އާދެ، މިއަދަކީ ނަޞްރުގެ ދުވަސް. ނަޞްރުގެ ދުވަސް މި ނިސްބަތްވެގެންދަނީ، މި ޤައުމުގެ ދިފާޢުގައި ހަނގުރާމަކޮށް، ޝަހީދުވެގެންދިޔަ އަބްޠާލުންނާއި އަދި އެ ދުވަހު ހިތްވަރާއެކުގައި ހަނގުރާމަ ކުރެއްވި، މިއަދުވެސް ދުނިޔޭގައި ތިއްބެވި ފަޚުރުވެރި އަބްޠާލުންނަށް.

ނިޝާން ޢަސްކަރީގެ ވެރިކަން، މި ޢިއްޒަތުގެ ލަޤަބް، އެކަމަށް ވެލް ޑިޒަރވްޑް (ހަޤީޤަތުގައިވެސް ޙައްޤު) ބޭފުޅަކަށް، މޫސާ ޢަލީ ޖަލީލަށް އެރުވުމުގެ އުފާ އަޅުގަނޑަށް ލިބުނީތީ، އަދި އެކަމަށްޓަކައި އެ މަނިކުފާނުވެސް މިތަނުގައި ވަޑައިގެން އިންނެވި ކަމަށްޓަކައި އެއީވެސް މި މެހެފިލަށް ލިބިގެންދާ ޚާއްޞަ ކަމެއް. އެ ޝަރަފް ލިބިވަޑައިގެންނެވި ކަމަށްޓަކައި މޫސާ ޢަލީ ޖަލީލަށް މަރުޙަބާ ދަންނަވަން. 

އާދެ، އަޅުގަނޑުމެން މިކަހަލަ ބައްދަލުވުންތައް، މިކަހަލަ މުހިންމު ދުވަސްތައް މި ފާހަގަކުރަނީ ކީއްކުރަންތޯ؟ އަޅުގަނޑު ކުރިން ދުވަހެއްގައިވެސް، ޤައުމީ ދުވަހުވެސް މި ވާހަކަ ދެންނެވިން. އަޅުގަނޑުމެންނަށް ކިތަންމެ ގިނަ ބައްދަލުވުންވެސް ބޭއްވިދާނެ. ކިތަންމެ ދުވަސްތަކެއް ފާހަގަކުރެވިދާނެ. އެހެން ނަމަވެސް، އެއިން އަސަރެއް ކުރަންޖެހޭނެ. އެއިން ޤައުމަށް ފައިދާއެއްވާންޖެހޭނެ. ކޮން ފައިދާއެއްތޯ؟ އަޅުގަނޑުމެންގެ ޤައުމުގެ އަބްޠާލުން، އެ ކުރެއްވި ޖިހާދުގެ، އެ ޖިހާދުން ކުރިއަށް އޮތް މުސްތަޤްބަލަށް ފައިދާއެއް ކުރަންޖެހޭނެ. އެހެންވެގެން މި ބައްދަލުވުންތައް މި ބާއްވަނީ. 

ނޮވެންބަރު 3، 1988 ގައި އަޅުގަނޑުމެންނަށް ކުރިމަތިވި ޢުދުވާނީ ޙަމަލާއާއި، އެ ޙަމަލާއިން ސަލާމަތްވުމަށް ހަނގުރާމަ ކުރެވުނު ގޮތާއި، މި ހުރިހާ ކަމަކުން ފިލާވަޅު ލިބިގަނެ، އަދުގެ ޖީލު މާދަމާއަށްޓަކައި މި ޤައުމަށް ފޯރުކޮށްދިނުމުގައި ފިލާވަޅުތަކެއް ނެގުން، މި ބައްދަލުވުމުގެ މުހިންމު ކަމަކީ. ބޭނުމަކީ ޙަޤީޤަތުގައި. އެއީ، ޙަޤީޤަތުގައި އަޅުގަނޑުމެންގެ ބޮލުގައި އެޅިފައިވާ ޒިންމާއެއް.

އަޅުގަނޑު މީގެ އަހަރެއްހާ ދުވަސް ކުރިން، ރައްޔިތުން އަޅުގަނޑާ ހަވާލުކުރި ޒިންމާއާ ހަވާލުވި ދުވަހު ދެންނެވިން، ޤައުމުގެ މިނިވަންކަން ޙިމާޔަތް ކުރުމަކީ އަޅުގަނޑަށް ލިބޭނޭ އެންމެބޮޑު ފަޚުރޭ. އަދި ޒިންމާއޭ. އިރާދަކުރެއްވީތީ މިއަދާ ހަމަޔަށް އައިއިރުގައި، އަޅުގަނޑު އެ ދުވަހު އެ ދެންނެވި ގޮތަށް، ކޮންމެ ދުވަހެއްވެސް ހޭދަ މިކުރަނީ، ޤައުމުގެ މިނިވަންކަން ޙިމާޔަތް ކުރުމަށްޓަކައި. ޤައުމުގެ ޢަސްކަރީ ބާރު ވަރުގަދަކޮށް، ކުރިއަށް އޮތް ދުވަސްތަކަށް ފޯރުކޮށްދިނުމަށްޓަކައި. ދިފާޢީ ބާރު ވަރުގަދަކުރުމަށްޓަކައި.

އާދެ، މިދިޔަ އަހަރެއްހާ ދުވަހުގެތެރޭގައި، ސިފައިންގެ ވަރުގަދަކުރުމަށް ނުހަނު ގިނަ މަސައްކަތްތަކެއް ވަނީ ކުރެވިފައި. އޭގެ ކުރީގެ އަހަރުތަކުގައިވެސް ވަރަށްގިނަ މަސައްކަތް ކުރެވިފައި ހުރީ. އެހެން ނަމަވެސް، މި ޒަމާނަށް ފެތޭގޮތަށް އަދި ކުރިއަށް އޮތް ދުވަސްތަކަށް މުހިންމު ފެންވަރަކަށް ވަރުގަދަކުރަން ޖެހިފައި އޮތީ. އެހެންވީމާ، އެގޮތުން އެއާކޯ ޤާއިމުކުރެވުނު. މިޒަމާނުގެ އެންމެ ޒަމާނީ ޓެކްނޮލޮޖީ ހިމެނޭ ޔޫ.އޭ.ވީތައް ގެނެވި، އަޅުގަނޑުމެންގެ ބޮޑު އިކޮނޮމިކް ޒޯން އަބަދުވެސް ބެލެހެއްޓޭނެ ފަދަ ޤާބިލިއްޔަތު، އިރާދަކުރެއްވީތީ އަޅުގަނޑުމެންގެ ސިފައިން ކިބައިގައި ޤާއިމުކުރެވިގެންދިޔަ. އަދި އެ މަޝްރޫޢު އިތުރަށް ފުޅާކުރެވިގެން އެދަނީ.

ހަމައެއާއެކީގައި، މިއަދު އަޅުގަނޑުމެންނަށް ފެނިގެންދިޔަ ފަދައިން، ކޯސްޓްގާޑުގެ ކެޕޭސިޓީ ވަރުގަދަކުރުމަށްޓަކައި ސްޕެޝަލް ބޯޓް ކޯޑްރަންއެއް އެވަނީ، ސްކޮޑްރަން އެވަނީ މިއަދު ފެށިފައި. ކޯސްޓްގާޑް ޑަބަލްކުރުމުގެ ޕްރޮގްރާމްގެ ތެރެއިން. ދެގުނަޔަށް ފްލީޓް ބޮޑުކުރުމުގެ މަސައްކަތްވެސް ވަނީ ފެށިފައި. ކަނޑުއޮތްގިރި އެވަނީ މިހާރު ސިފައިންނާ، ކޯސްޓްގާޑާ ހަވާލުކުރެވިފައި. އެ ތަނަކީ ކޯސްޓްގާޑުގެ، މި ދެންނެވިހެން ފްލީޓް ބޮޑުކޮށް، ދެމެހެއްޓުމުގެ މަސައްކަތް ކުރާނެ މައި ތަނަށް ވާނެ. 

ހަމައެއާއެކީގައި، ވަރަށް ގިނަގުނަ އެހެން ކަންތައްތައްވެސް ވަނީ ފެށިފައި. މުޅި ރާއްޖޭގެ އެކި ކަންކޮޅުތަކުގައި ހުރި ސިފައިންގެ މަރުކަޒުތައް ހުރީ ފަހަކަށްއައިސް ނުބެލެހެއްޓުމުގެ ސަބަބުން، މި ވޭތުވެދިޔަ ހަތަރު ފަސް އަހަރެއްގެ ތެރޭގައި، ޢަމުދުން ނުބެލެހެއްޓުމުގެ ސަބަބުން، ވަރަށް ބޮޑަށް ވީރާނާވާން ފަށާފައި. އެކުވެރި ދައުލަތްތަކުގެ އެހީތެރިކަމަށް މިހާރުވާނީ އެދިފައި. އިރާދަކުރެއްވީތީ އެ ކަންކަން މި އަންނަ އަހަރުގެ ތެރޭގައި، މި ދެންނެވި ހުރިހާ މަރުކަޒުތައް، އެފަދަ ފަރާތްތަކުގެ އެހީތެރިކަމާ އެކީގައި ހެދިގެންދާނެ. އަދިވެސް ވަރަށްގިނަ ކަންތައްތަކެއް އަޅުގަނޑުމެން ކުރުމަށް ވަނީ ފަށާފައި.

- ނަޞްރުގެ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްކެވި ވާހަކަފުޅުން