ށ. އަތޮޅުގެ ތިން ރަށެއްގައި ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް ޚިދުމަތް މިއަދު ފަށައިފިއެވެ.

މި ޚިދުމަތް ފަށައިދިނީ ށ.ބިލެއްފައްސާއި ށ.ފޭދޫ އަދި ށ.ނޫމަރާގައި ބޭއްވުނު ޚާއްސަ ރަސްމިއްޔާތުތަކެއްގައި ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރެވެ.

މި ރަސްމިއްޔާތުތަކުގައި ބީއެމްއެލްގެ ސީއީއޯ މުހައްމަދު ޝަރީފާއި، ބޭންކުގެ އިސްވެރިން އަދި އެ ރަށްރަށުގެ ކައުންސިލުގެ މެންބަރުން ބައިވެރިވެ ވަޑައިގެންނެވިއެވެ.

މި އަލަށް ޤާއިމުކުރެވުނު އޭޓީއެމްތަކަކީ 24 ގަޑިއިރު ފައިސާ ނެގުމާއި ޖަމާކުރުމުގެ ޚިދުމަތް ލިބޭ ސެލްފް ސާވިސް އޭޓީއެމްތަކެކެވެ.

ބީއެމްއެލްއިން މަޢުލޫމާތު ދެއްވިގޮތުގައި، މިއީ ށ. އަތޮޅުގެ ހުރިހާ ރަށެއްގައި އޭޓީއެމް ޚިދުމަތް ފެށުމުގެ މަޝްރޫޢުގެ ބައެކެވެ. މި ބުރުގައި އަތޮޅުގެ 10 ރަށެއްގައި މި ޚިދުމަތް ފެށުމަށް ވަނީ ހަމަޖެހިފައެވެ. މި މަޝްރޫޢު ނިމުމުން ށ. އަތޮޅުގެ މީހުން ދިރިއުޅޭ ހުރިހާ ރަށެއްގައި އޭޓީއެމް ޚިދުމަތް ލިބެން ހުންނާނެއެވެ.

މި ޚިދުމަތް ފެށުމުން ރަށު ރައްޔިތުންނަށް ފަސޭހަކަމާއެކު ބޭންކިންގ ޚިދުމަތްތައް ލިބިގެންދާނެ ކަމަށް ބެލެވެއެވެ. އަދި މިއީ އަތޮޅުގެ އިޤްތިޞާދީ ދުވެލި އިތުރުވުމަށް މަގުފަހިވެގެންދާނެ ކަމެއް ކަމަށްވެސް ލަފާކުރެވެއެވެ.