ރައްޔިތުންގެ މަޖިލީހުގެ ރައީސް ޢަބްދުﷲ މަޞީޙްގެ އިތުބާރު ނެތްކަމުގެ މައްސަލަ މާދަމާ މަޖިލީހަށް ވެއްދޭތޯ މަސައްކަތް ކުރަމުން ގެންދާ ކަމަށް މައުލޫމާތު ލިބިއްޖެއެވެ.

ކޯލިޝަން ޕީޖީ ގްރޫޕުގެ މެނަބަރަކު ވިދާޅުވީ މަސައްކަތް ކުރަނީ މާދަމާ ވެސް މައްސަލަ ވެއްދުމަށް ކަމަށެވެ. "ސްޕްރީމް ކޯޓުގައި 8 މެންބަރުންގެ މައްސަލަ އޮތް ނަމަވެސް ސޮއި ހަމަކުރެވިދާނެ ކަމަށް މިބަލަނީ. މާދަމާވެސް ހަމަ ވެއްދިދާނެ." ކަމަށް އޭނާ ވިދާޅުވިއެވެ. "އެކޮޅުން މިކޮޅަށް ސޮއި ލިބޭނެ."

މަޞީޙްގެ މަޤާމު ދިފާއުކުރަން ޤަވާއިދަށް ގެނައި ބަދަލުގެ ސަބަބުން މައްސަލަ މަޖިލީހަށް ހުށަހެޅޭނީ 45 މެންބަރުންގެ ސޮއި ހަމަކުރެވިގެންނެވެ. މިއީ މަޖިލީހުގެ ރައީސްކަމުން މަޞީޙް ވަކިކުރަން ހުށަހަޅާ 3 ވަނަ ފަހަރެވެ.