އައްޑޫ ސިޓީގައި މަގު ހެދުމުގެ ދެވަނަ ފިޔަވަހި ފެށުމަށް ސަރުކާރުން ތައްޔާރުވަމުން އަންނަ ކަމަށް އިމާރާތްކުރުމާއި ބިނާވެށި ތަރައްޤީކުރުމުގެ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

ދައުލަތުގެ މީޑިއާއަށް މަޢުލޫމާތު ދެއްވަމުން ވަޒީރު ވިދާޅުވީ، ސަރުކާރުން މަސައްކަތް ކުރަމުންދަނީ އައްޑޫގެ މަގު ހެދުމުގެ ދެވަނަ ފިޔަވަހީގެ މަސައްކަތް ކުރިއަށް ގެންދިއުމަށް ކަމަށެވެ. މި މަސައްކަތުގައި ޚާއްޞަ އިސްކަމެއް ދޭނީ އައްޑޫ ލިންކް ރޯޑުގެ މަސައްކަތަށް ކަމަށް ވަޒީރު ފާހަގަކުރެއްވިއެވެ.

"ފޭސް ޓޫއެއް އަންނަން ޖެހޭ މަގު ހެދުމަށް. ބާކީ ހުރި މަގުތައް ހެދެންޖެހޭ. ހަމައެއާއެކު އައްޑޫގެ ލިންކް ރޯޑުގެ މަސައްކަތަކީ ކޮންމެހެން ކުރަންޖެހޭކަމެއް،" ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، އައްޑޫ ލިންކް ރޯޑަކީ 20 އަހަރަށްވުރެ ގިނަ ދުވަސްވެ، ވަރަށް ބޮޑަށް ހަލާކުވެފައިވާ މަގެއް ކަމަށާއި، އައްޑޫގެ ތަރައްޤީއަށްޓަކައި މި މަގު ފުޅާކޮށް ރަނގަޅު ފެންވަރަކަށް ތަރައްޤީކުރުމަކީ ވަރަށް މުހިންމު ކަމެއް ކަމަށެވެ. އަދި ސަރުކާރުން ލިންކް ރޯޑު އަލުން ތަރައްޤީކުރުމާއެކު، އައްޑޫގެ އެހެނިހެން މަގުތަކުގެ މަސައްކަތްތައްވެސް ކުރިއަށް ގެންދިއުމަށް ބޮޑު އިސްކަމެއް ދޭނެ ކަމަށް ވަޒީރު ވިދާޅުވިއެވެ.

ފޭދޫން ފެށިގެން ހިތަދުއާ ހަމައަށް އޮންނަ އައްޑޫ ލިންކް ރޯޑަކީ 2003 ވަނަ އަހަރު ބޭނުން ކުރަން ފެށި މަގެކެވެ. މި މަގު އަލުން ތަރައްޤީކުރުމުގެ މަސައްކަތް ފެށުމުން، އައްޑޫ ސިޓީގެ ރައްޔިތުންނަށް ލުއިފަސޭހަކަމާއެކު ދަތުރުފަތުރު ކުރެވޭނެ ކަމަށް ބެލެވެއެވެ.