ބުނެވޭ ގޮތުގައި އެއީ ޒުވާން އެހެނަސް ތަޤްވާވެރި އަންހެނެކެވެ. ނޭވާލާން އުނދަގުވާތީ ހޮސްޕިޓަލަށް ގެންދިއުމުން އެޑްމިޓްކުރީއެވެ. އޭނާ އެދުނީ އެންމެ ކަމަކަށެވެ. އެއީ ކިޔަވާނެ މުޞްޙަފެއް އޭނާއަށް ދިނުމަށެވެ.  

އެކަންކޮށްދިނެވެ. ނަމަވެސް 2 ދުވަސްފަހުން ޑޮކްޓަރުން ބުނީ ކިޔަވާނަމަ ފުއްޕާމޭ ވަރުބަލިވާމިންވަރު ބޮޑުވާނެ ކަމަށާއި އެހައިގިނައިރު ނުކިޔެވުމަށެވެ. ނަމަވެސް އޭނާ އެކަން ޤަބޫލެއް ނުކުރިއެވެ. ދިއައީ ކިޔެވުނުހައި ގިނައަކުން ކިޔަވަމުންނެވެ.  

އޭނާ ނިޔާވީ މިއާޔަތް ކިޔަވަނިކޮށެވެ!  

"މުއުމިނުން ވާކަން ކަށަވަރީ، ﷲ ހަނދުމަކުރާހިނދު އެއުރެންގެ ހިތްތައް ބިރުވެތިވާ މީހުން ކަމުގައެވެ. އަދި އެކަލާނގެ (ބާވައިލެއްވި) އާޔަތްތައް އެއުރެންނަށް ކިޔައިދޭހިނދު، އެއުރެންގެ އީމާންކަން އިތުރުވާ މީހުން ކަމުގައެވެ. އަދި އެއުރެންގެ ވެރިރަސްކަލާނގެއަށް ވަކީލު ކުރާ މީހުން ކަމުގައެވެ." (އަލްއަންފާލް: 2)  

ނިޔާވިއިރު ޚަތިމް އޮތީ މޭމަތީގައެވެ. އޮތީ ދެއަތުން ޚަތިމް މެއާއިލައި ފިއްތާލައިގެންނެވެ، ނިޔާވުމުން 2 ނަރުހުން ވެގެން ޚަތިމް ނަގަން އުޅެއުޅެ ނުނެގުނެވެ. ޑޮކްޓަރުންނަށް ބުނަންޖެހުނީ އޭނާއަށް އަނިޔާ ނުކުރުމަށެވެ.  

މިއީ ފެނިފައިވާ ވީޑިއޯއެއްގައި ކަންތައްވީގޮތެވެ. އިތުރަށް ބުނާނެ އެއްޗެއް ނެތެވެ. ޙަޤީޤަތް މޮޅަށް ދެނެވޮޑިގެންވަނީ ﷲ ތަޢާލާއެވެ. އެނގޭ ކަމަކީ މިފަދަ ޢިބްރަތްތެރި އެތައް ޙާދިސާތަކެއް ކޮންމެ ދުވަހަކުވެސް ހިނގަމުންދާ ކަމެވެ.  

ކޮންފަދަ ހެޔޮ މަރެއް ހެއްޔެވެ؟ އޭނާ ނިޔާވީއެވެ. ހަށިގަނޑާއި ފުރާނަ ވަކިވީއެވެ. އޭނާ ދަތުރުއެކުރީ ﷲ ތަޢާލާގެ ޙަޟްރަތަށެވެ. ﷲ ތަޢާލާގެ ތަނަވަސް ރަޙްމަތަށެވެ. ދުޢާއަކީ އޭނާއަށް ޖަންނަތުލްފިރުދައުސް މިންވަރުކުރެއްވެވުމެވެ.