އަދި ހަމައެއާއެކީގައި، ޝަހީދުވި ޢާއިލާތަކަށް ޚާއްޞަކޮށް، ޝަހީދުވި ފަރާތްތަކަށް ޚާއްޞަ ކުރެވިގެން ހައުސިންގ ޕްރޮގްރާމެއް، "ޝަހީދުންގެ ހިޔާ"ގެ ނަމުގައި 50 ހައުސިންގ ޔުނިޓް ހިމެނޭ ހައުސިންގ އިމާރާތެއް، ކުރިއަށް އޮތް އަހަރުތަކުގައި، މި ދައުރުގެ ތެރޭގައި އަޅައި ނިންމައި، މި ޢާއިލާތަކާ ހަވާލުކުރާނަން. 

އާދެ، ދައުލަތަކުން މިފަދަ ކޮންމެ ކަމެއް ކޮށްދިނަސް، އެ ޢާއިލާތަކުން އެ ކަޑައްތުކުރާ ހިތާމައެއް އަނބުރާ ހޯދައެއްނުދެވޭނެ. އަދި އެ އަބްޠާލުންގެ އެ މަތިވެރި ޖިހާދުގެ އަގެއް ނުދެއްކޭނެ. އެހެންނަމަވެސް، މިވަރު އެންމެ ކުޑަމިނުން ކޮށްދޭންޖެހޭނެ ކަމަށް އަޅުގަނޑު ގަބޫލުކުރަން. 

އާދެ، އަޅުގަނޑު ހަމަ ދަންނަވާލަން ބޭނުންވަނީ، އިރާދަކުރެއްވިއްޔާ ކުރިއަށް އޮތް ދުވަސްތަކުގައި، އަޅުގަނޑުމެން މިފަދަ ގިނަ ކަންތައްތައް ކުރިއަށް ގެންދާނެ ވާހަކަ. ސިފައިންގެއަކީ އަދި ސިފައިންގެ ޚިދުމަތަށް ވަންނަ ފަރާތްތަކަކީ، ކުރިއަށް އޮތް ތަނުގައި، މިހާރަށްވުރެވެސް ބޮޑަށް، އަޅުގަނޑުމެންގެ ޤައުމަށް މި ދިމާވާ ކަންކަމުގައި ނިކަން ހުޝިޔާރު، ޤައުމަށް ބޭނުންވާ ހުރިހާ ކަމެއްގައި ތަމްރީނު ލިބިފައިވާ ބަޔަކަށް ހެދިގެންދާނެ. ސިފައިންގެ ޚިދުމަތަށް ވަނުމަކީ ކެރިއަރ ޕާރތެއްގެ ގޮތުގައި، އުފަލާއެކީގައި ވަންނަހިތްވާ ތަނަކަށް ހެދުމަކީ، އަޅުގަނޑުމެންގެ ޢަޒުމް. އެކިކަހަލަ ދާއިރާތަކުން އެކިކަހަލަ ތަމްރީނުތައް، ސިފައިންގެއަށް ވަދެގެންވެސް ހޯދުމަކީ އޮތް ގޮތެއް. ކުރެވޭނެ ކަމެއް. އަޅުގަނޑު ބޭނުން އެކަންކަން ކޮށްދޭން. ފުލުހުންގެ ޚިދުމަތަށްވެސް. ބައެއްފަހަރު މިވާގޮތަކީ، އެކިއެކި ދާއިރާތަކުން ކުރިއަށްދާން ބޭނުންވާ ކުދިން، މިއިން އެއްވެސް ޚިދުމަތަކަށް ވަންނާކަށް ބޭނުމެއްނުވޭ. އެކަން ބަދަލުކުރަން ބޭނުން. އިރާދަކުރެއްވިއްޔާ ކުރިއަށް އޮތް ދުވަސްތަކުގައި، މަތީ ތަޢުލީމާ ބެހޭ ވުޒާރާ މެދުވެރިކޮށް، ސިފައިންނަށާއި ފުލުހުންނަށް އެކިކަހަލަ ކެރިއަރ ޕާރތްތައް، މިހާރު ޚިދުމަތުގައި ތިބި ފަރާތްތަކަށާއި، ދެން އަލަށް ޖޮއިންކުރާ ކުދިންނަށްވެސް ލިބޭނެގޮތަށް ސްޓްރަކްޗަރ ކުރުމަކީ، އަޅުގަނޑު ނިންމާފައިވާ ކަމެއްކަން ދަންނަވާލަން ބޭނުން. 

އާދެ، ކުރިއަށް އޮތް ދުވަސްތަކުގައި، އަޅުގަނޑު ކުރިންވެސް ދެންނެވި ފަދައިން، ކެޕޭސިޓީ ބިލްޑް ކުރުމަށް ގިނަ ކަންތައްތަކެއް ކުރެވިގެންދާނެ. މިހާރު ދެކުނުގައި، އައްޑޫސިޓީ ގަމުގައި އެދަނީ އެއަރބޭސްއެއް ޤާއިމުކުރުމުގެ މަސައްކަތް ބާރު ސްޕީޑްގައި. އެ މަސައްކަތް ވަރަށް އަވަހަށް ނިމޭނެ. އުތުރުގައި އަދި އެފަދަ އެއްތަން ހެދިގެންދާނެ. 

އެހެންވީމާ، މިފަދަ ގިނަ ކަންތައްތަކެއް އިރާދަކުރެއްވިއްޔާ ކުރިއަށް އޮތް ދުވަސްތަކުގައި ބާރު ސްޕީޑްގައި ހިނގަމުންދާނެކަން އެއީ، އަޅުގަނޑު ހަމަ ދަންނަވާލަން ބޭނުން ވާހަކަ. 

- ނަޞްރުގެ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްކެވި ވާހަކަފުޅުން