މިއީ އަމިއްލަ ޢާއިލާގެ ތެރޭގައި ހިނގާފައިވާ ކަމަކަށްވުމުން ކިޔައިދޭން އެހާ ފަސޭހައެއްވެސް ނޫނެވެ. ނަމަވެސް ކިޔައިނުދީ ވާކަށްވެސް ނެތެވެ. އެހެންވެ މިކިޔައިދެނީ ވަރަށް އަސަރާއިއެކުގައެވެ. 

އަޅުގަނޑަކީ ބޭރުފުށުގެ ސިފަ އެހައި ރީތި އަންހެނަކީމެއް ނޫނެވެ. އެހެންވެ ފިރިހެނުންގެ ކަޅިއެޅުން ވަރަށް ކުޑައެވެ. އެކަން ވިސްނޭތީ ކޮންމެހެން ކައިވެނިކުރުން އަވަސްކުރާކަށްވެސް ނުއުޅެމެވެ. ލޯބިވެރިއަކު ހޯދާކަށްވެސް ނުއުޅެމެވެ. ކެތްކޮށްލައިގެން އިނީއެވެ. 

އެހެންހުރެ 25 އަހަރުފުރުމުން ހިތުގައި ސުވާލެއް އުފެދުނެވެ. "ހަމަ އެއްވެސް ފިރިހެނަކު އަހަރެންނާއި ކައިވެނިކުރަން ޝައުޤުވެރިނުވަނީ ހަމަ އަހަރެންގެ ސިފަހުތުރުކަމުން ހެއްޔެވެ؟ އަހަރެން ރީތި ހަމަ އެއްވެސް ފިރިހެނަކު ނެތީ ހެއްޔެވެ؟" 

ބޮޑުދައިތަގެވެސް އަޅުގަނޑާއި އެއް ޢުމުރުގެ އަންހެންދަރިއަކު ހުރެއެވެ. އެއީ ވަރަށް ރީތި ކުއްޖެކެވެ. އެކުއްޖާއާއި ކައިވެނިކުރަން ވަރަށް ގިނަ މީހުން އުޅެއެވެ. ނަމަވެސް ކޮންމެވެސް ސަބަބެއް ދިމާވެގެން ކައިވެނިކުރުން ހުއްޓެނީއެވެ. އެހެންވެ ކޮންމެވެސް މީހަކު ގާތަށް ގޮސް ސިހުރު ފަންޑިތަ ހައްދުވާ ވާހަކަވެސް ގޭތެރެއިން އަޑުއިވެއެވެ. އެއިން އެއްވެސް އަޑެއް އިވޭކަމަކަށްވެސް ނުހަދަމެވެ. 

ކުރިން ބުނިފަދައިން 25 އަހަރުފުރުމުން ކައިވެނިކުރަން އަޅުގަނޑުވެސް ބޭނުންވާން ފަށައިފިއެވެ. އެކަމަށް އެދެވެން ފަށައިފިއެވެ. އެހެންކަމުން ހެޔޮލަފާ ބައިވެރިއަކު ދެއްވެވުން އެދި ދުޢާކުރަން  ފަށައިފީމެވެ. 

މާގިނަ ދުވަސްތަކެއް ނުވެ ބައިވެރިއަކު ލިބި ކައިވެނިކުރެވިއްޖެއެވެ. އޭނާއަކީ ވަރަށް ހެޔޮލަފާ ތަޤްވާވެރިއެކެވެ. ހަމަ ރީތިވެސް މީހެކެވެ. އެހެންވެ ދެއްވެވި ނިޢްމަތަށް ޝުކުރުވެރިވެ ތަޤްވާވެރިކަން އިތުރުކުރަން މަސައްކަތްކުރީމެވެ. ކައިވެނިކުރިތަނާހެން ބަލިވެވެސް އިނދެއްޖެއެވެ. އެކަމާއި ވަރަށް އުފާވިއެވެ. 

ދަރިފުޅު ވިހެއިތާ ކުޑަދުވަސްކޮޅެއްވީތަނާ މަންމަ ބަލިވެގެން ރުޤްޔާކުރަން މީހަކު ގެނައެވެ. އޭނާގެ ގާތުގައި ބޮޑުދައިތަ ކޮންމެވެސް ވާހަކަތަކެއް ދެއްކީމާ އެއްރޭ ބޮޑުދައިތަގެ ދަރިފުޅު އެނދުގައި ބާއްވާފައި ކިޔަވަން ފެށިއެވެ. ކިޔަވަން ފެށިތަނާ އޭނާގެ ބަނޑު ފުފި އެތެރޭގައި ކުއްޖަކު އުޅޭހެން ތަންތަނުން ފުއްޕަން ފަށައިފިއެވެ. 

އެމީހާ ބުންޏެވެ. ބިރު ނުގަނެ ސުވާލުކުރާށެވެ! "ކަލޭ އަހަރެންނާއި އަޅައިގަނެ ހަށިގަނޑުގެ ތެރެއަށް ވަދެގެން ތިއަ އުޅެނީ ކީއްވެގެން ހެއްޔެވެ؟" އެއިރު އޭނާ އޮތީ މުޅިން ހަމަހެއަކުވެސް ނޫނެވެ. އިރުކޮޅަކުން އޭނާ ބުންޏެވެ. "އޭނާ އެބުނަނީ އަހަރެންގެ މަންމަ، އަހަރެން ތަނަވަސް މީހަކާ ކައިވެނިކުރުވާށާ، ޖަމީލާ (އަޅުގަނޑު) އެއްވެސް މީހަކާ ކައިވެނިކުރިއަ ނުދޭން ހެއްދުވި ސިހުރެއް ނުބައިކޮށް ހެދީމާ އަހަރެންނާއި އަވަލަން ފުރުޞަތު ލިބުނީ ކަމަށެވެ." 

އެހެން ބުނާއިރަށް ބޮޑުދައިތަ އެތަނުގައި ހުރެފަ އެހަދަނީ ބޮޑު ދޮގެއް ކަމަށާއި އެބާވަތުގެ އެއްވެސް ކަމެއް ދުވަހަކުވެސް ނުކުރާކަމަށް ބުނެ އަޑުގަދަކުރަން ފަށައިފިއެވެ. މަންމަ އަޅުގަނޑުގެ އަތުގައި ހިފައިގެން ބޭރަށް ނުކުތީއެވެ. އަޅުގަނޑުމެން އެއްވެސް މީހަކު އެއްވެސް އެއްޗެއް ނުކިޔަމެވެ. 

ބޮޑުދައިތަގެ ދަރިފުޅު ރަނގަޅުކުރެވުނީ 3 މަސްދުވަހު ކުރި މަސައްކަތުންނެވެ. ރަނގަޅުކުރެވުނީމާ ބޮޑުދައިތައާއި ދަރިން އަމިއްލައަށް ބޮޑުދައިތަގެ ފިރިމީހާގެ ގެއަށް ބަދަލުވީއެވެ. 

މިވާހަކަ ކިޔައިދޭން މިޖެހުނީ ހަމަ މިފަދަ ކަމެއްގައި އަޅުގަނޑުގެ އެންމެ ގާތް އެކުވެރިޔާއަށް 3 ކައިވެނިކޮށްގެންވެސް ދިރިއުޅުމެއް ނުފެނިގެން އުޅުނިކޮށް އެނގުނީ އެކަން މެދުވެރިވަނީ ހަމަ ޢާއިލާގެ ތެރެއިން ކޮށްފައިވާ ކަމަކުން ކަމެވެ. ރުޤްޔާކޮށްގެން ސަލާމަތްވެވުނީ އެތައް ދުވަހަކުންނެވެ. އެތައް ބައިވަރު ފައިސާތަކެއް އެކަމަށް ޚަރަދުކުރި ފަހުންނެވެ. 

އަޅުގަނޑު ބުނެލަން ބޭނުންވަނީ އެހައި ބޮޑު ޙަރާމްކަމެއް އެކުރަނީ މަރުވާނެކަން ޤަބޫލުނުކުރެވޭތީކަމަށްވާނަމަ އެއީ ވަރަށް ހިތާމަހުރި ކަމެކެވެ. ދަރިން ކައިވެނިކުރުވަންވެސް އަދި އެހެން މީހަކު ކައިވެނިކުރަން ހުރަސް އަޅަންވެސް ސިހުރު ހެއްދުވުމަކީ ކިހައި ނުބައިކަންބޮޑު ފާފައެއްކަން ހަމަ ނުއެނގެނީހެއްޔެވެ؟ އަޅުގަނޑުގެ ދުޢާއަކީ މިފަދަ ނުބައި ކަންކަން ކުރުމުން ދުރުހެލިވެ ތިބުމުގެ ވިސްނުން އެންމެންނަށްވެސް ދެއްވެވުމެވެ. 

- ފަރީދާ / މިއަދުނޫހުގެ ކިޔުންތެރިއެއް