އެއީވެސް ހަމަ ލޯބިން އެކުގައި ދިރިއުޅެމުންދިއަ ދެމަފިރިންނެވެ. ދިރިއުޅެމުން ދަނިކޮށް އަނބިމީހާގެ އުނގަނޑަށް ތަދެއް އަރާފައި ދެފައިން ވާގިދިއައީއެވެ. ޑޮކްޓަރުން ބުނީ ރަނގަޅުވުމުގެ ފުރުޞަތު އެބައޮތް ކަމަށާއި ނަމަވެސް ވަރަށް ފަރުވާތެރިކަމާއިއެކު ކަސްރަތުތަކެއް ކުރަންޖެހޭނެ ކަމަށެވެ. ކުރަންޖެހޭނެ ކަސްރަތުތައްވެސް ބުނެދިނެވެ. 

ގެއަށް އައުމަށްފަހު އަނބިމީހާއަށް އެހީތެރިވުމުގެ ބަދަލުގައި އަނިޔާވެރިވުން ނޫން ކަމެއް ނުކުރެއެވެ. ލޯބިން ވާހަކަދެއްކުމުގެ ބަދަލުގައި އެއްޗެތި ގޮވުން ނޫން ކަމެއް ނުކުރެއެވެ. ދެން ދުވަހަކުވެސް ނުހިނގޭނެ ކަމަށާއި މަރުވާނީވެސް ފުރޮޅުލީ ގޮނޑިއެއްގައި އިންދައިކަމަށްވެސް ބުނެއެވެ. އެންމެ ފަހަރަކުވެސް ކަސްރަތުކޮށްދޭން އެއްވެސް ކަމެއް ނުކުރެއެވެ. 

އެވަރުން ފުއްދައިލީއެއްވެސް ނޫނެވެ. ލޯބިވެރިއަކު ހޯދުމަށްފަހު އަނބިމީހާ ގެއިން ނެރެ މަގުމައްޗަށް އެއްލައިލީއެވެ. އެންމެ އަނިޔާވެރިގޮތުގައި ގޮނޑިން ބިންމައްޗަށް ވައްޓައިލީއެވެ. މަންޒަރު ބަލަންހުރި އަވަށްޓެރިއަކު ބާރަށް ގޮސް އޭނާ ނަގައިގެން އެގެއަށް ގެންގޮސް އެހީތެރިވާން ފެށިއެވެ. އޭނާގެ ބައްޕައަކީ ތެރަޕިސްޓަކަށްވުމުން ބައްޕަލައްވައި ތެރަޕީވެސް ދޭންފެށިއެވެ. ޒުވާނާޢާއި އޭނާގެ ބައްޕަ އަންހެންމީހާއަށް އެހީތެރިވީ އިންސާނިއްޔަތަށްޓަކައެވެ. 

އެއިގެ އަހަރެއްހައި ދުވަސްފަހެވެ. ކާރަކުން ޖެހި ލިބުނު އަނިޔާތަކުގައި ފިރިމީހާގެ ދެފައި ކަކުލާއި ހަމައިން ބުރިކޮށްލަން ޖެހުނެވެ. އެހާލުގައި އޭނާ ބަލަންޖެހުމުން ދެވަނަ އަނބިމީހާ އޭނާއާއިމެދު ކަންކަންކުރީ އޭނާ އޭނާގެ ފުރަތަމަ އަނބިމީހާއަށް އޭނާ ކަންކަންކުރި ގޮތަށެވެ. ބުނަމުން ދިއައީ އޭނާ އަނބިމިހާއަށް ބުނިފަދަ ބަސްތަކެވެ. ކާންވެސް ނުދެއެވެ. އެހެންވެ ޖެހެނީ ފުރޮޅުލީ ގޮނޑީގައި ނުކުމެ ސަލާންޖަހާށެވެ. 

އެފަދަ ޙާލުގައި މަގުމަތީގައި އިންދާ އެއްދުވަހަކު އޭނާއަށް ފެންނަނީ ފުރަތަމަ އަނބިމީހާ ވަރަށް ސްމާޓްކޮށްހުރެ ހިނގަމުން އަންނަތަނެވެ. ވަރަށް ބޮޑު ޙައިރާންކަމެއް ލިބިފައި އިންދާ އަރާހަމަވުމުން ގޮވައި ހުއްޓުވާފައި ހިނގުނު ގޮތާއިމެދު ސުވާލުކުރުމުން އެކަން މެދުވެރިވި ގޮތް ކިޔައިދިނެވެ. އިންސާނިއްޔަތަށްޓަކައި އޭނާއަށް ބައަކު އެހީތެރިވީކަމަށް ބުންޏެވެ. އަދި އަލުން ހިނގުމުގެ ފުރުޞަތު ލިބި އޮފީހަށް މިދެވެނީ ފިރިމީހާ އޭނާއަށް އަނިޔާވެރިވެ މަގުމައްޗަށް އެއްލައިލުމުން ކަމަށްވެސް ބުންޏެވެ. އެހެންވެ އެކަމަށްޓަކައި ފިރިމީހާއަށް ޝުކުރުވެސް އަދާކުރިއެވެ. 

ދެން އޭނާއަށް ކަންކަން މެދިވެރިވިގޮތާއި ސަލާންޖަހަން ނުކުންނަން ޖެހުނު ސަބަބުވެސް ކިޔައިދިނެވެ. ވަރަށް ބޮޑަށް މާފަށް އެދި އަލުން އޭނާއާއި ގުޅި އެހީތެރިވެދިނުން އެދި އާދޭސް ކުރިއެވެ. ޖަވާބުގައި ބުނީ "އިންސާނުން ޙާލުގައި ޖެހުމުން ވަލުޖަނާވާރުންނަށްވުރެވެސް ދަށުފދަރަޖައިގައި ކަންކަންކުރާ އަނިޔާވެރިންނަށް އެހީތެރިވެދީގެން ކުރާނެ އެއްވެސް ފައިދާއެއް ނުއޮންނާނެއެވެ. ނަމަވެސް ކަލެއަށް ހެޔޮ ދުޢާކުރަމެވެ." ބުނެފައި އޭނާ ދިއައީއެވެ. 

އެއިގެ ދުވަސްކޮޅެއްފަހުން އޭނާއަށް އެހީތެރިވެދިން ޒުވާނާ އެނާއާއި ކައިވެނިކުރިއެވެ. ދެމީހުން އުފަލުގައި ދިރިއުޅެމުން ބާޒާރަށް ދިއަ ދުވަހަކު އަނެއްކާވެސް ކުރީގެ ފިރިމީހާ ސަލާންޖަހަން އިންދައި ފެނުނެވެ. ފެނުނު ނަމަވެސް ފެނުނު ކަމަށްވެސް ނުހަދައި ދިއައީއެވެ. ދެމީހުން ލޯބިން އެކުގައިދާ މަންޒަރު ބަލަން އޭނާ އިނެވެ. 

މިއީ އަޅުގަނޑު ބެލި ފިލްމެއްގެ ކުރު ޚުލާޞާއެކެވެ. އަޅުގަނޑަށް ޤަބޫލުކުރެވެނީ އަނބިން ބަލިހާލުގައި ޖެހުމުން އަނިޔާވެރިވާ ފިރިންނަށް މިވާހަކައިން ޢިބްރަތެއް ޙާޞިލުކުރެވޭނެ ކަމަށެވެ. ހަމައެކަނި ފިރިންނަކަށްވެސް ނޫނެވެ. ފިރިންނަސް ބަލިޙާލު ޖެހުމުން އަނިޔާވެރިވާ އަނބިންނަށްވެސްމެއެވެ. 

- ޝިފޫ / މިއަދުނޫހުގެ ކިޔުންތެރިއެއް