ވެރިކަން ކުރާ ސިޔާސީ ޕާޓީ ޕީޕީއެމް އާއި ސަރުކާރުގެ ކޯލިޝަން ޕާޓީ އެމްޑީއޭ އާއި ދެމެދު އުފެދިފައިވާ ދެބަސްވުންތަކާއި މެދު އެމްޑީއޭ އިން މިއަދު ގޮތެއް ނިންމުން ފަސްކޮށްފިއެވެ.

މަޝްހޫރު ވިޔަފާރިވެރިޔާ އަދި ރައީސް ޢަބްދުﷲ ޔާމީން ޢަބްދުލް ޤައްޔޫމްގެ ޒަމާންވީ އެކުވެރިޔާ (ސަން ޓްރެވެލް ސިޔާމް) ހިންގަވާ އެމްޑީއޭ އިން މިރޭ ބާއްވަން ނިންމި އެޕާޓީގެ ކައުންސިލް ބައްދަލުވުން އެހެން ދުަވަހަކަށް މިހާރު ބަދަލު ކުރެވިފައިވީ ނަމަވެސް، އެއީ ކޮން ތާރީޚެއްކަން އަދި އެޕާޓީން ހާމަ ކޮށްފައެއް ނުވެއެވެ.

އެމްޑީއޭ އިން މިރޭ ބޭއްވުމަށް ހަމަޖެހުނު ކައުންސިލް ބައްދަލުވުމުގައި އެޕާޓީގެ މުސްތަޤްބަލާއިމެދު ގޮތްތަކެއް ނިންމުން ހިމެނޭއިރު، މިހާރު މުއްދަތު ހަމަވެފައިވާ އެމްޑީއޭ‍‍‍‍‍ ޕީޕީއެމް ކޯލިޝަންގެ އެއްބަސްވުމާމެދު ގޮތެއް ނިންމުންވެސް ހިމެނެއެވެ.