceremony, the IOIG flag was handed over to Maldives for the next IOIG in 2023. pic.twitter.com/AXJ2muMgu5

— Maldives Olympic Committee (@nocmaldives) July 28, 2019