ހއ.އިހަވަންދޫގެ ތަޢާވުން މިސްކިތުގެ އިމާމު ޙުސައިން ރަޝީދު އިސްނަގައިގެން ފެށި ޕްރޮގުރާމެއްގައި ޖެހިޖެހިގެން 40 ރޭ ފަތިސް ނަމާދުގެ ޖަމާޢަތަށް ހާޒިރުވި 38 ކުއްޖަކަށް ބައިސްކަލެއް ދީފިއެވެ.

މިދިޔަ އަހަރުގެ މެއި މަހުގެ 1 ވަނަ ދުވަހު ފެށުނު މި ޕްރޮގުރާމުގައި ޖުމުލަ 64 ކުއްޖަކު ބައިވެރިވިއެވެ. ޕްރޮގުރާމް ނިމުނުއިރު، އެއްވެސް ދުވަހެއް ވައްޓާނުލައި ފަތިސް ނަމާދަށް ހާޒިރުވެވުނީ 38 ކުއްޖަކަށެވެ. މި ކުދިންނަށް ބައިސްކަލު ހަވާލުކުރުމުގެ ރަސްމިއްޔާތު ރޭ ތަޢާވުން މިސްކިތުގައި ވަނީ ބާއްވާފައެވެ.

މި ޕްރޮގުރާމާ ގުޅޭގޮތުން ދައުލަތުގެ މީޑިއާއަށް މަޢުލޫމާތު ދެއްވަމުން އިމާމު ޙުސައިން ރަޝީދު ވިދާޅުވީ، "މި ޕްރޮގުރާމް އަޅުގަނޑު ހިންގީ ކުޑަކުދިން ނަމާދު ކުރުމަށް ޝައުޤުވެރި ކުރުވުމަށާއި، ނަމާދަށް އިސްކަންދިނުމާއި ޝައުގުވެރިކަން އިތުރުކުރުމަށް" ކަމަށެވެ. އަދި މި ޕްރޮގުރާމްގެ ސަބަބުން ބެލެނިވެރިންވެސް ދަރިވަރުން ގޮވައިގެން ފަތިސް ނަމާދަށް އަންނަކަމަށާއި، ޕްރޮގުރާމަށް ފަހުވެސް ގިނަ އަދަދެއްގެ ކުދިން ނަމާދަށް ޝައުޤުވެރިވެ، ގިނަ ނަމާދުތަކަށް ޖަމާޢަތަށް އަންނަކަމަށް އޭނާ ފާހަގަކުރެއްވިއެވެ.

ކުޑަކުދިން ނަމާދުކުރުމަށް ހިތްވަރުދީ، އެކުދިންނަށް ތަފާތު ކުދި އިނާމުތައް ހުށަހަޅައިގެން ނަމާދުގައި ކިޔާ ތަކެތި ދަސްކޮށްދިނުމަށް އިސްލާމާއި ޤުރުއާން ކިޔަވައިދެއްވާ މުދައްރިސުން މަސައްކަތް ކުރާއިރު، އަމިއްލަ އަތުން ބޮޑު ޚަރަދެއްކޮށްގެން ގިނަ އަދަދެއްގެ ކުދިންތަކަކަށް އިނާމު ހުށަހަޅައިގެން ނަމާދަށް ޝައުޤުވެރިކުރުވުމަށް ޕްރޮގުރާމެއް ހިންގާނީ މަދު ބަޔެކެވެ. އެހެންކަމުން، މި ޕްރޮގުރާމަކީ އިހަވަންދޫގެ ކުޑަކުދިންގެ މެދުގައި ނަމާދަށް ޝައުޤުވެރިކަން އިތުރުކުރުމަށް އެޅުނު މުހިންމު ފިޔަވަޅެއް ކަމުގައި ބެލެވެއެވެ.