ފަތުރުވެރިކަމުގެ ސިނާޢަތުގެ މަސައްކަތްތެރިންނަކީ ރާއްޖޭގެ ދެމެހެއްޓެނިވި ތަރައްޤީއަށް މުހިންމު މަސައްކަތްތަކެއް ކުރާ ބައެއްކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހިމް ވިދާޅުވެއްޖެއެވެ.

މަސައްކަތްތެރިންގެ ދުވަހާ ގުޅިގެން ދައުލަތުގެ މީޑިއާއަށް ދެއްވި ޚާއްސަ ބަޔާނެއްގައި ވަޒީރު މިފަދައިން ވިދާޅުވިއެވެ. އަދި ދުވަހުގެ ތަހުނިޔާ ހުރިހާ މަސައްކަތްތެރިންނަށް އަރިސްކުރެއްވިއެވެ. ވަޒީރުގެ ވާހަކަފުޅުގައި ފަތުރުވެރިކަމުގެ ސިނާޢަތުގައި ގިނަ އަދަދެއްގެ މަސައްކަތްތެރިން ހަރަކާތްތެރިވަމުންދާކަން ފާހަގަކުރެއްވިއެވެ.

"ޒުވާނުން ފަތުރުވެރިކަމުގެ ދާއިރާގައި ގިނަކޮށް އެކަށީގެންވާ ވަރަށް ތަމްރީނުކުރުމަކީ އެއީ ކުރާ ކަމެއް. ޒުވާނުންނަކީ ފަތުރުވެރިކަމުގެ ދާއިރާއާއި ތިމާވެށީގެ ދާއިރާގައި ވަރަށް މުހިއްމު ރޯލެއް އަދާކުރާ ބައެއް،" ވަޒީރު ޠާރިޤު ވިދާޅުވިއެވެ.

ދިވެހި މަސައްކަތްތެރިން ކުރަމުންދާ މަސައްކަތް ސަރުކާރުން ވަރަށް ގާތުން ބަލަމުންދާ ކަމަށާއި، އެ ފަރާތްތަކުގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބަލައިގަންނަ ކަމަށްވެސް ވަޒީރު ވިދާޅުވިއެވެ.

މީގެއިތުރުން، ޒުވާނުން މި ދާއިރާއަށް ނެރެ މަތީ ފަންތީގައި ހަރަކާތްތެރިވެވޭނެ މަގު ތަނަވަސްކޮށްދިނުމަށް ސަރުކާރުން މަސައްކަތްކުރަމުންދާ ކަމަށާއި، ދެމެހެއްޓެނިވި ގޮތެއްގައި ހުނަރުތައް ތަރައްޤީކުރުމަށް ޚާއްސަ އިސްކަމެއް ދެމުންދާ ކަމަށްވެސް ވަޒީރު ފާހަގަކުރެއްވިއެވެ.