"އަޅުގަނޑުމެންގެ މަންމަގެ އުމުރަކީ 80 އަހަރުން މައްޗެވެ. 16 ދަރިން ވިހާފައިވާ  މަންމައެކެވެ. 11 ދަރިން ދުނިޔޭގައި އެބަތިއްބެވެ. މަންމައަކީ ލޭމައްޗަށް ދިއުމާ، ހަކުރު މަތިވުމާއި ކިޑްނީގެ މައްސަލަތައްފަދަ ސީރިއަސް އެތައް ބަލިތަކެއް ހުރި އަންހެނެކެވެ. 

ގެއަށް ކޮވިޑްވަނުމުން މަންމަ ވެސް ޓެސްޓްކުރީމެވެ. ޕޮޒިޓިވްވެސް ވިއެވެ. ނަމަވެސް ދަރިން ނިންމީ ބަލީގެ އުނދަގުލެއް މަންމައަށް ނުފޯރާނަމަ އެކަން މަންމައަށް ސިއްރުކުރުމަށެވެ. އެއީ އަންގައިފިނަމަ ވިސްނަން ހަދައިގެން ލިބޭ ގެއްލުން މާބޮޑުވެދާނެތީއެވެ. އެހެންވެ ނަތީޖާ މަންމަ ގާތަކު ނުބުނަމެވެ. 

މުއްދަތު ހަމަވެގެން ބަލިޖެހުނު މީހުން ޓެސްޓް ހެދިއިރު މަންމަވެސް ޓެސްޓުކުރީމެވެ. ނަތީޖާ ނެގަޓިވްއެވެ. އެއިގެފަހުން މިހާރު މަސްދުވަސްވީއެވެ. ބަލީގެ އެއްވެސް އުނދަގުލެއް މަންމައަކަށް ނުފޯރައެވެ. މަސްދުވަސްވީފަހުން އެވާހަކަ ސަމާސައަކަށް ހަދާފައި މަންމަ ގާތު ބުނުމުން އެކަން ޤަބޫލެއްވެސް ނުކުރިއެވެ. ބުނީ ސަމާސައަށްވެސް ދޮގު ނުހަދާށެވެ! އެބަލި ޖެހުނު ނަމަ މަންމައަށް ނުއެނގިއެއް ނުދާނެއެވެ!" 

މިވާހަކަ އަޅުގަނޑަށް ޙިއްޞާކުރުމުން އެތައްފަހަރަކު "މާޝާ ﷲ" ބުނެވުނެވެ. އެކުވެރިޔާގެ މަންމައަކީ މިއަދު މުސްކުޅިވެފައި އިން ނަމަވެސް އޭނާގެ މާމަ 8 އަހަރު އަދި އޭނާގެ މަންމަ 12 އަހަރު އެނދުމަތީގައި ބާއްވައިގެން ބަލަހައްޓައި ޚިދުމަތްކޮށްފައިވާ ހެޔޮލަފާ ދަރިއެކެވެ.