ހައްދުފަހަނައަޅާފައިވާ ޔަހޫދީ ޓެރަރިސްޓުން ފަލަސްޠީނަށް މެދުކެނޑުމެއް ނެތި ދެމުން ގެންދާ ޢުދުވާނީ ޓެރަރިސްޓް ޙަމަލާތަކާއި ގުޅިގެން ގިނަ ބައަކު ތިބީ ވަރަށް ބޮޑު މާޔޫސްކަމެއްގައެވެ. ޚާއްޞަކޮށް މުސްލިމުން މިއަދު މިތިބީ އިންތިހާއަށް ކަންބޮޑުވެފައެވެ. މިޙާލަތުން ފަލަސްޠީނުގެ ރައްޔިތުންނަށް އަރައިގަނެވޭނެ ކަމާއިމެދު ގިނަ ބައެއްގެ ހިތުގައި ވަނީ ޝައްކު އުފެދިފައެވެ. ނަމަވެސް އެއީ ޝައްކުކުރަންޖެހޭ ކަމެއް ނޫނެވެ. މާތް ﷲ ގެ ވާގިފުޅާއިއެކު ފަލަސްޠީނުގެ ރައްޔިތުން ކާމިޔާބުކުރާނެއެވެ. 

ނިކަން ވިސްނައިލަބަލާށެވެ! ފަލަސްޠީނުގެ ރައްޔިތުންނަށް އެހީތެރިވުމުގައި އެންމެ ކުރީ ސަފުގައި އެތިބީ މުސްލިމުންނެއް ނޫނެވެ. ހުރިހާ ދީންތަކެއްގެ މީހުންނެވެ. ހައްދުފަހަނައަޅާފައިވާ ޔަހޫދީން ފަލސްޠީނުގެ ރައްޔިތުންނަށް ދެމުން ގެންދާ ޢުދުވާނީ ޙަމަލާތަކާި ދެކޮޅަށް އަޑު އުފުލުމާއި މުޒާހަރާތައް ކުރުމުގައި އިސްކޮށް އެތިބީ އެހެންދީންތަކުގެ މީހުންނެވެ. ހައްދުފަހަނައަޅާފައިވާ ޔަހޫދީންނާއި ދެކޮޅަށް ފިޔަވަޅު އެޅުމުގައިވެސް އިސްކޮށް އެތިބީ އެހެން ދީންތަކުގެ މީހުންނެވެ. ހައްދުފަހަނައަޅާފައިވާ ޔަހޫދީންނާއި ދެކޮޅަށް ދުނިޔޭގެ ކޯޓަށް މައްސަލަ ވެއްދީވެސް އެހެންދީންތަކުގެ މީހުންނެވެ. އަދި މިއަދުވެސް އިތުރު މައްސަލަތައް ވައްދަމުން އެގެންދަނީވެސް އެހެން ދީންތަކުގެ މީހުންނެވެ. 

ވިސްނާލަންޖެހެނީ އެގޮތަށް އެކަންކަން ވަމުން އެދަނީ ކީއްވެގެން ހެއްޔެވެ؟ ފަލަސްޠީނުގެ ރައްޔިތުންގެ ދިފާޢުގައި މުސްލިމުން ނޫން މީހުން އެހައި ބޮޑު ދައުރެއް އަދާކުރަމުން އެގެންދަނީ ކީއްވެގެން ހެއްޔެވެ؟ އެކަމަށް އެމީހުންގެ ޝައުޤުވެރިކަން އެހައި ބޮޑުވެގެންދިއައީ ކީއްވެގެން ހެއްޔެވެ؟ 

އެއްވެސް ޝައްކެއް ނެތެވެ. އެކަން އެގޮތަށްވެގެން އެދިއައީ އެގޮތަށް އެކަން ވުމަށް ﷲ ތައާލާ މިންވަރުކުރެއްވެވީތީއެވެ. ދެން އުފެދޭނެ ސުވާލަކީ ޙާޞިލްކުރަންޖެހޭ ޢިބްރަތަކީ ކޮބައިހެއްޔެވެ؟ ސުވާލުގެ ޖަވާބަކީ ﷲ ތަޢާލާ އެގޮތަށް އެކަން މިންވަރުކުރައްވަވައިފިނަމަ މުސްލިމުން ނޫން މީހުންވެސް މުސްލިމުންގެ ދިފާޢުގައި ނުކުންނާނެ ކަމެވެ. ﷲ ތަޢާލާގެ ދީނާއި މުސްލިމުންނަށް ﷲ ތަޢާލާ ނަޞްރު ދެއްވަވާނެ ކަމެވެ. 

ހަމަ އެއާއިއެކު ބަލައިލަންވީ ހައްދުފަހަނައަޅާފައިވާ ޔަހޫދީ ޓެރަރިސްޓުންގެ އަނިޔާވެރިކަން ބޮޑުވުމުން ފެނިގެން ދިއަ ދެވަނަ ނަތީޖާއަށެވެ. ދުނިޔޭގެ ކަންކޮޅުތަކުގައި އިސްލާމް ދީނާއި މުސްލިމުންގެ ޙަޤީޤަތް ނުއެނގިތިބި އެތައް މިލިއަން ބައަކަށް އިސްލާމްދީނާއި މުސްލިމުންގެ ޙަޤީޤަތްތައް ވަރަށް ރަނގަޅަށް އެނގިގެން ހިގައްޖެއެވެ. ކޮންމެ ގޮތަކަށް ވިސްނިގެން ނަމަވެސް އަދި ކޮންމެ ނަމެއް ކިޔާފައި ނަމަވެސް އިސްލާމް ދީނާއި މުސްލިމުންގެ ދިފާޢުގައި އެތައް މިލިއަން ބައަކު ނުކުމެއްޖެއެވެ. ގިނަ ބައަކު އިސްލާމް ދީނަށް ރުހުންދީފިއެވެ. ގިނަ ބައަކު އިސްލާމްދީން އިޚްތިޔާރުކޮށްފިއެވެ. 

އިސްލާމް ދީނަށް ކަނޑައެޅިގެން ފައުޅުގައި ނަފްރަތުކުރަމުން ދިއަ ޤައުމުތަކުގައި މުސްލިމުންނާއި އެއްކޮޅަށް، މުސްލިމުންގެ ދިފާޢުގައި އަޑު އުފުލަމުން އަންނަކަމީ ޢާދައިގެ ކުޑަކުޑަ ކަމެއް ކަމަށް ހީވެސްނުކުރާށެވެ! އެއީ އެއަށްވުރެ މާބޮޑު ކަމެކެވެ. 

މިވާހަކަތައް ދެއްކުމުގެ ބޭނުމަކީ މާޔޫސްކަމުގައި މުސްލިމުންނަށް ހިތްވަރު ދިނުމެވެ. މިވަޤުތު ހިތްދަތިކަމުގައި ނިކަމެތިވެފައި ތިބިނަމަވެސް މާތް ﷲ މުސްލިމުންނަށް ނަޞްރު ދެއްވަވާނެ ކަމާއި މިހާރުވެސް ގެންދަވަނީ ނަޞްރު ދެއްވަވަމުންކަން ޔަޤީންކޮށްދިނުމެވެ. 

އަޅުގަނޑުމެން ދިވެހިން ބަލަންވީ ފަލަސްޠީނުގެ ރައްޔިތުންނަށްޓަކައި އަޅުގަނޑުމެންނަށް ކޮށްދެވެންހުރި ކަންކަން ކުރުމަށެވެ. ފުރަތަމަ ކަމަކަށް ދުޢާކުރުން ގިނަކުރަންވީއެވެ. ގިނަގިނައިން ދުޢާކުރަންވީއެވެ. ދެވަނަ ކަމަކަށް މާލީ ގޮތުން ތަނަވަސްކަން ހުރި މިންވަރަކުން ކޮންމެ މީހަކުވެސް ފަލަސްޠީނުގެ ރައްޔިތުންނަށްޓަކައި އެހީތެރިވެދޭންވީއެވެ. ބޯނެ ފެންފޮދެއް، ކާނެއެއްޗެއް ނުލިބި ހައިޙޫނުކަމުގައި ތިބެ މަރުވާން ދޫކޮށްނުލަންވީއެވެ. 

އަތުގައި ހޭދަކުރެވެން އޮތް މިންވަރު މަދުވެގެން ކަންބޮޑުވެނުލައްވާށެވެ! މިވަގުތު އެންމެ ޕާންފޮތްޗެއް ނުވަތަ ބަނަހަކީވެސް ފަލަސްޠީނުގެ ރައްޔިތުންނަށް އަގުބޮޑު ބިރިޔާނި ތަށްޓެއް ފަދަ އެއްޗެކެވެ. ބަލަންވީ ތިމާގެ ސަބަބުން އެންމެ ޕާންފޮތްޗެއް ނަމަވެސް ދިއްކޮށްލެވޭތޯއެވެ. އެއިރުން އެއޮތީ ހަމަ އެންމެ މަތިވެރި ހޭދައެއް ކުރެވިފައެވެ. އެކަމަށް ޙައްޤު ޖަޒާ ﷲ ތަޢާލާ އެމީހަކަށް ދެއްވަވާނެތެވެ. އިން ޝާ ﷲ   

ފެންނަމުންދާ ބޮޑު މަންޒަރަށް ބަލައިފިނަމަ ހައްދުފަހަނައަޅާފައިވާ ޓެރަރިސްޓް ޔަހޫދީން ފަލަސްޠީނުގެ ރައްޔިތުންނަށް ކުރާ އަނިޔާތަކާ ގުޅިގެން މުސްލިމުންނަށާ އިސްލާމް ދީނަށް މިހާރުވެސް މިވަނީ މިއިން ޒަމާނަކުވެސް ނުލިބޭވަރުގެ ބޮޑު ނަޞްރެއް ލިބިފައެވެ. މުސްލިމުންގެ ދިފާޢުގައި އެހެން ދީންތަކުގެ މިހައި ގިނަ ބައަކު މީގެ ކުރިން ނުކުމެފައި ނެތުމުންނެވެ. މިހައި ގިނަ ބައަކު އިސްލާމް ދީނުގެ ކަންކަން އޮޅުންފިލުވައި އިސްލާމް ދީނަށް ރުހިފައި ނެތުމުންނެވެ.