ދީނަށް ފުރައްސާރަ ކޮށްގެން ގދ. ތިނަދޫއިން ހައްޔަރުކުރި މީހާއަށް އިންޒާރު ދިން މައްސަލައެއް ވެސް ބަލަމުންދާ ކަމަށް ފުލުހުން ބުނެފިއެވެ.

ފުލުހުންގެ މީޑިއާ އޮފިޝަލު ވިދާޅުވި ގޮތުގައި، ދީނަށް ފުރައްސާރަ ކޮށްގެން ތިނަދޫއިން ހައްޔަރުކުރި މީހާއަށް އިންޒާރުދިން މައްސަލަ، އެމުއައްސަސާއިން ބައްލަވަނީ ވަކި މައްސަލައެއްގެ ގޮތުގައެވެ. އަދި އެމީހާގެ ބަންދުގެ މުއްދަތު ޖެހުމަށް މިއަދު ކޯޓަށް ހާޒިރު ކުރުމުން، އޭނާގެ ބަންދުގެ މުއްދަތައް 15 ދުވަސް ޖަހާފައިވާ ކަމަށް ވެސް އޮފިޝަލު ވިދާޅުވެފައިވެއެވެ.

ދީނަށް ފުރައްސާރަ ކުރި މީހާއަށް ދީފައިވަނީ ކޮން ފަރާތަކުން ކޮން އިންޒާރެއްކަމެއް ފުލުހުން ހާމަކޮށްފައެއް ނުވެއެވެ. ނަމަވެސް އޭނާގެ ލާދީނީ ފިކުރުގެ ސަބަބުން، ބައެއް މީހުން އޭނާއަށް އަދަބު ދިނުމަށާއި އެކިކަހަލަ އިންޒާރުތައް ދީފައިވާކަން ވަނީ އެނގިފައެވެ.

ފާޅުގައި އިސްލާމްދީނަށް ފުރައްސާރަކުރަމުން އައިސްފައިވަނީ ތިނަދޫގައި ދިރިއުޅެމުންދިޔަ ރުސްތަމް ނަމަކަށްކިޔާ އުމުރުން 36 އަހަރުގެ ފިރިހެނެކެވެ.