އައްޑޫ ސިޓީގެ ބިން ހިއްކުމާއި، ގޮނޑުދޮށް ހިމާޔަތްކުރުމާއި، ހަންކެޑެ ބްރިޖު މަސައްކަތް ނިންމާ ދިވެހި ސަރުކާރާ ހަވާލުކޮށްފިއެވެ. މި މަޝްރޫޢުތަކުގެ ނިމުން އިފްތިތާޙުކޮށްދެއްވީ އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖަޔަޝަންކަރާއި، ރާއްޖޭގެ ޚާރިޖީ ވަޒީރު މޫސާ ޒަމީރުގެ އިތުރުން ޢިމާރާތްކުރުމާއި ބިނާވެށި ބެހޭ ވަޒީރު ޑރ. ޢަބްދުﷲ މުއްޠަލިބެވެ.

އައްޑޫ ސިޓީގެ މަގު ހެދުމުގެ މަސައްކަތް ހަވާލުކޮށްފައިވަނީ ތިލަފުށި-މާލެ ބްރިޖު ހެދުމުގެ މަސައްކަތްވެސް ހަވާލުކޮށްފައިވާ އިންޑިއާގެ އެފްކޮންސް ކުންފުންޏާއެވެ. އައްޑޫ ސިޓީގެ އެތެރޭގެ މަގުތައް ހިމެނޭހެން މުޅި މަޝްރޫޢަށް 1.19 ބިލިޔަން ރުފިޔާ ޚަރަދުކުރެއެވެ.

ބިން ހިއްކުމުގެ މަޝްރޫޢުގެ ދަށުން ވަނީ 184.3 ހެކްޓަރުގެ ބިން ހިއްކާފައެވެ. މީގެ ތެރޭގައި ހިމެނެނީ ހިތަދޫން ހިއްކި 80 ހެކްޓަރުގެ ބިމާއި، މަރަދޫން ހިއްކި 76 ހެކްޓަރުގެ ބިމާއި، މަރަދޫ ފޭދޫން ހިއްކި 3.3 ހެކްޓަރުގެ ބިމެވެ. އަދި ފަތުރުވެރިކަމަށް ޚާއްޞަކޮށް ހިއްކި 8.3 ހެކްޓަރުގެ 3 ރަށްވެސް ހިމެނެއެވެ.

އައްޑޫ ހިއްކި ސަރަޙައްދު ހިމާޔަތްކުރުމުގެ މަޝްރޫޢުގެ ދަށުން ވަނީ 7 ކިލޯ މީޓަރުގެ ސަރަހައްދެއްގައި ރިވެޓްމަންޓް ޖަހާ ހިމާޔަތްކޮށްފައެވެ.

ހަންކެޑެ ބްރިޖްގެ ޢަމަލީ މަސައްކަތް ފެށީ 2021 ވަނަ އަހަރުގެ އޮކްޓޯބަރު މަހުއެވެ. 1.463 ކިލޯމީޓަރުގެ މި ބްރިޖަކީ، 4 ލޭނަށް ތަރައްޤީކުރާ ބްރިޖެކެވެ.

މި މަޝްރޫޢުތަކުގެ ނިމުމާއެކު އައްޑޫ ސިޓީގެ ތަރައްޤީއަށް ބޮޑު ކުރިއެރުމެއް ލިބި، ރައްޔިތުންނަށް އިތުރު ފުރުޞަތުތަކެއް ހުޅުވިގެންދާނެ ކަމަށް ބެލެވެއެވެ.