ޖޭޕީގެ ލީޑަރު، މާމިގިލި ދާއިރާގެ މެންބަރު ޤާސިމް އިބްރާހީމް ފުރިހަމައަށް މަޖިލީހުގެ ރިޔާސަތު ބަލަހައްޓަވާނެ ކަމާއިމެދު ޝައްކު ނުކުރައްވާކަމަށް ވިދާޅުވެ ޤާސިމް އިބްރާހީމަށް ރައީސް މުޙައްމަދު ނަޝީދު މަރުޙަބާ ވިދާޅުވެއްޖެއެވެ.

"ގުޅިފައިވާ ޕާޓީތަކުގެ މަޖލިސް މެންބަރުން ވަނީ ޖޭޕީގެ ލީޑަރު އޮނަރަބްލް ޤާސިމް އިބްރާހީމް މަޖިލީހުގެ ރައީސް ކަމަށް ގެނައުމަށް ވޯޓު ދެއްވުމަށް އެއްބަސްވެލައްވާފަ. އޮނަރަބްލް ޤާސިމް އިބްރާހީމް ފުރިހަމައަށް މަޖިލިސް ރިޔާސަތު ބަލަހައްޓަވާނެ ކަމާއިމެދު އަޅުގަނޑު ޝައްކެއް ނުކުރަން. މަރުޙަބާ އޮނަރަބްލް ޤާސިމް އިބްރާހީމް!"

މަޖިލީހުގެ ރިޔާސަތު ބެލެހެއްޓުމުގެ ޤާބިލުކަން ލިބިވަޑައިގެން ހުންނެވިކަން ޤާސިމް އިބްރާހީމް ވަނީ ރައްޔިތުންނަށް ސާބިތުކޮށް ދެއްވަވައިފައެވެ. ފެހި ޤާނޫނު އަސާސީ އެކުލަވައިލި ރައްޔިތުންގެ ޚާއްޞަ މަޖިލީހުގެ ރައީސް ކަމާއި އެމަނިކުފާނު ޙަވާލުވެ ވަޑައިގަތީ 3 އަހަރުވީއިރުވެސް ލިޔާނެ ހަމަ އެންމެ އަކުރެއްވެސް ޑްރާފްޓް ނުކުރެވި އޮއްވައެވެ. އެމަނިކުފާނުވަނީ އަހަރަކާއި ކުޑަ ދުވަސްކޮޅެއްގެ ތެރޭގައި މުޅި ޤާނޫނު އަސާސީ އެކުލަވާލައްވައި ނިންމަވައިފައެވެ.

އެންމެ ބޮޑަށް ފާހަގަކުރަންޖެހޭ އެއް ކަމަކީ އެމަސައްކަތް ކުރެވިގެންދިއައީ ވަރަށް ވާދަވެރި ދެފިކުރެއްގެ މެދުގައި ކަމަށްވުމުގެ އިތުރުން މަޖިލީހުގެ މެޖޯރިޓީ އެއިރު އޮތީ، ޤާނޫނު އަސާސީ އެކުލަވައިލަން އެއިރު ކުރެވުނު މަސައްކަތްތަކާއި އެއްކޮޅު ފިކުރެއްގައި ނޫންކަމެވެ.

އެފަދަ މާހައުލެއްގެ ތެރެއިން އެ މަސައްކަތްތައް އެހައި އަވަހަށް ކުރައްވައި ނިންމެވުމުން "އެއީ ދެވަނަ ބޭފުޅަކަށް ކުރެއްވޭނެ މަސައްކަތެއް ނޫން" ކަމަށް ގިނަ ބައަކު ވަނީ ބުނެފައެވެ. އެއިގެ ތެރޭގައި ޤާސިމް އިބްރާހީމްގެ ސިޔާސީ ވާދަވެރިންވެސް ހިމެނިވަޑައިގަންނަވައެވެ.

މަޖިލީހުގެ ރައީސް ކަމަށް ޤާސިމް އިބްރާހީމް ގެނައުމަށް ކޯލިޝަނުގެ ޕީޖީ ގްރޫޕުން ނިންމީ އިންތިޚާބީ ރައީސް އިބްރާހީމް މުޙައްމަދު ޞާލިޙް ވެސް ބައިވެރިވެވަޑައިގެންނެވި ބައްދަލުވުމެއްގައެވެ. އަދި އެނިންމުން އިއުލާނު ކުރެއްވީވެސް އިންތިޚާބީ ރައީސް އިބްރާހީމް މުޙައްމަދު ޞާލިޙް އެވެ.

Gulhifaivaa party thakuge Majlis memberun vanee JP leader Hon. Gasim Ibrahim, Majlis Raees kamah geneumah vote dhevvumah ehbas velavvaafa. Hon. Gasim furihama ah Majlis riyaasath balahattavaane kamaai medhu alhugandu shakkeh nukuran. Marhaba Hon. Gasim

— Mohamed Nasheed (@MohamedNasheed) October 29, 2018